കൃഷിക്കും ആരോഗ്യത്തിനും വൻ ഭീഷണി; സംസ്ഥാനത്ത് പലയിടത്തും ആഫ്രിക്കൻ ഒച്ച് ശല്യം രൂക്ഷം

കാസർകോട്: (KasargodVartha) മഴ പെയ്തൊഴിഞ്ഞതോടെ സംസ്ഥാനത്തെ വിവിധ ജില്ലകളിൽ ആഫ്രിക്കൻ ഒച്ചുകളുടെ ശല്യം അതിരൂക്ഷമായിക്കൊണ്ടിരിക്കുകയാണ്. കടന്നുകയറ്റക്കാരായ ഈ ജീവികൾ മനുഷ്യൻ്റെ ആരോഗ്യത്തിനും പരിസ്ഥിതിക്കും വലിയ വെല്ലുവിളിയാണ് ഉയർത്തുന്നത്. 

കാസർകോട് ജില്ലയിലെ ഉദുമ, ബദിയടുക്ക പഞ്ചായത്തുകൾ മുതൽ കോട്ടയം ജില്ലയിലെ കടുത്തുരുത്തി ഗ്രാമപഞ്ചായത്തും തൃശൂർ നഗരത്തിലെ പൂങ്കുന്നം വരെ സംസ്ഥാനത്തിൻ്റെ പല ഭാഗങ്ങളിലും മാസങ്ങളായി ആഫ്രിക്കൻ ഒച്ചിൻ്റെ ശല്യം രൂക്ഷമാണ്. വിവിധ ജില്ലകളിൽ നിന്നും ഒരേ സമയം ഇത്തരത്തിൽ പരാതികൾ ഉയർന്നുവരുന്നത് വലിയ പാരിസ്ഥിതിക പ്രശ്നങ്ങളിലേക്കാണ് വിരൽചൂണ്ടുന്നത്. 

കടുത്തുരുത്തിയിലെ നാലാം വാർഡ് പുലിക്കുട്ടുമ്മേൽ, 12, 13 വാർഡുകളായ എത്തക്കുഴി, കപിക്കാട് തുടങ്ങിയ പ്രദേശങ്ങളിൽ ഈ അധിനിവേശ ജീവികളുടെ ശല്യം വളരെ കൂടുതലാണ്. ഭക്ഷണം കഴിക്കാനോ വീടിന് പുറത്തേക്ക് ഇറങ്ങാനോ കഴിയാതെ ജനങ്ങൾ വലിയ ബുദ്ധിമുട്ടിലായിട്ടും ഇവയെ നശിപ്പിക്കാനോ നിയന്ത്രിക്കാനോ തദ്ദേശ സ്വയംഭരണ സ്ഥാപനങ്ങൾ കാര്യമായ യാതൊരു നടപടിയും സ്വീകരിക്കുന്നില്ലെന്ന പരാതി ശക്തമാണ്.

കാർന്നുതിന്നുന്ന അധിനിവേശ ഭീകരർ

ഒച്ച് ഒരു ഭീകര ജീവി അല്ലെന്നാണ് നാട്ടുകാർ ആദ്യം കരുതിയിരുന്നത്. ദിവസങ്ങൾക്ക് മുൻപ് ആഫ്രിക്കൻ ഒച്ചുകളെ അങ്ങിങ്ങായി കണ്ട് തുടങ്ങിയപ്പോൾ നിസ്സാരക്കാരാണെന്ന് കരുതി പലരും ആദ്യം അവഗണിച്ചു. എന്നാൽ, മൂന്ന് ആഴ്ചയ്ക്ക് അപ്പുറം ഒരു ഗ്രാമത്തെ തന്നെ കാർന്നുതിന്നുന്ന ഭീകരന്മാരായി ഇവ മാറിയിരിക്കുകയാണ്. മതിലുകളിലും വീടിൻ്റെ ഭിത്തികളിലും റോഡരികിലും കിണറുകളിലും എന്നുവേണ്ട ആഫ്രിക്കൻ ഒച്ചുകൾ കേറിക്കൂടാത്ത ഇടങ്ങളില്ല.

മഴക്കാലത്ത് ഈർപ്പമുള്ള അന്തരീക്ഷത്തിൽ ഇവ വേഗത്തിൽ പെരുകുന്നതാണ് നിലവിലെ പ്രധാന പ്രതിസന്ധി. പ്രദേശത്തെ വീടുകളിലെ പച്ചക്കറികളും ചെടികളും കൃഷികളും ഇവ അതിവേഗം തിന്നു നശിപ്പിക്കുകയാണ്. തൃശൂർ പൂങ്കുന്നം നിവാസികൾ ഉൾപ്പെടെ നിരവധി പേർ വൻതോതിൽ പെരുകിയ ആഫ്രിക്കൻ ഒച്ചുകളെ കൊണ്ട് പൊറുതിമുട്ടിയിരിക്കുകയാണ്.

മസ്തിഷ്ക ജ്വരത്തിന് സാധ്യത

ആഫ്രിക്കൻ ഒച്ച് ഇത്തരത്തിൽ അനിയന്ത്രിതമായി പെരുകുന്നത് കൃഷിക്കും മനുഷ്യരുടെ ആരോഗ്യത്തിനും വലിയ പ്രതിസന്ധിയാണ് സൃഷ്ടിക്കുന്നത്. മനുഷ്യരിൽ, പ്രത്യേകിച്ച് ചെറിയ കുട്ടികളിൽ മസ്തിഷ്ക ജ്വരത്തിന് ഇവ കാരണമാകുമെന്ന് ആരോഗ്യ വിദഗ്ധർ മുന്നറിയിപ്പ് നൽകുന്നുണ്ട്. ഇവയുടെ ശരീരത്തിൽ കാണപ്പെടുന്ന ചിലയിനം പരോപജീവികളാണ് മനുഷ്യർക്ക് രോഗമുണ്ടാക്കുന്നത്.

ഗുരുതര രോഗവാഹകരായ ഇവരെ ഭയന്നാണ് ഇപ്പോൾ പലയിടത്തും നാട്ടുകാരുടെ ജീവിതം. നാട്ടിൽ കൃഷി ചെയ്യുന്ന ഒട്ടുമിക്ക വിളകളുടെയും ഇലകൾ തിന്നു നശിപ്പിക്കുകയും ചെയ്യും. 10 വർഷം വരെയാണ് സാധാരണയായി ആഫ്രിക്കൻ ഒച്ചുകളുടെ ആയുസ്സ്. ഒരു തവണ മാത്രം 500 മുതൽ 1200 വരെ മുട്ടകൾ ഇവ മണ്ണിനടിയിൽ ഇടും. ഇങ്ങനെ നശിപ്പിക്കുംതോറും ഇവ വൻതോതിൽ പെരുകുകയാണെന്ന് നാട്ടുകാർ ആശങ്കയോടെ പറയുന്നു.

പ്രതിരോധ നടപടികളുമായി അധികൃതർ

കാസർകോട് ജില്ലയിലെ ഉദുമ ഗ്രാമപഞ്ചായത്ത് പരിധിയിലും ബദിയടുക്ക പഞ്ചായത്തിലുമുൾപ്പെടെ ആഫ്രിക്കൻ ഒച്ചുകളുടെ ശല്യം വലിയ രീതിയിൽ വ്യാപകമാകുന്നതായി കാണിച്ച് പൊതുപ്രവർത്തകൻ മൂസ പാലക്കുന്ന് ഉൾപ്പെടെയുള്ളവർ നൽകിയ പരാതിയുടെ അടിസ്ഥാനത്തിൽ അടിയന്തര പ്രതിരോധ നടപടികളുമായി അധികൃതർ രംഗത്തെത്തിയിട്ടുണ്ട്. 

പരാതിയെ തുടർന്ന് ആരോഗ്യ വകുപ്പ് ഉദ്യോഗസ്ഥർ സ്ഥലപരിശോധന നടത്തുകയും പ്രദേശത്ത് ആഫ്രിക്കൻ ഒച്ചുകളുടെ സാന്നിധ്യം ഔദ്യോഗികമായി സ്ഥിരീകരിക്കുകയും ചെയ്തു. പരിശോധനയുടെ ഭാഗമായി പ്രദേശത്ത് പൊതുജനാരോഗ്യ ബോധവൽക്കരണം നൽകുകയും, പരിസര ശുചിത്വം കൃത്യമായി ഉറപ്പുവരുത്താനും മാലിന്യങ്ങൾ അലക്ഷ്യമായി കൂട്ടിയിടാതിരിക്കാനും താമസക്കാർക്ക് കർശന നിർദേശം നൽകിയിട്ടുണ്ട്.

മറ്റ് പ്രദേശങ്ങളിലേക്ക് ഈ അധിനിവേശ ജീവികൾ പടരുന്നത് തടയാൻ ശാസ്ത്രീയമായ രീതിയിലുള്ള ഉന്മൂലന പരിപാടികൾ ആവശ്യമാണ്. ആഫ്രിക്കൻ ഒച്ചുകളുടെ നിയന്ത്രണവും നശീകരണവും കൃഷിവകുപ്പിൻ്റെ സാങ്കേതിക പരിധിയിൽ വരുന്ന വിഷയമായതിനാൽ, തുടർനടപടികൾക്കായി ജനങ്ങളുടെ പരാതി ഉദുമ കൃഷി ഓഫീസിലേക്ക് കൈമാറിയിരിക്കുകയാണ്. കൂടാതെ, ബയോഡൈവേഴ്സിറ്റി മാനേജ്മെൻ്റ് കമ്മിറ്റിയുടെ നേതൃത്വത്തിലുള്ള പ്രവർത്തനങ്ങളുടെ ഭാഗമായി പ്രദേശത്തുനിന്നും ആഫ്രിക്കൻ ഒച്ചിനെ തുരത്തുന്നതിനുള്ള അടിയന്തര നടപടികൾ ആരംഭിച്ചതായി ഗ്രാമപഞ്ചായത്ത് സെക്രട്ടറി അറിയിച്ചു.

ഒച്ചുകളെ നശിപ്പിക്കാൻ ചിലയിടങ്ങളിൽ നാട്ടുകാർ ഉപ്പു പ്രയോഗം നടത്തുന്നുണ്ട്. ആഫ്രിക്കൻ ഒച്ചിൻ്റെ സാന്നിധ്യം കണ്ടെത്തിയ പ്രദേശങ്ങളിൽ അര കിലോമീറ്റർ ചുറ്റളവിൽ കോപ്പർ സൾഫേറ്റ് സ്പ്രേ ചെയ്യുന്ന പ്രതിരോധ പ്രവർത്തനങ്ങൾ നടത്തണമെന്നാണ് നാട്ടുകാരുടെ പ്രധാന ആവശ്യം. മറ്റു പ്രദേശങ്ങളിലേക്ക് ആഫ്രിക്കൻ ഒച്ചിൻ്റെ വ്യാപനം ഒരുപരിധിവരെ തടയാൻ ഇതുമൂലം സാധിക്കും.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം

Article Summary: African snails are multiplying rapidly across various panchayats in Kerala, posing a severe threat to agriculture and human health, prompting authorities to initiate immediate control measures.

#AfricanSnail #KeralaNews #PublicHealth #KasaragodNews #AgricultureThreat #PestControl #MalayalamNews #AparnaNews