എല്ലാ രോഗങ്ങൾക്കും ഈ മരുന്നില്ലാത്ത ചികിത്സ; അക്യുപങ്ചർ പ്രാക്ടീഷണർമാർ ശനിയാഴ്ച കാസർകോട്ട് ഒത്തുചേരുന്നു

കാസർകോട്: (KasargodVartha) ഇന്ത്യൻ അക്യുപങ്ചർ പ്രാക്ടീഷണേഴ്‌സ് അസോസിയേഷൻ്റെ (IAPA) വാർഷിക സംസ്ഥാന സമ്മേളനം ശനിയാഴ്ച (ഒക്ടോബർ 25) കാസർകോട് പുതിയ ബസ് സ്റ്റാന്‍ഡിന് സമീപത്തെ ആർ.കെ മാളില്‍ പ്രത്യേകം സജ്ജമാക്കിയ സുഫിയാൻ നഗറിൽ നടക്കും. രാവിലെ ഒൻപത് മണിക്ക് ആരംഭിച്ച് ഉച്ചയ്ക്ക് രണ്ട് മണി വരെയാണ് പ്രധാന സമ്മേളനം നടക്കുകയെന്ന് ഭാരവാഹികൾ വാർത്താ സമ്മേളനത്തിൽ അറിയിച്ചു.

അക്യുപങ്ചർ ചികിത്സക്കെതിരെ ചില കേന്ദ്രങ്ങളിൽ നിന്ന് തെറ്റിദ്ധാരണകൾ പരത്തുന്നുവെന്ന് പ്രാക്ടീഷണർമാർ പറഞ്ഞു. എല്ലാ രോഗങ്ങൾക്കും ഈ മരുന്നില്ലാത്ത ചികിത്സ വിജയകരമായി നടത്തിവരുന്നുണ്ടെന്നും അവർ കൂട്ടിച്ചേർത്തു. ആരോഗ്യമേഖലയിൽ ശ്രദ്ധേയമായ സംഭാവനകൾ നൽകിയ ഡോ. ജേക്കബ് വടക്കാഞ്ചേരി സമ്മേളനം ഉദ്ഘാടനം ചെയ്ത് സംസാരിക്കും.

മരുന്ന് രഹിത ചികിത്സാരീതിയായ അക്യുപങ്ചറിൻ്റെ ചികിത്സകരുടെ പ്രഥമ കൂട്ടായ്മ അതിൻ്റെ സേവന പാതയിൽ ഒരു പതിറ്റാണ്ട് പിന്നിടുന്ന വേളയിലാണ് ഈ സമ്മേളനം സംഘടിപ്പിക്കുന്നത്. ആരോഗ്യ രംഗത്ത് വലിയ വിപ്ലവങ്ങൾക്ക് ഈ സമ്മേളനം തുടക്കം കുറിക്കുമെന്നാണ് സംഘാടകർ വിലയിരുത്തുന്നത്.

സംസ്ഥാനത്തുടനീളമുള്ള 700-ൽ പരം പ്രതിനിധികൾ സമ്മേളനത്തിൽ സംബന്ധിക്കും. സമ്മേളനത്തിന് സമാപനം കുറിച്ചുകൊണ്ട് പൊതുജനങ്ങൾക്കായി വൈകുന്നേരം നാല് മണി മുതൽ ആറ് മണി വരെ അവബോധ ക്ലാസും സംഘടിപ്പിച്ചിട്ടുണ്ട്. 'പ്രമേഹം, വൃക്കരോഗങ്ങൾ.. പരിഹാരമെന്ത്?' എന്ന വിഷയത്തിലാണ് ക്ലാസ് നടക്കുകയെന്ന് സംഘാടകർ അറിയിച്ചു.

വാർത്താ സമ്മേളനത്തിൽ ഐഎ പി എ പ്രസിഡന്റ് ഷുഹൈബ് റിയാലു, സെക്രട്ടറി സി.കെ. സുനീർ, ട്രഷറർ ഖമറുദ്ദീൻ കൗസരി, പി.ആർ.ഒ. അഹമ്മദ്‌ ജുനൈദ്, ജോയിന്റ് സെക്രട്ടറി സലീന കാസിം, പ്രോഗ്രാം കൺവീനർ എൻ നസീഫ് എന്നിവർ പങ്കെടുത്തു.

അവബോധ ക്ലാസ് വിവരങ്ങൾ എല്ലാവരിലേക്കും എത്തിക്കുക.

Article Summary: Acupuncture Practitioners Association State conference in Kasaragod tomorrow; leaders allege misinformation against treatment.

#Acupuncture #KeralaHealth #IAPA #Kasaragod #AlternativeMedicine