ഷാര്‍ജ ഇന്ത്യന്‍ അസോസിയേഷന്‍ യു.എ.ഇ ദേശീയദിനാഘോഷ റാലി

ഷാര്‍ജ: യു.എ.ഇ ദേശീയ ദിനാഘോഷത്തിന്റെ ഭാഗമായി ഷാര്‍ജ ഇന്ത്യന്‍ അസോസിയേഷന്‍ പോലീസിന്റെ സഹകരണത്തോടെ ദേശീയ ദിനാഘോഷ റാലി നടത്തി. ഷാര്‍ജ ഗോള്‍ഡ് സൂഖിന്റെ പരിസരത്തു നിന്നും ആരംഭിച്ച ജാഥയില്‍ മുന്‍ നിരയില്‍ പ്രസിഡന്റ് അഡ്വ.വൈ.എ.റഹീം, ജനറല്‍ സെക്രട്ടറി കെ. ബാലകൃഷ്ണന്‍, ട്രഷറര്‍ എ.എം.അമീര്‍, വൈസ് പ്രസിഡന്റ് മാത്യു ജോണ്‍, ജോ.ജന.സെക്രട്ടറി അഡ്വ.അജി കുര്യാക്കോസ്, ജോ. ട്രഷറര്‍ അബ്ദുല്‍ മനാഫ് കെ.എം, ഓഡിറ്റര്‍ പവിത്രന്‍ നിട്ടൂര്‍ എന്നിവരും മാനേജിംഗ് കമ്മിറ്റി അംഗങ്ങളും അണിനിരന്നു.

ദേശീയ പതാകയുടെ രൂപത്തില്‍ നിറമുള്ള ടീ ഷര്‍ട്ടിട്ട അംഗങ്ങളും അറബിക് ബ്യൂഗില്‍ സംഘവും, ഷാര്‍ജ ഇന്ത്യന്‍ സ്‌കൂള്‍ സ്‌കൗട്ട്‌സ് ആന്റ് ഗൈഡ്‌സിന്റെ ബാന്റ് സംഘവും റാലിയുടെ പിന്നാലെ നീങ്ങി. വ്യത്യസ്ത കലാരൂപങ്ങളുടെ വേഷമണിഞ്ഞ വിദ്യാര്‍ത്ഥിനികളും റാലിക്ക് നിറപ്പകിട്ടേകി. ഭരണാധികാരികളുടെ ചിത്രങ്ങളുള്ള ഷാളുകളും യു.എ.ഇ ദേശീയ പതാകകളും കൈയിലേന്തിയായിരുന്നു ഘോഷയാത്ര നടന്നത്. കാണാനും അഭിവാദ്യമര്‍പ്പിക്കാനുമായി റോഡിനിരുവശത്തും കുട്ടികളും സ്ത്രീകളുമുള്‍പ്പെടെ ഏറെപ്പേര്‍ നിലയുറപ്പിച്ചിരുന്നു. മജാസ് പാര്‍ക്കിനു സമീപം റാലി സമാപിച്ചു.