നാടിൻ്റെ ക്ഷേമത്തിനും പുനഃസൃഷ്ടിക്കും കെ എം സി സി നൽകുന്ന സംഭാവനകൾ അതുല്യം: ടി ഇ അബ്ദുല്ല

കാസർകോട്: (www.Kasaragodvartha.com 20.08.2020) അശരണരും ആലംബഹീനരുമായ ആളുകളുടെ ആശയും ആശ്രയവുമാണ് കെ എം സി സി എന്ന് മുസ്ലിം ലീഗ് കാസർകോട് ജില്ലാ പ്രസിഡണ്ട് ടി ഇ അബ്ദുല്ല അഭിപ്രായപ്പെട്ടു. കോവിഡ് മഹാമാരി ലോകത്തെയാകമാനം പിടിച്ചുലച്ചപ്പോൾ നാട്ടിലും പ്രവാസ ലോകത്തും ദുബൈ കാസർകോട് ജില്ലാ കെ എം സി സി യുടെ തുല്യതയില്ലാത്ത സേവനങ്ങൾ അഭിനന്ദനാർഹവും അനുകരണീയവുമായിരുന്നു.

പ്രവാസഭൂമിയിൽ ഉപജീവനത്തിന് അത്യധ്വാനം ചെയ്യുമ്പോളും സ്വന്തംനാടിൻ്റെ ക്ഷേമത്തിനും പുനഃസൃഷ്ടിക്കും വേണ്ടി അവർ നൽകുന്ന സംഭാവനകൾ ചരിത്രത്തിൽ ഉല്ലേഖനം ചെയ്യപ്പെടുമെന്നും ദുബൈ കെ എം സി സി കാസർകോട് ജില്ലാ കമ്മറ്റിയുടെ സഹാറ 2020 ജീവകാരുണ്യ പദ്ധതി ഉദ്ഘാടനം ചെയ്തു സംസാരിക്കവേ അദ്ദേഹം പറഞ്ഞു.

സഹാറ 2020 യുടെ ഭാഗമായുള്ള ധനസഹായം ദുബൈ കെ എം സി സി കാസർകോട് ജില്ലാ കമ്മറ്റി പ്രസിഡണ്ട് അബ്ദുല്ല ആറങ്ങാടി മുസ്ലിം ലീഗ് ജില്ലാ പ്രസിഡണ്ട് ഇ അബ്ദുല്ലയേയും ഇലക്ട്രോണിക് വീൽചെയർ ദുബൈ കെ എം സി സി കാസർകോട് ജില്ലാ കമ്മറ്റി ട്രഷറർ ഹനീഫ് ടി ആർ ജില്ലാ ലീഗ് ട്രഷറർ കല്ലട്ര മാഹിൻ ഹാജിയേയും ഏൽപ്പിച്ചു.

ടി എ ഇബ്രാഹിം സ്മാരക മന്ദിരത്തിൽ സഹാറ 2020 ജീവകാരുണ്യ പദ്ധതിയുടെ വിതരണ ചടങ്ങിൽ അബ്ദുല്ല ആറങ്ങാടി അധ്യക്ഷത വഹിച്ചു.   ഹനീഫ ടി ആർ സ്വാഗതം പറഞ്ഞു.