ഗള്‍ഫിലേക്ക് കൊണ്ടുപോകാന്‍ ഏല്‍പിച്ച അച്ചാറിനൊപ്പം കഞ്ചാവ് പൊതികള്‍

File photo

കാഞ്ഞങ്ങാട്: ഗള്‍ഫിലേക്ക് കൊണ്ടുപോകാന്‍ ഏല്‍പിച്ച അച്ചാറിനൊപ്പം കഞ്ചാവ് പൊതികള്‍ തിരുകിയ നിലയില്‍ കണ്ടെത്തി. മീനാപ്പീസ് കടപ്പുറത്തു നിന്ന് ദുബായിലേക്ക് പോകാന്‍ രാഹുല്‍രാജ് എന്നയാളെ പട്ടാക്കലിലെ സുഹൈല്‍ ഏല്‍പിച്ച  അച്ചാര്‍ പാക്കറ്റുകള്‍ക്കിടയിലാണ് കഞ്ചാവുപൊതികള്‍ കണ്ടെത്തിയത്.

കുവൈത്തിലെ ഒരാള്‍ക്ക് കൊടുക്കാനാണ് രാഹുല്‍രാജിന് സുഹൈല്‍ അച്ചാര്‍ പാക്കറ്റുകള്‍ നല്‍കിയത്. അച്ചാര്‍ പാക്കറ്റുകള്‍ക്ക് അമിതഭാരമായതിനാല്‍ വേര്‍തിരിച്ചെടുക്കാനായി പൊട്ടിച്ചപ്പോഴാണ് കഞ്ചാവ് പൊതികള്‍ കണ്ടത്. ഉടന്‍ തന്നെ വീട്ടുകാര്‍ വിവരം ഹൊസ്ദുര്‍ഗ് പോലീസില്‍ അറിയിച്ചു. രാഹുല്‍രാജ് ഗള്‍ഫിലേക്ക് പോയിട്ടുണ്ട്. കഞ്ചാവുപൊതികള്‍ ഗള്‍ഫിലേക്ക് കടത്താന്‍ ശ്രമിച്ച സംഭവത്തില്‍ ഹൊസ്ദുര്‍ഗ് പോലീസ് കേസെടുത്ത് അന്വേഷണം തുടങ്ങി.