ദമാം വിമാനത്താവളത്തിന് നേരെ ഉണ്ടായ ഡ്രോൺ ആക്രമണം; മരിച്ച രണ്ടുപേരിൽ ഒരാൾ ഇന്ത്യക്കാരനെന്ന് സ്ഥിരീകരിച്ച് എംബസി

ദമാം: (KasargodVartha) കിങ് ഫഹദ് അന്താരാഷ്ട്ര വിമാനത്താവളത്തിന് നേരെ ഉണ്ടായ ഭീകരമായ ഡ്രോൺ ആക്രമണത്തിൽ കൊല്ലപ്പെട്ട രണ്ടുപേരിൽ ഒരാൾ ഇന്ത്യൻ പൗരനാണെന്ന് റിയാദിലെ ഇന്ത്യൻ എംബസി സ്ഥിരീകരിച്ചു. 2026 ഒക്ടോബർ 21 ബുധനാഴ്ച രാത്രി നടന്ന ഈ അപ്രതീക്ഷിത ആക്രമണത്തിൽ എട്ടുപേർക്കാണ് പരിക്കേറ്റിട്ടുള്ളത്. ഇതിൽ രണ്ട് ഇന്ത്യൻ പൗരന്മാരും ഉൾപ്പെടുന്നതായി ഔദ്യോഗിക വൃത്തങ്ങൾ അറിയിച്ചു.

എംബസിയുടെ ഇടപെടൽ

സംഭവവുമായി ബന്ധപ്പെട്ട സഊദിയിലെ ബന്ധപ്പെട്ട അധികാരികളുമായി നിരന്തരം ആശയവിനിമയം നടത്തിവരികയാണെന്നും, അപകടത്തിൻ്റെ കൂടുതൽ വിവരങ്ങൾ ശേഖരിച്ചുവരികയാണെന്നും എംബസി വ്യക്തമാക്കി. എക്സിൽ പങ്കുവെച്ച കുറിപ്പിൽ എംബസി പറഞ്ഞത് ഇങ്ങനെയാണ്: 'കഴിഞ്ഞ രാത്രി ദമാം വിമാനത്താവളത്തിന് നേരെ ഉണ്ടായ ആക്രമണത്തിൽ നിർഭാഗ്യവശാൽ ജീവൻ നഷ്ടപ്പെട്ട രണ്ടുപേരിൽ ഒരു ഇന്ത്യൻ പൗരനും ഉൾപ്പെടുന്നുണ്ടെന്നും രണ്ട് ഇന്ത്യൻ പൗരന്മാർക്ക് പരിക്കേറ്റതായും സൗദി അധികൃതർ അറിയിച്ചിട്ടുണ്ട്. ഞങ്ങൾ കൂടുതൽ വിവരങ്ങൾ ശേഖരിച്ചുവരികയും ബാധിച്ചവരുടെ കുടുംബങ്ങളുമായി ബന്ധപ്പെടുകയും ചെയ്യുന്നു.'

വിദേശകാര്യ മന്ത്രാലയത്തിൻ്റെ (MEA) നിർദേശപ്രകാരം പരിക്കേറ്റവർക്ക് മികച്ച വൈദ്യസഹായം ഉറപ്പാക്കാനും, മരിച്ചയാളുടെ മൃതദേഹം നടപടിക്രമങ്ങൾ പൂർത്തിയാക്കി നാട്ടിലെത്തിക്കാനുമുള്ള അടിയന്തര നടപടികൾ എംബസി ഉദ്യോഗസ്ഥർ ആരംഭിച്ചിട്ടുണ്ട്. ആക്രമണത്തിൻ്റെ പൂർണ ഉത്തരവാദിത്തം ഇതുവരെ ഒരു ഭീകര സംഘടനയും ഏറ്റെടുത്തിട്ടില്ലെങ്കിലും സഊദി സുരക്ഷാ സേന വിമാനത്താവളത്തിലും പരിസരങ്ങളിലും സുരക്ഷ വലിയ തോതിൽ കർശനമാക്കിയിരിക്കുകയാണ്.

കുടുംബങ്ങൾക്ക് ആശ്വാസമായി എംബസി

'കൊല്ലപ്പെട്ടയാളുടെ കുടുംബത്തിനും പ്രിയപ്പെട്ടവർക്കും ഞങ്ങളുടെ അനുശോചനവും പ്രാർഥനകളും നേരുന്നു, പരിക്കേറ്റവർ വേഗത്തിൽ സുഖം പ്രാപിക്കട്ടെ എന്ന് ആശംസിക്കുന്നു,' എന്ന് എംബസി കുറിപ്പിൽ കൂട്ടിച്ചേർത്തു. മരിച്ചയാളുടെ പേരുവിവരങ്ങൾ ഇതുവരെ പുറത്തുവിട്ടിട്ടില്ല.

കൂടുതല്‍ വാർത്തകളും വിശേഷങ്ങളും അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് കമൻ്റായി രേഖപ്പെടുത്തുക. 

Article Summary: One Indian was killed in a drone attack at Dammam airport in Saudi Arabia.

#SaudiArabia #DammamAirport #DroneAttack #IndianEmbassy #GulfNews #MalayalamNews #InternationalNews #RenuNews