'ബി.പോക്കര്‍ സാഹിബ്' ജീവചരിത്രം മന്ത്രി അബ്ദുറബ്ബ് പ്രകാശനം ചെയ്തു

ദുബൈ: മുസ്ലിം ലീഗിന്റെ ആദ്യകാല നേതാവും ലോകസഭാ അംഗവുമായിരുന്ന ബി.പോക്കര്‍ സാഹിബിനെ കുറിച്ച് പി.എസ്.എം.ഓ കോളജ് യു.എ.ഇ അലുംനി അസോസിയേഷന്‍ പ്രസിദ്ധീകരിച്ച 'ബി.പോക്കര്‍ സാഹിബ് ' ജീവചരിത്രം ചെസ്ലര്‍ തോമസിനു നല്‍കി കേരള വിദ്യാഭ്യാസ വകുപ്പു മന്ത്രി പി.കെ അബ്ദുറബ്ബ് പ്രകാശനം ചെയ്തു. പത്രപ്രവര്‍ത്തകനും ഗ്രന്ഥകാരനുമായ കെ.പി.കുഞ്ഞുമ്മൂസയാണ് ഗ്രന്ഥകര്‍ത്താവ്.

ദാര്‍ശനികപരവും പ്രായോഗികപരവുമായ പ്രവര്‍ത്തനം കാഴ്ച വെച്ച മഹാനായ നേതാവായിരുന്നു ബി.പോക്കര്‍ സാഹിബെന്ന് പ്രകാശനം നിര്‍വഹിച്ച് സംസാരിച്ച  മന്ത്രി പറഞ്ഞു. വിദ്യാഭ്യാസ നവോത്ഥാന രംഗത്ത് സീതിസാഹിബോടൊപ്പം പ്രവര്‍ത്തിച്ച അദ്ദേഹം ഭൗതീക വിദ്യാഭ്യാസത്തിന്റെ പ്രസക്തി സമൂഹത്തിന് മനസിലാക്കിക്കൊടുക്കുന്നതില്‍ വിജയം കൈവരിച്ചതായി അദ്ദേഹം പറഞ്ഞു.

ദുബൈ കെ.എം.സി.സി.ഓഡിറ്റോറിയത്തില്‍ നടന്ന ചടങ്ങില്‍ അലുംനി അസോസിയേഷന്‍ പ്രസിഡന്റ് കെ.പി.എ.സലാം അദ്ധ്യക്ഷത വഹിച്ചു. എം.സി.എ.നാസര്‍ പുസ്തകം പരിചയപ്പെടുത്തി. കഥാകൃത്ത് സലീം അയ്യനേത്തിനെ ചടങ്ങി മന്ത്രി പൊന്നാടയും ഉപഹാരവും നല്‍കി ആദരിച്ചു. ഡോ.പി.എ.ഇബ്രാഹിം ഹാജി,പി.കെ.അന്‍വര്‍,സി.കെ.അബ്ദുല്‍ മജീദ്, ബഷീര്‍ പടിയത്ത്, ഡോ.അഹ്മദ്, സീതി പടിയത്ത്, ചെസ്ലര്‍ തോമസ്, ഒ.കെ.ഇബ്രാഹിം, കെ.എച്ച്.എം.അഷ്‌റഫ് എന്നിവര്‍ പ്രസംഗിച്ചു. അബൂബക്കര്‍ ബി.പി.അങ്ങാടി ഖിറാഅത്ത് നടത്തി. ജന.സെക്രട്ടറി ഷാഹിം ഇ.പി.സ്വാഗതവും കെ.അബ്ദുല്‍ അസീസ് നന്ദിയും പറഞ്ഞു.