ഗള്ഫ് നാടുകളില് കാരിഫോറിന് വൻ തിരിച്ചടി; കൂടുതൽ ശാഖകൾ അടച്ചുപൂട്ടി
● കുവൈത്തിലെയും ബഹ്റൈനിലെയും എല്ലാ കാരിഫോർ ശാഖകളും അടച്ചുപൂട്ടി.
● ജോർദാൻ, ഒമാൻ എന്നിവിടങ്ങളിലും നേരത്തെ ശാഖകൾ അടച്ചുപൂട്ടിയിരുന്നു.
● ബഹിഷ്കരണാഹ്വാനം നടത്തിയ ബി.ഡി.എസ് മൂവ്മെൻ്റിൻ്റെ ആഹ്വാനം വിജയം കണ്ടു.
● ഗസ്സയിൽ കൂട്ടക്കൊല നടത്തുന്ന സയണിസ്റ്റ് സൈനികർക്ക് സമ്മാനപൊതികൾ നൽകിയത് വിവാദമായിരുന്നു.
മസ്കത്ത്: (KasargodVartha) ഫലസ്തീനില് സാധാരണക്കാരെ ഉൾപ്പെടെ കൂട്ടക്കൊല ചെയ്യുന്ന സയണിസ്റ്റ് രാജ്യത്തിന് സാമ്പത്തിക സഹായം നൽകിയ ഫ്രഞ്ച് റീട്ടെയിൽ ഭീമൻമാരായ കാരിഫോർ (Carrefour) ശൃംഖലക്ക് കൂടുതൽ ഗൾഫ് നാടുകളിൽ തിരിച്ചടി. കുവൈത്തിലെയും ബഹ്റൈനിലെയും എല്ലാ ശാഖകളും കാരിഫോർ അടച്ചുപൂട്ടി. സയണിസ്റ്റ് അനുകൂല നിലപാടിന്റെ പേരിൽ ബഹിഷ്കരണം നേരിട്ടതിനെത്തുടർന്ന് ജോർദാനിലെയും ഒമാനിലെയും ശാഖകൾ നേരത്തെ അടച്ചുപൂട്ടിയിരുന്നു. ഇതിന് പിന്നാലെയാണ് കുവൈത്തിലെയും ബഹ്റൈനിലെയും ശാഖകളും അടച്ചുപൂട്ടിയത്.
ഇസ്റാഈല് ഗസ്സയിൽ നടത്തിവരുന്ന വംശഹത്യക്ക് സഹായം നൽകിയതിനെ തുടർന്ന് നടത്തിയ ബഹിഷ്കരണ കാംപയിൻ ആണ് ഇതോടെ വിജയം കണ്ടതെന്ന് ബഹിഷ്കരണാഹ്വാനം നടത്തിയ ബി.ഡി.എസ് മൂവ്മെൻ്റ് (BDS- Divestment and Sanctions) അറിയിച്ചു. ഇസ്റാഈൽ ഭരണകൂടത്തിന് പിന്തുണ നൽകുന്ന കമ്പനികളെ അന്താരാഷ്ട്ര നിയമം പാലിക്കാൻ നിർബന്ധിക്കുന്ന പ്രസ്ഥാനമാണ് ബി.ഡി.എസ്. ബഹിഷ്കരണാഹ്വാനം ഉണ്ടായതോടെ വിവിധ രാജ്യങ്ങളിലെ കാരിഫോർ ഔട്ട്ലെറ്റുകൾക്ക് മുന്നിൽ ജനാധിപത്യ വിശ്വാസികൾ പ്രതിഷേധിക്കുന്നത് പതിവ് കാഴ്ചയായി. ഇത് കാരിഫോറിൻ്റെ വരുമാനം കുത്തനെ ഇടിയാനും ജീവനക്കാരെ വെട്ടിക്കുറക്കാനും കാരണമായി. ലോകമെമ്പാടും 3400 ഷോപ്പുകളാണ് ഈ കമ്പനിക്കുള്ളത്.
ബഹ്റൈനിൽ കാരിഫോർ സെപ്റ്റംബർ 14-ന് ആണ് പ്രവർത്തനങ്ങൾ നിർത്തിവെച്ച് തുടങ്ങിയത്. 14-ന് രാജ്യത്തുടനീളമുള്ള ഏഴ് സ്റ്റോറുകൾ അടച്ചുപൂട്ടി. സെപ്റ്റംബർ 16-ന് കുവൈത്തിലെ പ്രവർത്തനങ്ങൾ പൂർണ്ണമായും അടച്ചുപൂട്ടുന്നതായും കാരിഫോർ പ്രഖ്യാപിച്ചു. യു.എ.ഇയിലെ പ്രമുഖ ഗ്രൂപ്പായ അൽഫുതൈം ആണ് ഗൾഫ് മേഖലയിലെ കാരിഫോർ ഷോപ്പുകൾ നടത്തിയിരുന്നത്. ഈ മേഖലയിലെ ഏറ്റവും പ്രമുഖ സൂപ്പർമാർക്കറ്റ് ശൃംഖലകളിൽ ഒന്നാണ് കാരിഫോർ. ഉപഭോക്താക്കളുടെ വിശ്വസ്തതയ്ക്ക് നന്ദി പറഞ്ഞ കാരിഫോർ, വിപണിയിൽ നിന്ന് പിൻമാറുന്നതിനുള്ള കാരണങ്ങൾ വിശദമാക്കിയിട്ടില്ല. എന്നാൽ, അറബ് മാധ്യമങ്ങൾ റിപ്പോർട്ട് ചെയ്തതനുസരിച്ച്, ബി.ഡി.എസ് പ്രസ്ഥാനത്തിന്റെയും ഗസ്സയ്ക്കെതിരായ ഇസ്രായേലിന്റെ യുദ്ധത്തിന് പിന്തുണ നൽകിയ കമ്പനികൾക്കെതിരായ വ്യാപകമായ പ്രചാരണങ്ങളുടെയും ഫലമായാണ് അടച്ചുപൂട്ടലെന്ന് വ്യക്തമാണ്.
ഇസ്റാഈല് കമ്പനികളായ ഇലക്ട്ര കൺസ്യൂമർ പ്രൊഡക്ട്സും അതിന്റെ അനുബന്ധ സ്ഥാപനമായ യെനോട്ട് ബിറ്റാനുമായി 2022-ൽ ഫ്രാഞ്ചൈസി (Franchise) കരാർ ഒപ്പിട്ടതുമുതൽ കാരിഫോർ ബി.ഡി.എസിന്റെ പ്രധാന ലക്ഷ്യമാണ്. ഗസ്സയിൽ കൂട്ടക്കൊല നടത്തിവരുന്ന സയണിസ്റ്റ് സൈനികർക്ക് കാരിഫോർ സമ്മാനപൊതികൾ കൊടുത്തയച്ചത് വലിയ വിവാദമായിരുന്നു. കമ്പനി സൈനികർക്കായി സംഭാവന പിരിക്കാനും തുടങ്ങിയതോടെയാണ് ബഹിഷ്കരണം ശക്തിപ്പെട്ടത്. ഫലസ്തീനിൽ ഇസ്റാഈൽ തുടരുന്നത് നിയമവിരുദ്ധമാണെന്നും അതിന് പിന്തുണ നൽകുന്നത് തടയണമെന്നും ഹേഗ് ആസ്ഥാനമായ അന്താരാഷ്ട്ര കോടതി കഴിഞ്ഞ വർഷം ഉത്തരവിറക്കിയിരുന്നു. ഈ സാഹചര്യത്തിൽ, അധിനിവേശ സൈന്യത്തിന് നൽകുന്ന ഓരോ സഹായവും അന്താരാഷ്ട്ര നിയമങ്ങളുടെ ലംഘനമാണെന്ന് ചൂണ്ടിക്കാട്ടിയാണ് കാരിഫോറിനെ ബഹിഷ്കരിക്കേണ്ട കമ്പനികളുടെ പട്ടികയിൽ ബി.ഡി.എസ് ഉൾപ്പെടുത്തിയത്.
ഈ ബഹിഷ്കരണ സമരത്തെക്കുറിച്ച് നിങ്ങൾ എന്താണ് കരുതുന്നത്? താഴെ കമൻ്റ് ചെയ്യുക.
Article Summary: Boycott movement leads to closure of Carrefour branches.
#Carrefour #Boycott #BDS #Palestine #News #Gulf News
