400 ഡോളറിന് വാങ്ങിയ വാച്ച് വിറ്റത് 6000-ത്തിന്! സ്വാച്ച്-എപി വാച്ച് വാങ്ങാൻ സ്റ്റോറുകൾക്ക് മുന്നിൽ വൻ തിരക്ക്; നിയന്ത്രിക്കാന്‍ പോലീസ് കണ്ണീർവാതകം പ്രയോഗിച്ചു

ന്യൂഡെല്‍ഹി (KasargodVartha) സ്വിസ് വാച്ച് നിർമാതാക്കളായ 'സ്വാച്ച്' ലക്ഷ്വറി ബ്രാൻഡായ ഒഡെമാർ പിഗെയുമായി (എപി) ചേർന്ന് പുറത്തിറക്കിയ പുതിയൊരു ലിമിറ്റഡ് എഡിഷൻ പോക്കറ്റ് വാച്ചാണ് ഇപ്പോഴത്തെ സംസാര വിഷയം. ആദ്യദിനം തന്നെ വാച്ചു വാങ്ങാൻ ഉപഭോക്താക്കൾ തിരക്കിട്ടപ്പോൾ ഇന്ത്യയിലടക്കം സ്റ്റോറുകൾ അടച്ചിടേണ്ടി വന്നു. പാരിസ് പോലുള്ള സ്ഥലങ്ങളിൽ പോലീസ് കണ്ണീർവാതകം പ്രയോഗിച്ചാണ് തിരക്ക് നിയന്ത്രിച്ചത്.

സ്വാച്ച്-എപി കൂട്ടുകെട്ടിൽ പിറന്ന 'റോയൽ പോപ്പ്' കലക്ഷൻ വാച്ചുകളാണ് ഇത്രയും കുഴപ്പക്കാരനായി മാറിയത്. പുതുതലമുറയ്ക്കിടയിൽ ട്രെൻഡായ 'ഡ്രോപ് കൾച്ചർ' എന്ന മാർക്കറ്റിങ് തന്ത്രമാണ് ഇവിടെ ബ്രാൻഡുകൾ ഉപയോഗിച്ചത്.

ലോകത്തിലെ വിവിധ ഭാഗങ്ങളിലെ തിരഞ്ഞെടുത്ത സ്റ്റോറുകളിൽ 2026 മേയ് 16 ശനിയാഴ്ചയാണ് റോയൽ പോപ്പ് വാച്ചുകൾ വിൽപനയ്ക്കെത്തിയത്.

എട്ട് മോഡലുകൾ വിപണിയിൽ

സാധാരണ 25 ലക്ഷം രൂപ വരെ വിലവരുന്ന എപി വാച്ചുകൾ 400 ഡോളറിന് ലഭിക്കുമെന്ന അറിയിപ്പ് വന്നതോടെ ആളുകൾ തലേദിവസം തന്നെ സ്റ്റോറുകൾക്ക് മുന്നിൽ സ്ഥാനം പിടിച്ചു. എട്ട് മോഡലുകളാണ് കമ്പനി വിപണിയിലെത്തിച്ചത്. ഇതിൽ ഒരെണ്ണം മാത്രമാണ് ഒരാൾക്ക് വാങ്ങാൻ കഴിയുക. ഓൺലൈൻ വഴി പ്രചാരണം കൊടുത്തെങ്കിലും ഓഫ്‌ലൈനായി സ്റ്റോറുകളിലൂടെ മാത്രമേ വിറ്റിരുന്നുള്ളൂ. ആഴ്ചകളോളം നീണ്ടുനിന്ന ക്യാംപെയ്നിലൂടെ ഹൈപ്പുണ്ടാക്കാൻ ബ്രാൻഡിന് കഴിഞ്ഞെങ്കിലും തിരക്ക് വർധിച്ചതോടെ കാര്യങ്ങൾ കൈവിട്ടുപോവുകയായിരുന്നു.

തിരക്ക് നിയന്ത്രിക്കാൻ കഴിയാതെ വന്നതോടെ ബെംഗളൂരു, മുംബൈ, ഡൽഹി, ദുബായ് തുടങ്ങി ലോകത്തിൻ്റെ വിവിധ ഭാഗങ്ങളിൽ വാച്ചിൻ്റെ വിൽപ്പന മണിക്കൂറുകളോളം തടസ്സപ്പെട്ടു. പലയിടങ്ങളിലും പോലീസെത്തിയാണ് തിരക്ക് നിയന്ത്രിച്ചത്. ചില സ്റ്റോറുകൾ സുരക്ഷാ കാരണങ്ങളാൽ അടച്ചിടേണ്ടി വന്നു. മണിക്കൂറുകൾ കാത്തുനിന്ന ശേഷം വാച്ച് കിട്ടാതെ മടങ്ങിയവരും ഏറെയാണ്.

ഇന്ത്യയിലെ വിൽപ്പന സ്വാച്ചിന് നീട്ടിവെയ്ക്കേണ്ടിയും വന്നു. 'ഉപഭോക്താക്കളുടെയും ജീവനക്കാരുടെയും സുരക്ഷ കണക്കിലെടുത്ത് റോയൽ പോപ്പിൻ്റെ ലോഞ്ച് നീട്ടിവെയ്ക്കുന്നു' എന്നൊരു അറിയിപ്പും നൽകി.

വിമർശനം

മതിയായ മുന്നൊരുക്കങ്ങളില്ലാതെയാണ് ബ്രാൻഡ് ഇത്തരമൊരു വിൽപ്പനയ്ക്ക് തയ്യാറായതെന്ന വിമർശനവും പല കോണിൽ നിന്നുമുയർന്നു. എന്നാൽ മുന്നൊരുക്കങ്ങൾ നടത്തിയിരുന്നെന്നാണ് സ്വാച്ചിൻ്റെ വിശദീകരണം. ലോകത്തെ 220 സ്റ്റോറുകളിലാണ് ലോഞ്ച് നിശ്ചയിച്ചിരുന്നത്. ഇതിൽ 20 എണ്ണത്തിൽ മാത്രമാണ് തടസ്സങ്ങൾ നേരിട്ടത്. റോയൽ പോപ്പ് വാച്ചുകൾ സ്റ്റോറുകളിൽ കൂടുതൽ കാലത്തേക്ക് ലഭ്യമാകുമെന്നും സ്വാച്ച് പറയുന്നു.

400-ന് വാങ്ങിയാൽ 1000-ത്തിന് വിൽക്കാം

വാച്ച് വാങ്ങാൻ തിരക്കുകൂട്ടിയതിൽ കൂടുതൽ പേരും ഇതിൻ്റെ ആരാധകർ ആയിരുന്നെങ്കിലും അവസരം മുതലാക്കി പണമുണ്ടാക്കിയവരും ഏറെയാണ്. 400 ഡോളറിന് വാങ്ങിയ വാച്ച് ഓൺലൈൻ വിപണികളിൽ ഇരട്ടി വില നൽകി വാങ്ങാനും ആളുണ്ടായിരുന്നു. 1000 ഡോളർ വരെ വില ലഭിച്ചവരുണ്ടെന്നും റിപ്പോർട്ടുകൾ പറയുന്നു. ചില ഓൺലൈൻ സൈറ്റുകളിൽ 6000 ഡോളർ വരെ വാച്ചിന് വില ലഭിച്ചെന്നും വിവരമുണ്ട്. റോയൽ പോപ്പ് കലക്ഷനിലെ എട്ട് വാച്ചുകളുടെ ഒരു സെറ്റിന് 'സ്റ്റോക്ക്എക്സ്' എന്ന റീസെയിൽ പ്ലാറ്റ്ഫോമിൽ 25,000 ഡോളറായിരുന്നു വില.

എന്താണ് ഡ്രോപ് കൾച്ചർ?

കുറഞ്ഞ സമയത്തേക്ക് മാത്രം ലഭ്യമാകുന്ന തരത്തിൽ ബ്രാൻഡുകൾ അവരുടെ ലിമിറ്റഡ് എഡിഷൻ ഉൽപ്പന്നങ്ങൾ വിപണിയിലെത്തിക്കുന്ന മാർക്കറ്റിങ് തന്ത്രമാണ് ഡ്രോപ് കൾച്ചർ. ഉപഭോക്താക്കൾക്കിടയിൽ ഉണ്ടാകുന്ന ഹൈപ്പ് മുതലെടുത്ത് ബ്രാൻഡുകൾക്ക് കൂടുതൽ വിൽപ്പന നേടാനാകുമെന്നതാണ് പ്രത്യേകത. മറ്റ് ബ്രാൻഡുകളുമായി സഹകരിച്ചും കമ്പനികൾ ഉൽപ്പന്നങ്ങൾ വിപണിയിലെത്തിക്കാറുണ്ട്. തൊണ്ണൂറുകളിൽ ജാപ്പനീസ് സ്ട്രീറ്റ്‌വെയർ ബ്രാൻഡായ ഗുഡ്‌ഇനഫ്‌ ആണ് ആദ്യമായി ഡ്രോപ് മാർക്കറ്റിങ് രീതി പരീക്ഷിച്ചത്. പിന്നീട് ഈ ട്രെൻഡ് ലോകത്തിൻ്റെ പല ഭാഗങ്ങളിലേക്കും പടർന്നു. ലബുബു പാവകളും നൈക്കി ട്രെയിനേഴ്സ് ഷൂവുമൊക്കെ ഹിറ്റായതിന് പിന്നിലും ഡ്രോപ്പിൻ്റെ പിന്തുണയുണ്ട്.

ഈ വാർത്ത നിങ്ങളുടെ വാട്സ്ആപ്പ് ഗ്രൂപ്പുകളിൽ സുഹൃത്തുക്കൾക്കും കുടുംബാംഗങ്ങൾക്കും ഷെയർ ചെയ്യൂ. പുതിയ അപ്ഡേറ്റുകൾ അറിയാൻ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. ഈ വിഷയത്തെക്കുറിച്ചുള്ള നിങ്ങളുടെ അഭിപ്രായങ്ങൾ ഫേസ്ബുക്ക് പേജില്‍ ഈ വാര്‍ത്തയുടെ താഴെ കമൻ്റായി രേഖപ്പെടുത്തുക.

Article Summary: Swatch and Audemars Piguet's limited edition 'Royal Pop' pocket watch launch caused chaotic scenes and long queues worldwide, forcing store closures and police intervention, with the $400 watches later reselling for up to $6,000 online.

#Swatch #AudemarsPiguet #RoyalPopWatch #DropCulture #LuxuryWatches #WatchResale