വിവാദങ്ങൾക്കൊടുവിൽ ഷെയ്ൻ നിഗം ചിത്രം 'ഹാൽ' വ്യാഴാഴ്ച തീയേറ്ററുകളിലേക്ക്

കൊച്ചി: (KasargodVartha) സെൻസർ ബോർഡിന്റെ കടുത്ത ഇടപെടലുകൾ കാരണം നിയമപോരാട്ടം നേരിടേണ്ടി വന്ന ഷെയ്ൻ നിഗം നായകനാകുന്ന 'ഹാൽ' സിനിമ വ്യാഴാഴ്ച മുതൽ തിയേറ്ററുകളിലെത്തും. സെൻസർ ബോർഡിന്റെയും കത്തോലിക്കാ കോൺഗ്രസിന്റെയും അപ്പീലുകൾ തള്ളിയാണ് ഹൈകോടതി കഴിഞ്ഞ ആഴ്ച ചിത്രത്തിന് പ്രദർശനാനുമതി നൽകിയത്. മുസ്ലിം യുവാവും ക്രിസ്ത്യൻ യുവതിയും തമ്മിലുള്ള പ്രണയമാണ് ഈ സിനിമയുടെ ഇതിവൃത്തം.

ചിത്രം ലവ് ജിഹാദിനെ തെറ്റിദ്ധരിപ്പിക്കുന്ന വിധത്തിലാണെന്നും ഒരു പ്രത്യേക മതത്തെ വ്രണപ്പെടുത്തുന്ന രീതിയിലാണെന്നും സെൻസർ ബോർഡ് മുൻപ് ചൂണ്ടിക്കാട്ടിയിരുന്നു. ചിത്രം മതപരിവർത്തനത്തെ ന്യായീകരിക്കുന്നതാണെന്ന് ആരോപിച്ച് കത്തോലിക്കാ കോൺഗ്രസും ഈ കേസിൽ കക്ഷി ചേർന്നിരുന്നു. 

എന്നാൽ ഹൈക്കോടതി ഈ വാദങ്ങളെല്ലാം തള്ളുകയായിരുന്നു. സിനിമയിലെ കഥാപാത്രങ്ങൾ വ്യത്യസ്ത വേഷം ധരിച്ചുവരുന്നതിനെ മതപരമായി കാണാനാവുന്നത് എങ്ങനെയാണെന്നും മതസ്ഥാപനത്തിന്റെ പേര് പ്രദർശിപ്പിച്ചു എന്നതുകൊണ്ട് എന്താണ് കുഴപ്പമെന്നും വാദത്തിനിടെ കോടതി ആരാഞ്ഞു.

സിനിമയിലെ ചില രംഗങ്ങൾ പൊതുക്രമത്തിന് വിരുദ്ധവും ആശങ്കപ്പെടുത്തുന്നതുമാണെന്നായിരുന്നു സെൻസർ ബോർഡിന്റെ വാദം. സെൻസർ ബോർഡ് നിർദ്ദേശിച്ച 15-ഓളം മാറ്റങ്ങൾ സിനിമയുടെ കഥാഗതിയെ തന്നെ ബാധിക്കുമെന്ന് ചൂണ്ടിക്കാട്ടിയാണ് നിർമ്മാതാവ് ജൂബി തോമസും സംവിധായകൻ മുഹമ്മദ് റഫീഖും കോടതിയെ സമീപിച്ചത്. സിനിമയിലെ ബീഫ് ബിരിയാണി കഴിക്കുന്ന രംഗങ്ങൾ ഒഴിവാക്കാൻ തയ്യാറാണെന്ന് അണിയറപ്രവർത്തകർ കോടതിയെ അറിയിച്ചിരുന്നു.

വിശദമായ വാദത്തിനിടെ ഹൈകോടതി ഡിവിഷൻ ബെഞ്ചിലെ ജഡ്ജിമാർ സിനിമ കാണുകയുണ്ടായി. സിനിമയിലെ പ്രമേയം ഭരണഘടനാപരമാണെന്ന് വ്യക്തമാക്കിയാണ് ഹൈകോടതി സെൻസർ ബോർഡിന്റെയും കത്തോലിക്കാ കോൺഗ്രസിന്റെയും അപ്പീലുകൾ തള്ളി ചിത്രത്തിന് പ്രദർശനാനുമതി നൽകിയത്.

ഷെയ്ൻ നിഗം ചിത്രത്തിന്റെ റിലീസ് വാർത്ത സുഹൃത്തുക്കളിലേക്ക് എത്തിക്കൂ. നിങ്ങളുടെ അഭിപ്രായം താഴെ രേഖപ്പെടുത്തു.

Article Summary: Shane Nigam's movie 'Haal' cleared for release this Thursday after High Court dismissed Censor Board objections.

#ShaneNigam #HaalMovie #HighCourt #MalayalamCinema #CensorBoard #MovieRelease