Controversy | ഹേമ കമ്മിറ്റി റിപ്പോര്ട്ട് സ്വാഗതാര്ഹം; സിനിമയില് ഒരു ശുദ്ധീകരണം ആവശ്യമാണ്; താന് ഒളിച്ചോടിയിട്ടില്ലെന്നും നടന് മോഹന്ലാല്
തിരുവനന്തപുരം: (KasargodVartha) ഹേമ കമ്മിറ്റി റിപ്പോര്ട്ടും തുടര്ന്നുണ്ടായ വിവാദങ്ങളും സംബന്ധിച്ച് മാധ്യമങ്ങള്ക്ക് മുന്നില് ആദ്യമായി പ്രതികരിച്ച് മോഹന്ലാല്. താന് ഒളിച്ചോടിയിട്ടില്ലെന്നും കേരളത്തില് ഇല്ലായിരുന്നുവെന്നും അദ്ദേഹം വ്യക്തമാക്കി. ഭാര്യയുടെ ശസ്ത്രക്രിയയുമായി ബന്ധപ്പെട്ട് പുറത്തായിരുന്നുവെന്നും മോഹന്ലാല് പറഞ്ഞു.തെറ്റു ചെയ്തവര് ശിക്ഷിക്കപ്പെടണമെന്നും ഹേമ കമ്മിറ്റി റിപ്പോര്ട്ട് സ്വാഗതാര്ഹമാണെന്നും അദ്ദേഹം കൂട്ടിച്ചേര്ത്തു.
സിനിമ മേഖലയില് ഒരു ശുദ്ധീകരണം ആവശ്യമായ ഘട്ടമാണിതെന്നും മോഹന്ലാല് അഭിപ്രായപ്പെട്ടു. നിലവിലെ വിവാദങ്ങള്ക്ക് ഉത്തരം പറയേണ്ടത് സിനിമാ മേഖല മുഴുവനാണ്. ഒരുമിച്ചാണ് മുന്നോട്ട് നീങ്ങേണ്ടത്. എല്ലാത്തിനും എ എം എ എ അല്ല ഉത്തരം പറയേണ്ടതെന്നും മോഹന്ലാല് കൂട്ടിച്ചേര്ത്തു. അതിലേക്ക് ഏറ്റവും കൂടുതല് ശരങ്ങള് വന്നത് എന്നിലേക്കും കൂടെയുള്ളവരിലേക്കുമാണ്. മാറി നില്ക്കാമെന്നത് കൂടിയാലോചിച്ചെടുത്ത തീരുമാനമാണ്. ക്ഷേമ പ്രവര്ത്തനങ്ങളുമായി മുന്നോട്ട് പോകും.
കഷ്ടപ്പെട്ട് മുന്നോട്ട് പോകുന്ന മേഖലയാണ്. ഹേമ കമ്മിറ്റി റിപ്പോര്ട്ടിന് സമാനമായ റിപ്പോര്ട്ട് എല്ലാ മേഖലയിലും വരണം. സിനിമാ മേഖല തകര്ന്നാല് ഒരുപാടുപേര് നിസ്സഹായരായി നോക്കിനില്ക്കേണ്ടിവരും. ജൂനിയര് ആര്ട്ടിസ്റ്റുകള്ക്ക് സംഘടന വേണം. നിയമനിര്മ്മാണം ഉണ്ടാക്കണം. ഇത്തരം കാര്യങ്ങളില് തളര്ന്നുപോകുന്നവരാണ് കലാകാരന്മാര്. ആര് സംസാരിച്ചു സംസാരിച്ചില്ലാ എന്നതല്ല. ഈ വ്യവസായം തകര്ന്നുപോകരുത്. എനിക്ക് പറയാനുള്ളത് ഇതൊക്കെയാണ്.
1978-ലാണ് ആദ്യമായി അഭിനയിക്കുന്നത്. തിരുവനന്തപുരത്തെ വീടിന്റെ മുന്നിലാണ്. അതേ തിരുവനന്തപുരത്ത് വെച്ച് ഞാന് ഉള്പ്പെടുന്ന മേഖലയുടെ ദൗര്ഭാഗ്യകരമായ കാര്യത്തെക്കുറിച്ച് സംസാരിക്കേണ്ടി വരുന്നതില് വിഷമം ഉണ്ട്. എന്റെ ശരിയും യുക്തിയും ബുദ്ധിയിലുമാണ് ഞാന് സംസാരിക്കുന്നത്. മോഹന്ലാല് ഒളിച്ചോടിയിട്ടില്ല. കേരളത്തില് ഇല്ലായിരുന്നു. ഭാര്യയുടെ സര്ജറിയുമായി ബന്ധപ്പെട്ട് പുറത്തായിരുന്നു.
സിനിമ സമൂഹത്തിന്റെ ഭാഗം. മറ്റെല്ലാ ഭാഗത്തും സംഭവിക്കുന്നത് സിനിമയിലും സംഭവിക്കുന്നു. ഇത്തരം കാര്യങ്ങളെ പ്രോത്സാഹിപ്പിക്കുന്നതല്ല. ഹേമാ കമ്മിറ്റി റിപ്പോര്ട്ട് സ്വാഗതാര്ഹം. രണ്ട് തവണ കമ്മിറ്റിയുടെ മുന്നില് പോയിട്ടുണ്ട്. എന്റെ ശരികള് പറഞ്ഞു. മൊത്തം സിനിമയെക്കുറിച്ചാണ് ചോദിച്ചത്. അതിനെപ്പറ്റി പറയാന് പറ്റില്ല. അറിയുന്ന കാര്യങ്ങള് പറഞ്ഞു. 'അമ്മ' എന്നത് ട്രേഡ് യൂണിയന് സ്വഭാവമുള്ള അസോസിയേഷന് അല്ല. കുടുംബം പോലെയാണ്. അവരുടെ ക്ഷേമത്തിന് വേണ്ടി പ്രവര്ത്തിക്കുന്നു. പ്രസിഡന്റ് സ്ഥാനം ഏറ്റെടുക്കാനുള്ള വൈമുഖ്യം അറിയിച്ചിരുന്നു. നിലവിലെ വിവാദങ്ങള്ക്ക് ഉത്തരം പറയേണ്ടത് സിനിമാ മേഖല മുഴുവനാണെന്നും മോഹന്ലാല് പറഞ്ഞു.
കേരള പോലീസിന്റെ കാര്യം അവരാണ് നോക്കേണ്ടത്. ഞാനല്ല. എന്റെ കൈയ്യില് നില്ക്കുന്ന കാര്യമല്ല. കോടതിയിലിരിക്കുന്ന കാര്യമാണ്. അതില് അന്വേഷണം വേണം. അതില് കൂടുതലുള്ള കാര്യങ്ങള് പറയാന് ഇല്ല. ഇനി ഇത്തരം കാര്യങ്ങള് സംഭവിക്കാതിരിക്കാന് ശ്രമിക്കാം. ഒരു ദിവസംകൊണ്ട് താരങ്ങള് എങ്ങനെയാണ് മാധ്യങ്ങള്ക്ക് അന്യരായത്. ഒരു ശുദ്ധീകരണം ആവശ്യമായ ഘട്ടമല്ലേ, ഞങ്ങള് സഹകരിക്കും.
കേരള ക്രിക്കറ്റ് ലീഗ് ലോഞ്ചിനുശേഷമാണ് മോഹന്ലാല് മാധ്യമങ്ങളെ കണ്ടത്. ഹേമ കമ്മിറ്റി റിപ്പോര്ട്ട് പുറത്തുവന്ന ശേഷം ഇത് ആദ്യമായാണ് മോഹന്ലാല് മാധ്യമങ്ങളെ കണ്ടത്. റിപ്പോര്ട്ട് പുറത്തുവന്നശേഷം മോഹന്ലാലിന്റെ ആദ്യ പൊതുപരിപാടി കൂടിയായിരുന്നു തിരുവനന്തപുരത്ത് നടന്നത്.
#mohanlal #hemacommittee #malayalamcinema #amma #controversy
