പുതിയ ജന്മദിനം, പുതിയ തുടക്കം; മമ്മൂട്ടിയുടെ തിരിച്ചുവരവിന് ആവേശം

തിരുവനന്തപുരം: (KasargodVartha) തന്റെ 74-ാം പിറന്നാൾ ദിനത്തിൽ ആശംസകൾ നേർന്ന എല്ലാവർക്കും നന്ദി അറിയിച്ച് നടൻ മമ്മൂട്ടി. ‘എല്ലാവർക്കും എൻ്റെ സ്നേഹവും നന്ദിയും, സർവശക്തനും നന്ദി’ എന്നാണ് അദ്ദേഹം സോഷ്യൽ മീഡിയയിൽ കുറിച്ചത്. 

ഇത്തവണ ചെന്നൈയിലെ വീട്ടിൽ കുടുംബാംഗങ്ങളോടൊപ്പം വളരെ ലളിതമായാണ് താരത്തിൻ്റെ പിറന്നാൾ ആഘോഷം നടന്നത്. അടുത്തിടെ ആരോഗ്യപരമായ ചില ബുദ്ധിമുട്ടുകളെ തുടർന്ന് പൊതുവേദികളിൽ നിന്നും സിനിമാ തിരക്കുകളിൽ നിന്നും വിട്ടുനിന്ന മമ്മൂട്ടി പൂർണ്ണ ആരോഗ്യവാനായി സിനിമയിലേക്ക് തിരിച്ച് വരാൻ ഒരുങ്ങുകയാണ്. ഈ തിരിച്ചുവരവിന് മുന്നോടിയായുള്ള ഈ പിറന്നാളിന് ഇരട്ടി മധുരമാണെന്ന് അദ്ദേഹത്തിൻ്റെ അടുത്ത സുഹൃത്തുക്കളും സഹപ്രവർത്തകരും പറയുന്നു.

ജോൺ ബ്രിട്ടാസ് എംപി, മമ്മൂട്ടിയുടെ പിറന്നാളിനെ 'പുനർജന്മദിനം' എന്നാണ് വിശേഷിപ്പിച്ചത്. ‘ഈ ജന്മദിനത്തിന് ഒരു പ്രത്യേകതയുണ്ട്. ഇതൊരു birthday അല്ല, Rebirth day ആണ്. ഒരു പോരാട്ടത്തിൽ വിജയം നേടിയ ശേഷമുള്ള ആദ്യ ജന്മദിനം’ - ബ്രിട്ടാസ് തൻ്റെ ഫേസ്ബുക്കിൽ കുറിച്ചു. 

ഇതിനുപിന്നാലെ, മമ്മൂട്ടിയുടെ ആരോഗ്യപരമായ തിരിച്ചുവരവിനായി പ്രാർത്ഥിച്ചവർക്ക് നന്ദി പറഞ്ഞ് നിർമ്മാതാവ് ആൻ്റോ ജോസഫും രംഗത്തെത്തി. ‘ലോകമെമ്പാടുമുള്ള ഒരുപാട് പേരുടെ പ്രാർത്ഥനയ്ക്ക് ഫലം കണ്ടു’ എന്ന അദ്ദേഹത്തിൻ്റെ കുറിപ്പ് ആരാധകർ ഏറ്റെടുത്തു.

സോഷ്യൽ മീഡിയയിൽ ഉൾപ്പെടെ ആയിരക്കണക്കിന് ആളുകളാണ് മമ്മൂട്ടിക്ക് ആശംസകൾ നേർന്നത്. മെഗാസ്റ്റാറിൻ്റെ പുതിയ സിനിമകൾക്കായി ആകാംഷയോടെ കാത്തിരിക്കുകയാണ് ആരാധകർ.

മെഗാസ്റ്റാറിന് പിറന്നാൾ ആശംസകൾ നേരാൻ മറക്കരുത്. നിങ്ങളുടെ പ്രിയപ്പെട്ട മമ്മൂട്ടി ചിത്രം കമന്റ് ചെയ്യൂ.

Article Summary: Mammootty celebrates 74th birthday, thanks fans, and prepares for a comeback.

#Mammootty #MammoottyBirthday #Kerala #MalayalamCinema #Mollywood #HappyBirthdayMammootty