'കേസിൽ പ്രതിയായതുകൊണ്ട് വിദേശയാത്രാ അവകാശം ഇല്ലാതാകുന്നില്ല'; റാപ്പർ വേടന് പ്രത്യേക പിസിസി നൽകാൻ ഉത്തരവിട്ട് ഹൈകോടതി

കൊച്ചി: (KasargodVartha) സംഗീത പരിപാടികൾ അവതരിപ്പിക്കുന്നതിനായി യുകെയിലേക്കും അയർലൻഡിലേക്കും പോകുന്ന റാപ്പർ ഹിരൺ ദാസ് മുരളിക്ക് (വേടൻ) പ്രത്യേക പോലീസ് ക്ലിയറൻസ് സർട്ടിഫിക്കറ്റ് നൽകാൻ ഹൈകോടതി നിർദേശം. കേസ് വിവരങ്ങളും കോടതി ഉത്തരവും പരിശോധിച്ച് പ്രത്യേക പിസിസി നൽകാൻ റീജനൽ പാസ്പോർട്ട് ഓഫീസറോടാണ് കോടതി നിർദേശിച്ചത്. നിലവില്‍ രണ്ട് ലൈംഗികാതിക്രമ കേസുകളിലും ലഹരിമരുന്ന് കേസിലും പ്രതിയാണ് വേടന്‍.

പ്രത്യേക പിസിസി നൽകാൻ നിർദേശം

വിവിധ കേസുകളിൽ പ്രതിയായതിനാൽ പിസിസി അനുവദിക്കാത്തതിനെ ചോദ്യം ചെയ്താണ് വേടൻ ഹൈകോടതിയെ സമീപിച്ചത്. കേസുകളിൽ പ്രതിയാണെന്ന് ചൂണ്ടിക്കാണിച്ച് പ്രതികൂലമായ പോലീസ് വെരിഫിക്കേഷൻ റിപ്പോർട്ടാണ് ലഭിച്ചതെന്നും അതിനാൽ പ്രത്യേക പിസിസി മാത്രമേ അനുവദിക്കാനാകൂവെന്നും കേന്ദ്ര സർക്കാർ കോടതിയെ അറിയിച്ചു. ക്രിമിനൽ കേസ് നിലവിലുള്ള ഒരാൾക്ക്, കേസ് പരിഗണിക്കുന്ന കോടതിയുടെ അനുമതിയോടെ വിദേശത്തേക്ക് പോകാൻ അർഹതയുണ്ടെന്ന മുൻ ഉത്തരവും ഹൈകോടതി ഇതിനൊപ്പം പരിഗണിച്ചു. തുടർന്നാണ് രണ്ടാഴ്ചയ്ക്കുള്ളിൽ പ്രത്യേക പിസിസി അനുവദിക്കാൻ ജസ്റ്റിസ് മുരളി പുരുഷോത്തമൻ നിർദേശിച്ചത്.

വിചാരണക്കോടതിയുടെ അനുമതി നിർബന്ധം

അതേസമയം, പ്രത്യേക പിസിസി ലഭിച്ചാലും ബന്ധപ്പെട്ട കോടതിയുടെ അനുമതി നേടിയ ശേഷമേ രാജ്യം വിട്ടുപോകാവൂ എന്നും ഹൈകോടതി നിർദേശിച്ചിട്ടുണ്ട്. ക്രിമിനൽ കേസിൽ പ്രതിയായതുകൊണ്ട് മാത്രം ഒരാൾക്ക് വിദേശ യാത്രയ്ക്കുള്ള അവകാശം പൂർണമായി ഇല്ലാതാകുന്നില്ലെന്ന് കോടതി നിരീക്ഷിച്ചു.

കൂടുതല്‍ വാർത്തകളും വിശേഷങ്ങളും അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് കമൻ്റായി രേഖപ്പെടുത്തുക. 

Article Summary: High Court directs passport officer to issue special PCC to rapper Vedan for UK and Ireland tour.

#KeralaHighCourt #RapperVedan #PCC #LegalNewsKerala #KochiNews #MalayalamNews #UKTour #RenuNews