കരളു കാക്കാന്‍ യുവ ജാഗ്രതാ യാത്ര; ഉദ്ഘാടനം ചൊവ്വാഴ്ച

കാസര്‍കോട്: സംസ്ഥാന യുവജനക്ഷേമ ബോര്‍ഡ്, ജില്ലാ യുവജന കേന്ദ്രം എന്നിവയുടെ ആഭിമുഖ്യത്തില്‍ സംസ്ഥാന വ്യാപകമായി നടത്തിവരുന്ന 'കേരളത്തിന്റെ കരളു കാക്കാന്‍ നാടകക്കൂട്ടം' യുവ ജാഗ്രതാ യാത്രയുടെ ജില്ലാതല ഉദ്ഘാടനം ചൊവ്വാഴ്ച ഉച്ചയ്ക്ക് 2.30 ന് കാസര്‍കോട് ഗവ.കോളജില്‍ നടക്കും. ജില്ലാ പോലീസ് ചീഫ് തോംസണ്‍ ജോസ് ഉദ്ഘാടനം നിര്‍വഹിക്കും.

യാത്ര തിങ്കളാഴ്ച മഞ്ചേശ്വരം ഗോവിന്ദ പൈ കോളജില്‍ നിന്നും പ്രയാണം ആരംഭിച്ചു. 10 ന് കാഞ്ഞങ്ങാട് നെഹ്‌റു കോളജില്‍ സമാപിക്കും. അഞ്ചു ദിവസങ്ങളിലായി 20 ഓളം വേദികളില്‍ ലഹരി വിരുദ്ധ ബോധവല്‍ക്കരണ പരിപാടികള്‍ സംഘടിപ്പിക്കും. നിരവധി കലാകാരന്‍മാര്‍ ജാഥയില്‍ അണിനിരക്കും.

കാസര്‍കോട് ഗവ.കോളജിലെ എന്‍.എസ്.എസ് പ്രോഗ്രാം ഓഫീസര്‍ മുഹമ്മദലിയുടെ നേതൃത്വത്തില്‍ എന്‍.എസ്.എസ് യൂണിറ്റിലെ 16 അംഗങ്ങളാണ് കലാജാഥ നയിക്കുന്നത്. ഒരു
മണിക്കൂര്‍ ദൈര്‍ഘ്യമുള്ള സിനിമയും ഇതോടൊപ്പം പ്രദര്‍ശിപ്പിക്കും. ഓടുന്ന സിനിമാ വണ്ടി ജാഥയെ അനുഗമിക്കും.


സ്‌കൂളുകളും കോളജുകളും പ്രധാനപ്പെട്ട കവലകളും പരിപാടി അവതരിപ്പിക്കുന്ന കേന്ദ്രങ്ങളായിരിക്കും. രാവിലെ എട്ടുമണിക്ക് ആരംഭിക്കുന്ന യാത്ര രാത്രി എട്ടുമണിവരെ നീണ്ടുനില്‍ക്കും. വാര്‍ത്താസമ്മേളനത്തില്‍ യുവജന ക്ഷേമ ബോര്‍ഡ് ജില്ലാ യൂത്ത് പ്രോഗ്രാം ഓഫീസര്‍ രഞ്ജിത്ത് മാമ്പ്രത്ത്, പ്രൊഫ.മുഹമ്മദലി, പ്രൊഫ.എ.ശ്രീനാഥ്, എന്‍.പ്രശാന്ത് എന്നിവര്‍ സംബന്ധിച്ചു.