മാലിക് ദീനാർ കൾചറൽ ഫോറത്തിന്റെ ത്വാഹിറുൽ അഹ്ദൽ അവാർഡ് സി എൻ അബ്ദുൽ ഖാദർ മാസ്റ്റർക്ക്; മാർച് 13ന് കാന്തപുരം എ പി അബൂബകർ മുസ്ലിയാർ സമ്മാനിക്കും

       
മാർച് 13 ഞായറാഴ്ച രാത്രി, ത്വാഹിർ തങ്ങൾ ഉറൂസിന്റെ സമാപനത്തിൽ ഇൻഡ്യൻ ഗ്രാൻഡി മുഫ്തി കാന്തപുരം എ പി അബൂബകർ മുസ്ലിയാരാണ് അവാർഡ് സമ്മാനിക്കുന്നത്. മുഹിമ്മാതിന്റെ പ്രാരംഭ പ്രവർത്തനങ്ങളിൽ സയ്യിദ് ത്വാഹിറുൽ അഹ്ദൽ തങ്ങൾക്ക് നൽകിയ പിന്തുണയും ജില്ലയുടെ വിദ്യാഭ്യാസ, സാംസ്കാരിക മേഖലകളിൽ കാഴ്ച വെച്ച പ്രവർത്തനങ്ങളും പരിഗണിച്ചാണ് സി എൻ അബ്ദുൽ ഖാദർ മാസ്റ്ററെ അവാർഡിന് തെരഞ്ഞെടുത്തത്.

പെർള ഷേണിയിൽ സാധാരണ കുടുംബത്തിൽ ജനിച്ച സി എൻ മാസ്റ്റർ കഠിന പ്രയത്നത്തിലൂടെ അധ്യാപന മേഖലയിൽ എത്തുകയും ജില്ലയിലെ വിവിധ സ്കൂളുകളിൽ നീണ്ട 36 വർഷം സേവനമനുഷ്ഠിക്കുകയും ചെയ്തു.

2002 ൽ ഉജാർ ഉളുവാർ സ്കൂൾ പ്രധാന അധ്യാപകനായി വിരമിച്ച ശേഷം മുഹിമ്മാത് സ്കൂൾ മാനജറായും പ്രവർത്തിച്ചു. കേരള മുസ്ലിം ജമാഅത് ജില്ലാ കമിറ്റിയംഗം, കുമ്പള സോൺ വൈസ് പ്രസിഡന്റ്, മുഹിമ്മാത് മഹല്ല്, രിഫാഈ നഗർ മഹല്ല് പ്രസിഡന്റ് തുടങ്ങിയ സ്ഥാനങ്ങൾ വഹിക്കുന്നു. ആദ്യകാലത്ത് അധ്യാപകരുടെ അവകാശ പോരാട്ടത്തിനായി സമരം നയിച്ച് ജയിൽ വാസം അനുഭവിച്ചിട്ടുണ്ട്.