എം പി ഇന്റർനാഷനൽ സ്കൂൾ പത്താം വാർഷിക നിറവിൽ; ഒരു വർഷം നീണ്ടുനിൽക്കുന്ന വിവിധ പരിപാടികളോടെ ആഘോഷങ്ങൾ

കാസർകോട്: (www.kasargodvartha.com 03.02.2022) പെരിയടുക്കയിലെ എം പി ഇന്റർനാഷനൽ സ്കൂളിന്റെ പത്താം വാർഷികം ഒരു വർഷം നീണ്ടു നിൽക്കുന്ന വിവിധ പരിപാടികളിലൂടെ ആഘോഷിക്കുമെന്ന് ഭാരവാഹികൾ വാർത്താസമ്മേളനത്തിൽ അറിയിച്ചു. കേരളത്തിലെ ആദ്യ അമേരികൻ ഇന്റർനാഷനൽ സ്കൂൾ കൂടിയാണിത്.

 

2019 ൽ അമേരികൻ ബോർഡായ നോർത്- വെസ്റ്റ് അക്രെഡിറ്റേഷൻ കമീഷന്റെ അഫിലിയേഷനും 2021-ൽ കേരള സംസ്ഥാന സർകരിന്റെ അംഗീകാരവും സി ബി എസ് ഇ അഫിലിയേഷനും ലഭിച്ചു. നിലവിൽ സ്കൂളിൽ പ്ലസ് വൺ ബാചും പ്രവർത്തിക്കുന്നു. ചുരുങ്ങിയ കാലയളവിൽ വളരെ മികച്ച പ്രവർത്തനമാണ് സ്കൂൾ കാഴ്ചവെച്ചു വരുന്നത്. അമേരികൻ ആസ്ഥാനമായി പ്രവർത്തിക്കുന്ന കോഗ്നിയ ഗ്ലോബൽ കമീഷന്റെ അക്രഡെറ്റീഷൻ 2021 ൽ ലഭിച്ച സംസ്ഥാനത്തെ ഏക ഇന്റർനാഷനൽ സ്കൂളാണിത്. സോഷ്യൽ റിസർച് സൊസൈറ്റിയുടെ സോഷ്യലി റെസ്പോൻസിബിൾ ഇൻസ്റ്റിറ്റ്യൂട് അവാർഡിന് 2020-ൽ സ്ഥാപനം അർഹത നേടി. കേന്ദ്ര കായിക മന്ത്രാലയത്തിന്റെ കീഴിലുള്ള ഫിറ്റ്‌ ഇൻഡ്യ സ്കൂൾ വീകിന്റെ ഔദ്യോഗിക തുടക്കത്തിന് സംസ്ഥാനത്ത് നിന്നും പ്രസ്തുത സ്കൂളിനെ തെരഞ്ഞെടുത്തിരുന്നു.

കായിക രംഗത്ത് നല്ലൊരു മുന്നേറ്റം കാഴ്ചവെക്കാൻ സ്‌കൂളിനായിട്ടുണ്ട്. കാസർകോട് അത്ലറ്റിക് അസോസിയേഷന്റെ 2019-20, 2020-21 വർഷത്തെ ജില്ലാ അത്ലറ്റിക് ചാമ്പ്യൻഷിപ് നേടാനും 2020-21 വർഷത്തെ ചാംപ്യൻഷിപിന് ആതിഥേയത്വം വഹിക്കാനും സാധിച്ചു. ഈ വർഷം 14 കുട്ടികൾ സംസ്ഥാന അത്ലറ്റിക് ചാംപ്യൻഷിപിൽ പങ്കെടുക്കാൻ അർഹത നേടി.കലാ രംഗങ്ങളിലും സ്കൂളിലെ വിദ്യാർത്ഥികൾ മുദ്രപതിപ്പിച്ചിട്ടുണ്ട്. സാമൂഹിക സേവന പ്രവർത്തനങ്ങൾക്കും സ്കൂൾ ഊന്നൽ നൽകുന്നു. ചെന്നൈ, ഗൂഡല്ലൂർ വെള്ളപ്പൊക്ക റിലീഫ്, റമദാൻ കിറ്റുകൾ, പാവപെട്ടവർക്കുള്ള വീട് നിർമാണം തുടങ്ങി ഒട്ടനവധി സാമൂഹ്യ സേവന രംഗങ്ങളിൽ സ്കൂൾ ഭാഗവാക്കായിരുന്നുവെന്നും ഭാരവാഹികൾ പറഞ്ഞു.

വാർത്താസമ്മേളനത്തിൽ സ്കൂൾ വൈസ് ചെയർമാൻ ശഹീൻ മുഹമ്മദ്‌ ശാഫി, മാനജർ പി എം ശംസുദ്ദീൻ, പ്രിൻസിപൽ ഡോ. അബ്ദുൽ ജലീൽ പി, അബ്ദുൽ നാസർ എം എ, അബ്ദുൽ ഖാദർ തെക്കിൽ, മഹ്‌മൂദ്‌ എരിയാൽ എന്നിവർ സംബന്ധിച്ചു. < !- START disable copy paste -->