സ്റ്റുഡൻ്റ്സ് യാത്രാപാസ് ഓൺലൈനാക്കി; ആപ്പിലെ സെർവർ തകരാർ കാരണം ഫുൾ ടിക്കറ്റെടുത്ത് വിദ്യാർഥികൾ

മുക്കം: (KasargodVartha) സംസ്ഥാനത്ത് യാത്രാപാസ് വിതരണം ഓൺലൈനാക്കിയതോടെ മോട്ടോർ വാഹന വകുപ്പിൻ്റെ ലീഡ്സ് (ലോ എൻഫോഴ്സ്മെൻ്റ് ആൻഡ് ഡാറ്റ സിസ്റ്റം) ആപ്പിൽ കുടുങ്ങി വിദ്യാർഥികളുടെ ബസ് യാത്ര. അധ്യയനവർഷം ആരംഭിച്ച് രണ്ടാഴ്ച പിന്നിട്ടിട്ടും പാസ് ലഭിക്കാത്തതിനാൽ ബസുകളിൽ ഫുൾ ടിക്കറ്റെടുത്ത് യാത്രചെയ്യേണ്ട ഗതികേടിലാണ് അൺഎയ്ഡഡ് സ്ഥാപനങ്ങളിലെ ആയിരക്കണക്കിന് വിദ്യാർഥികൾ. 

ഭീമമായ ഫീസ് നൽകി അൺഎയ്ഡഡ് സ്ഥാപനങ്ങളിൽ പഠിക്കുന്ന വിദ്യാർഥികൾക്കിത് കടുത്ത സാമ്പത്തിക പ്രതിസന്ധിയാണ് സൃഷ്ടിക്കുന്നത്. ത്രൂ സർവീസില്ലാത്ത റൂട്ടുകളിലെ വിദ്യാർഥികളുടെ യാത്രാച്ചെലവ് എട്ടിരട്ടിയാണ് വർധിച്ചിരിക്കുന്നത്.

ആപ്പിലെ സാങ്കേതിക തകരാർ

കഴിഞ്ഞ മാസമാണ് യാത്രാപാസ് വിതരണം ഓൺലൈനാക്കി സ്റ്റേറ്റ് ട്രാൻസ്പോർട്ട് അതോറിറ്റി സർക്കുലർ പുറത്തിറക്കിയത്. പ്ലേസ്റ്റോറിൽ നിന്നും ലീഡ്സ് ആപ്പ് ഡൗൺലോഡ് ചെയ്ത് വിദ്യാർഥികൾ തന്നെ പേരും യാത്രാവിവരങ്ങളും അപ്ലോഡ് ചെയ്യണം. അപേക്ഷകരുടെ പേരുകളടങ്ങിയ പട്ടിക കോളജ് പോർട്ടലിൽ കയറി മേലധികാരി പരിശോധിച്ച് അപ്രൂവൽ നൽകുന്ന മുറയ്ക്ക് സബ് ആർടിഒ ഓഫീസുകളിലെത്തും. 

അധികൃതർ അംഗീകാരം നൽകിയാൽ വിദ്യാർഥികൾക്ക് പാസ് ഡൗൺലോഡ് ചെയ്ത് പ്രിൻ്റടുക്കാം. എന്നാൽ, ആപ്പിൽ കയറി വിവരങ്ങൾ ടൈപ്പ് ചെയ്യാൻ സാധിക്കുന്നുണ്ടെങ്കിലും അവ സബ്മിറ്റ് ചെയ്യാൻ സാധിക്കുന്നില്ലെന്നാണ് പരാതി. സംശയദൂരീകരണത്തിന് മോട്ടോർ വാഹന വകുപ്പ് അധികൃതരെ ബന്ധപ്പെട്ടാൽ കൃത്യമായ മറുപടി ലഭിക്കുന്നില്ലെന്നും വിദ്യാർഥികൾ പറയുന്നു.

സെർവർ തകരാറെന്ന് വിശദീകരണം

സംസ്ഥാനത്തൊട്ടാകെ വിദ്യാർഥികൾ പാസിനായി ആപ്പ് ഉപയോഗിക്കുമ്പോൾ സെർവർ ഡൗൺ ആകുന്നതാകാം പ്രശ്നത്തിന് കാരണമെന്ന് കോഴിക്കോട് ആർടിഒ ജെബി ഐ ചെറിയാൻ പറഞ്ഞു. പുതിയ സംവിധാനം കൊണ്ടുവരുമ്പോഴുള്ള സാങ്കേതിക പ്രശ്നമാണെന്നും ഉടനെ പരിഹരിക്കുമെന്നും അദ്ദേഹം വ്യക്തമാക്കി. 

കഴിഞ്ഞവർഷം വരെ വിദ്യാഭ്യാസ സ്ഥാപനങ്ങളിൽ നിന്നും ലഭിക്കുന്ന അപേക്ഷകളുടെ അടിസ്ഥാനത്തിൽ മോട്ടോർ വാഹന വകുപ്പിൻ്റെ സബ് റീജണൽ ഓഫീസുകളിൽ നിന്നും നേരിട്ടാണ് പാസ് വിതരണം ചെയ്തിരുന്നത്. ഇതിലെ കാലതാമസം ഒഴിവാക്കാനാണ് പാസ് വിതരണം ഓൺലൈനാക്കിയത്. 

കൊടുവള്ളി സബ് ആർടിഒ ഓഫീസ് പരിധിയിൽ നിന്നും ഈ വർഷം 159 പാസുകൾ മാത്രമാണ് ഇതുവരെ വിതരണം ചെയ്തത്. ഓൺലൈനായി ലഭിച്ച അപേക്ഷകൾക്കെല്ലാം അപ്രൂവൽ നൽകിയെന്നാണ് അധികൃതർ നൽകുന്ന വിശദീകരണം.

വിദ്യാർഥികളുടെ യാത്രാപ്രശ്നങ്ങളുമായി ബന്ധപ്പെട്ട ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പ്രാദേശിക വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്തുക.

Article Summary: The online shift for student bus passes via the LEADS app has caused severe delays due to server issues, forcing thousands of students, especially from unaided institutions, to pay full ticket fares.

#StudentBusPass #MVD #KeralaNews #KozhikodeNews #Mukkam #EducationNews #MalayalamNews #AmmuNews