റോൾസ് റോയ്സിനെ വിസ്മയിപ്പിച്ച മലയാളി മിടുക്കി: ഋതുപർണയുടെ വിജയഗാഥ
● മംഗളൂരു സഹ്യാദ്രി എൻജിനീയറിങ് കോളേജ് വിദ്യാർത്ഥിനി.
● റോബോട്ടിക്സ് ആൻഡ് ഓട്ടോമേഷൻ വിഷയത്തിൽ പഠനം.
● കവുങ്ങിൽ കയറുന്ന റോബോട്ട് നിർമ്മിച്ച് പുരസ്കാരം നേടി.
● ഇന്റേൺഷിപ്പിന് അവസരം ചോദിച്ച് സ്വന്തം കഴിവ് തെളിയിച്ചു.
മംഗളൂരു: (KasargodVartha) ബാല്യത്തിൽ കണ്ട ‘ഡോക്ടറാകണം’ എന്ന സ്വപ്നം യാഥാർത്ഥ്യമാകാതെ പോയപ്പോഴും, തളരാതെ കരിയർ പാതയിൽ ഉയരങ്ങൾ കീഴടക്കി കർണാടകയിലെ തീർത്ഥഹള്ളി സ്വദേശിനി കെ.എസ്. ഋതുപർണ റോൾസ് റോയ്സിന്റെ ഭാഗമാകുന്നു.
ലോകത്തിലെ ഏറ്റവും വലിയ പ്രമുഖ എഞ്ചിനീയറിങ് കമ്പനികളിലൊന്നായ റോൾസ് റോയ്സ് ഏവിയേഷൻ വിഭാഗത്തിൽ പ്രതിവർഷം 72.3 ലക്ഷം രൂപ ശമ്പളത്തിലാണ് ഈ 20 വയസ്സുകാരി ജോലി നേടിയത്.
മംഗളൂരിലെ സഹ്യാദ്രി എൻജിനീയറിങ് ആൻഡ് മാനേജ്മെന്റ് കോളജിൽ റോബോട്ടിക്സ് ആൻഡ് ഓട്ടോമേഷൻ വിഷയത്തിൽ ആറാം സെമസ്റ്റർ പഠനം പൂർത്തിയാക്കിയ ഋതുപർണ, റോൾസ് റോയ്സിൽ നിയമനം ലഭിച്ച ഏറ്റവും പ്രായം കുറഞ്ഞ ഇന്ത്യക്കാരി കൂടിയാണ്.
പരീക്ഷകൾക്ക് പിന്നാലെ മാറിയ പ്രതീക്ഷകളും പാതയും
എൽ.കെ.ജി. മുതൽ പി.യു.സി. വരെ മംഗളൂരു സെന്റ് ആഗ്നസ് കോളജിലായിരുന്നു ഋതുപർണയുടെ പഠനം. പ്രവേശന പരീക്ഷയിൽ മെഡിക്കൽ സീറ്റ് നഷ്ടപ്പെട്ടു. പിന്നീട് യു.പി.എസ്.സി. പരീക്ഷ എഴുതിയെങ്കിലും വിജയിച്ചില്ല. ഒടുവിൽ മാതാപിതാക്കളുടെ നിർദേശപ്രകാരം എൻജിനീയറിങ്ങിൽ ചേർന്നു.
എൻജിനീയറിങ് പഠനവുമായി പൊരുത്തപ്പെടാൻ തുടക്കത്തിൽ ബുദ്ധിമുട്ടിയപ്പോഴും ഋതുപർണ തന്റെ ലക്ഷ്യത്തിൽനിന്ന് വ്യതിചലിച്ചില്ല. സിവിൽ സർവീസിനോടുള്ള താൽപ്പര്യം പിന്നീട് ഗവേഷണ മേഖലകളിലേക്ക് വഴിമാറുകയായിരുന്നു.
റോബോട്ടിക്സിൽ വിജയം തേടി
റോബോട്ടിക് പ്രോജക്റ്റുകളിൽ സ്വതന്ത്രമായി പങ്കാളിത്തം വഹിച്ച ഋതുപർണ, ഗോവയിൽ നടന്ന ഇന്ത്യൻ ഇന്റർനാഷണൽ ഇന്നൊവേഷൻ & ഇൻവെൻഷൻ എക്സ്പോയിൽ (Indian International Innovation & Invention Expo) കവുങ്ങിൽ കയറി അടയ്ക്ക പറിക്കാനും മരുന്ന് തളിക്കാനും കഴിയുന്ന ഒരു റോബോട്ടിനെ നിർമിച്ച് സ്വർണ്ണവും വെള്ളിയും ഉൾപ്പെടെയുള്ള പുരസ്കാരങ്ങൾ നേടി.
വിവിധ രാജ്യങ്ങളിൽ നിന്നുള്ള വിദ്യാർത്ഥികൾ പങ്കെടുത്ത ഈ എക്സ്പോയ്ക്ക് ശേഷം എൻ.ഐ.ടി. സൂറത്കൽ ഗവേഷണ സംഘത്തോടൊപ്പം റോബോട്ടിക് ശസ്ത്രക്രിയയിൽ ഡോക്ടർമാർക്കൊപ്പവും പങ്കാളിയായി. കൂടാതെ, ഖരമാലിന്യ സംസ്കരണത്തിനു സഹായിക്കുന്ന മൊബൈൽ ആപ്പും വികസിപ്പിച്ചെടുത്തു.
പിന്നീടാണ് ഋതുപർണയുടെ കരിയറിനെത്തന്നെ മാറ്റിമറിച്ച സംഭവ വികാസങ്ങളുണ്ടായത്. അന്താരാഷ്ട്ര തലത്തിൽ പരിചയം നേടാനുള്ള അതിയായ ആഗ്രഹത്താൽ ഇന്റേൺഷിപ്പ് തേടിയാണ് റോൾസ് റോയ്സിനെ സമീപിക്കുന്നത്.
എന്നാൽ, ‘തങ്ങളുടെ സ്ഥാപനത്തിന്റെ ഭാഗമാകാൻ നിങ്ങൾക്ക് എന്ത് യോഗ്യതയാണുള്ളത്? ഒരു മാസം സമയം തന്നാൽ പോലും തങ്ങൾ ഏൽപ്പിച്ച ജോലികളിൽ ഒന്നുപോലും പൂർത്തിയാക്കാൻ കഴിയില്ല,’ എന്നായിരുന്നു കമ്പനിയുടെ മറുപടി.
എന്നാൽ തോറ്റുകൊടുക്കാൻ ഋതുപർണ തയ്യാറായില്ല. തന്റെ കഴിവ് തെളിയിക്കാൻ ഒരു അവസരം തരണമെന്ന് മാത്രമായിരുന്നു അവളുടെ അഭ്യർത്ഥന. ഇത് കമ്പനി അംഗീകരിക്കുകയും ഒരു മാസത്തെ സമയപരിധിയുള്ള ഒരു ജോലി നൽകുകയും ചെയ്തു. നിരന്തരമായ ഗവേഷണത്തിലൂടെയും ദൃഢനിശ്ചയത്തിലൂടെയും ഒരു ആഴ്ചയ്ക്കുള്ളിൽ അവൾ അത് പൂർത്തിയാക്കി.
അവളുടെ വേഗതയിലും കൃത്യതയിലും ശരിക്കും ഞെട്ടിയ റോൾസ് റോയ്സ് അവൾക്ക് കൂടുതൽ ജോലികൾ ഏൽപ്പിക്കാൻ തുടങ്ങി. പിന്നീടുള്ള എട്ടുമാസക്കാലം സങ്കീർണ്ണമായ അസൈൻമെന്റുകളും കഠിനമായ അഭിമുഖങ്ങളുടെയും നാളുകളായിരുന്നു അവൾക്ക് നേരിടേണ്ടിവന്നത്.
കഴിഞ്ഞ ഡിസംബറിലാണ് റോൾസ് റോയ്സിൽ നിന്ന് പ്രീ-പ്ലേസ്മെന്റ് ലഭിക്കുന്നത്. 39.6 ലക്ഷം രൂപയായിരുന്നു ആദ്യം വാർഷിക ശമ്പളമായി നിശ്ചയിച്ചിരുന്നത്. എന്നാൽ ജോലി ലഭിച്ചിട്ടും വിശ്രമിക്കാൻ ഋതുപർണ തയ്യാറായിരുന്നില്ല. പകൽസമയം കോളജ് പഠനത്തിനായി നീക്കിവെച്ച് രാത്രി റോൾസ് റോയ്സിന്റെ ജോലികൾ ചെയ്തുതീർക്കുകയായിരുന്നു.
ഋതുപർണയുടെ കഠിനാധ്വാനവും മികവും ബോധ്യപ്പെട്ട റോൾസ് റോയ്സ്, ശമ്പളം 72.3 ലക്ഷമായി ഉയർത്തി അവളെ തങ്ങളുടെ ടീമിൽ ഉൾപ്പെടുത്താൻ തീരുമാനിക്കുകയായിരുന്നു. ഏഴാം സെമസ്റ്റർ പഠനം പൂർത്തിയാക്കിയ ഉടൻതന്നെ ജോലിയിൽ ചേരുന്നതിനായി ഋതുപർണ ടെക്സാസിലേക്ക് പറക്കാൻ ഒരുങ്ങുകയാണ്.
ഋതുപർണയുടെ വിജയഗാഥയെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക.
Article Summary: Rithuparna, 20, secured a Rs 72.3 lakh job at Rolls-Royce Aviation.
#Rithuparna #RollsRoyce #SuccessStory #KeralaTalent #Robotics #Engineerin
