അധ്യാപകർക്കും ജീവനക്കാർക്കും അർഹമായ പരിഗണന നൽകുന്നതിൽ ഇടത് സർക്കാർ പരാജയപ്പെട്ടു; 'ഇതൊക്കെ ഇത്രയും മതി' എന്ന അവസ്ഥയാണെന്ന് പി കെ കുഞ്ഞാലിക്കുട്ടി എംഎൽഎ

കോഴിക്കോട്: (KasargodVartha) സംസ്ഥാനത്ത് യുഡിഎഫ് അധികാരത്തിൽ എത്തിയാൽ അധ്യാപകർ നേരിടുന്ന പ്രശ്നങ്ങൾക്ക് പരിഹാരമുണ്ടാകുമെന്ന് പി.കെ കുഞ്ഞാലിക്കുട്ടി എംഎൽഎ. കേരള ഹയർ സെക്കണ്ടറി ടീച്ചേഴ്സ് യൂണിയൻ (കെഎച്ച്എസ്ടിയു) ത്രിദിന സിൽവർ ജൂബിലി സമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

ഏറ്റവും പ്രാധാന്യത്തോടെ പരിഗണിക്കേണ്ട വിദ്യാഭ്യാസ മേഖലയെ കഴിഞ്ഞ കുറച്ച് വർഷങ്ങളായി സംസ്ഥാന സർക്കാർ അവഗണിക്കുകയാണ്. അതിന്റെ പ്രാധാന്യം കുറച്ചു കാണുന്ന സമീപനമാണ് അധികാരികളിൽ നിന്നുണ്ടാകുന്നത്. അധ്യാപകർക്കും ജീവനക്കാർക്കും അർഹമായ പരിഗണന കൊടുത്താൽ മാത്രമേ ജനാധിപത്യ ഭരണകൂടങ്ങളുടെ ഉത്തരവാദിത്തം പൂർണ്ണമാവുകയുള്ളൂ. എന്നാൽ, ദൗർഭാഗ്യവശാൽ ഇടത് സർക്കാർ ഇക്കാര്യത്തിൽ പരാജയപ്പെട്ടിരിക്കുകയാണ്. 'ഇതൊക്കെ ഇത്രയും മതി' എന്ന അവസ്ഥയിലാണ് കാര്യങ്ങൾ. അധ്യാപകരുടെ പരാതി കേൾക്കാൻ പോലും തയ്യാറാകാതെ അവരെ അവഗണിക്കുകയാണെന്നും കുഞ്ഞാലിക്കുട്ടി കൂട്ടിച്ചേർത്തു.

ചടങ്ങിൽ ടി.വി ഇബ്രാഹിം എംഎൽഎ അധ്യക്ഷത വഹിച്ചു. അഡ്വ. പി.എം.എ സലാം, സി.പി ചെറിയ മുഹമ്മദ്, ടി.ടി ഇസ്മാഈൽ, കെ.ടി അബ്ദുൽ ലത്തീഫ്, കല്ലൂർ മുഹമ്മദലി, ഒ. ഷൗക്കത്തലി, ഡോ. എസ്. സന്തോഷ് കുമാർ, ഡോ. നിസാർ ചേലേരി, അബ്ദുൽ ജലീൽ പാണക്കാട്, വി.കെ അബ്ദുറഹിമാൻ, എ. അബൂബക്കർ, പി.സി മുഹമ്മദ് സിറാജ് എന്നിവർ സംസാരിച്ചു.

ഭരണഘടനാ ചർച്ച

സമ്മേളനത്തിന്റെ ഭാഗമായി 'ഇന്ത്യൻ ഭരണഘടനയുടെ വർത്തമാനം' എന്ന വിഷയത്തിൽ നടത്തിയ ചർച്ച പ്രശസ്ത എഴുത്തുകാരൻ കെ.പി രാമനുണ്ണി ഉദ്ഘാടനം ചെയ്തു. പുതിയ കാലഘട്ടത്തിൽ അധ്യാപകർ കുട്ടികളിൽ ഭരണഘടനാ മൂല്യങ്ങൾ വളർത്തിയെടുക്കേണ്ടതിന്റെ പ്രാധാന്യം ഏറെയാണെന്ന് അദ്ദേഹം ഓർമ്മിപ്പിച്ചു. കെ.ബി ലതീബ് കുമാർ, ഡോ. എം.പി ഷാഹുൽ ഹമീദ്, ആർ. മൊയ്തു, വി. സജിത, വി.കെ നാസർ എന്നിവർ ചർച്ചയിൽ പങ്കെടുത്തു സംസാരിച്ചു.

വിവിധ സെഷനുകളിലായി ആഷിക് ചെലവൂർ, കെ.കെ മുഹമ്മദ് അഷ്‌റഫ്, സി.എ നുഹ്മാൻ ഷിബിലി, ആർ.കെ ശാഫി, എ. ഷബീറലി, അഷ്‌റഫ് ചാലിയം, പി. ബഷീർ, അബ്ദു റസാഖ്, അസീസ് നരിക്കലക്കണ്ടി, കെ. ജമാൽ, വിളക്കോട്ടൂർ മുഹമ്മദ് അലി, അബ്ദുൽ മജീദ് പി.പി കണ്ണൂർ, കെ.കെ ആലിക്കുട്ടി, പി.എ ഗഫൂർ, കെ.ടി നാസർ, അബ്ദുൽ ഫത്താഹ് എന്നിവർ സംസാരിച്ചു.

ചൊവ്വാഴ്ച്ചത്തെ പരിപാടികൾ

ചൊവ്വാഴ്ച വൈകീട്ട് 3-ന് ടൗൺ ഹാളിൽ നടക്കുന്ന സാംസ്കാരിക സമ്മേളനം ജില്ലാ പഞ്ചായത്ത് പ്രസിഡൻ്റ് മില്ലി മോഹൻ ഉദ്ഘാടനം ചെയ്യും. കെ.ഇ.എൻ കുഞ്ഞുമുഹമ്മദ്, കമാൽ വരദൂർ എന്നിവർ പങ്കെടുക്കും. തുടർന്ന് 6 മണിക്ക് നടക്കുന്ന കുടുംബ സംഗമം വി.ടി മുരളി ഉദ്ഘാടനം ചെയ്യും. നടൻ വിനോദ് കോവൂർ ചടങ്ങിൽ മുഖ്യാതിഥിയാകും.

സമാപനം ബുധനാഴ്ച

സമ്മേളനത്തിന്റെ സമാപന ദിവസമായ ബുധനാഴ്ച കണ്ടംകുളം ജൂബിലി ഹാളിൽ നടക്കുന്ന പ്രതിനിധി സമ്മേളനം പാണക്കാട് സാദിഖലി ശിഹാബ് തങ്ങൾ ഉദ്ഘാടനം ചെയ്യും. കണ്ണൻ ഗോപിനാഥൻ വിശിഷ്ടാതിഥിയാകും. ഉച്ചയ്ക്ക് നടക്കുന്ന വിദ്യാഭ്യാസ സമ്മേളനം ഡോ. എം.പി അബ്ദുസമദാനി എംപി ഉദ്ഘാടനം ചെയ്യും. വൈകീട്ട് 3-ന് നടക്കുന്ന യാത്രയയപ്പ് സമ്മേളനം മുസ്ലിം ലീഗ് സംസ്ഥാന വൈസ് പ്രസിഡൻ്റ് എം.സി മായിൻ ഹാജി ഉദ്ഘാടനം ചെയ്യും. വൈകീട്ട് 4 മണിക്ക് നടക്കുന്ന അധ്യാപക പ്രകടനത്തോടെ ത്രിദിന സമ്മേളനത്തിന് സമാപനമാകും.

നിലവിലെ സർക്കാർ വിദ്യാഭ്യാസ മേഖലയെ അവഗണിക്കുന്നു എന്ന വിമർശനത്തോട് നിങ്ങൾ യോജിക്കുന്നുണ്ടോ? നിങ്ങളുടെ അഭിപ്രായം പറയൂ.

Article Summary: P.K. Kunhalikutty MLA stated that the UDF will resolve teachers' issues if elected, while inaugurating the KHSTU Silver Jubilee conference in Kozhikode.

#KHSTU #SilverJubilee #PKKunhalikutty #Kozhikode #TeachersUnion #KeralaN