കടവരാന്തയിലും മൈതാനത്തിലും ഭക്ഷണം കഴിക്കുന്ന വിദ്യാർത്ഥികൾക്ക് ആശ്വാസം; ബാലാവകാശ കമ്മിഷൻ ഇടപെട്ടു
● പാണത്തൂർ ഗവ എച്ച് എസിലാണ് ഊട്ടുപ്പുര നിർമിക്കാൻ ബാലാവകാശ കമ്മിഷൻ ഉത്തരവിട്ടത്.
● കമ്മിഷൻ അംഗം ബി മോഹൻകുമാർ ജില്ലാ പഞ്ചായത്ത് സെക്രട്ടറിക്കും വിദ്യാഭ്യാസ ഉപ ഡയറക്ടർക്കുമാണ് നിർദേശം നൽകിയത്.
● മാർച്ച് 31 നകം നിർമ്മാണം പൂർത്തിയാക്കാൻ ടെൻഡർ കരാർ നടപടികൾ സ്വീകരിക്കണം.
● സ്കൂളിലെ 600 കുട്ടികളിൽ പകുതിയിലധികവും പട്ടികവർഗ്ഗ വിഭാഗത്തിൽപ്പെടുന്നവരാണ്.
● ഭക്ഷണം കഴിക്കുമ്പോൾ തെരുവുനായ്ക്കൾ ആക്രമിക്കാൻ വരാറുണ്ടെന്ന പരാതിയിന്മേലാണ് നടപടി.
കാസർകോട്: (KasargodVartha) പാണത്തൂർ ഗവ ഹൈസ്കൂളിന് ഊട്ടുപുര നിർമിക്കുന്നതിന് അടിയന്തര നടപടി സ്വീകരിക്കണമെന്ന് ബാലാവകാശ കമ്മിഷൻ ഉത്തരവിട്ടു. വിദ്യാർത്ഥികളുടെ ബുദ്ധിമുട്ട് പരിഗണിച്ച് മാർച്ച് 31 നകം നിർമാണം പൂർത്തിയാക്കാൻ ഊട്ടുപുരയുമായി ബന്ധപ്പെട്ട ടെൻഡർ കരാർ നടപടികൾ സ്വീകരിക്കണമെന്നും കമ്മിഷൻ അംഗം ബി മോഹൻകുമാർ ജില്ലാ പഞ്ചായത്ത് സെക്രട്ടറിക്കും വിദ്യാഭ്യാസ ഉപ ഡയറക്ടർക്കും നിർദ്ദേശം നൽകി. ഊട്ടുപുരയ്ക്ക് ആവശ്യമായ സ്ഥലം നിജപ്പെടുത്തി നവംബർ 20 നകം സെക്രട്ടറിക്ക് റിപ്പോർട്ട് നൽകണമെന്നും ഉത്തരവിൽ വ്യക്തമാക്കുന്നു.
തെരുവുനായ്ക്കളുടെ ശല്യം പരിഹരിക്കണം
സ്കൂളിൽ 600 കുട്ടികളാണ് പഠിക്കുന്നത്. ഇതിൽ പകുതിയിലധികവും പട്ടികവർഗ്ഗ വിഭാഗത്തിൽപ്പെടുന്നവരാണ്. കുട്ടികൾ കടവരാന്തയിലും, പുഴവക്കിലും, സ്കൂൾ മൈതാനത്തിലുമിരുന്നാണ് ഭക്ഷണം കഴിക്കുന്നതെന്ന വിവരം കമ്മിഷൻ്റെ ശ്രദ്ധയിൽപ്പെട്ടു. അതിനിടെ ഭക്ഷണം കഴിക്കുന്ന സമയത്ത് തെരുവുനായ്ക്കൾ ആക്രമിക്കാൻ വരാറുണ്ടെന്നും പരാതിയുണ്ടായിരുന്നു. ഇത്തരം പ്രശ്നങ്ങൾക്ക് പരിഹാരം കാണുന്നതിനായി ഊട്ടുപ്പുര നിർമ്മിക്കണമെന്നുള്ള പാണത്തൂർ സ്വദേശി തമ്പാൻ നൽകിയ പരാതിയിന്മേലാണ് ബാലാവകാശ കമ്മിഷൻ്റെ ഉത്തരവ്.
നിർമ്മാണ നടപടികൾ വേഗത്തിലാക്കണം
ഊട്ടുപുര നിർമ്മാണത്തിന് ആവശ്യമായ സ്ഥലം ലഭ്യമാക്കി തരുന്ന സമയത്ത് രണ്ടാം എതിർകക്ഷി നിർമ്മാണ ജോലിക്കാവശ്യമായ നടപടികൾ സ്വീകരിക്കേണ്ടതാണ്. അതേസമയം, ഊട്ടുപുര നിർമ്മാണത്തിനായി എസ്റ്റിമേറ്റ് തയ്യാറാക്കുന്ന ഘട്ടത്തിൽ അനുവദിച്ച തുകയേക്കാൾ അധികരിക്കുകയാണെങ്കിൽ അത് ലഭ്യമാക്കുന്നതിന് പഞ്ചായത്ത് സെക്രട്ടറി നടപടി സ്വീകരിക്കണം. കമ്മിഷൻ്റെ ശുപാർശകളിന്മേൽ സ്വീകരിച്ച നടപടി റിപ്പോർട്ട് 2012-ലെ കേരള സംസ്ഥാന ബാലാവകാശ സംരക്ഷണ കമ്മിഷൻ ചട്ടങ്ങളിലെ ചട്ടം 45 പ്രകാരം ബന്ധപ്പെട്ട ഉദ്യോഗസ്ഥർ കമ്മിഷന് ലഭ്യമാക്കേണ്ടതാണ്.
പാണത്തൂർ സ്കൂളിലെ കുട്ടികൾക്ക് ഊട്ടുപുര നിർമ്മിക്കുന്നതിനുള്ള ബാലാവകാശ കമ്മിഷൻ്റെ തീരുമാനം ശ്രദ്ധേയമാണ്! കൂടാതെ തെരുവുനായ്ക്കളുടെ ശല്യം പോലുള്ള പ്രശ്നങ്ങൾക്ക് അടിയന്തര പരിഹാരം വേണ്ടേ? നിങ്ങളുടെ അഭിപ്രായം കമൻ്റ് ചെയ്യുക.
Article Summary: Kerala Child Rights Commission orders immediate construction of a dining hall (Oottupura) at Panathoor Govt. HS, Kasargod.
#ChildRights #PanathoorSchool #Oottupura #KeralaNews #Kasargod #Education
