'പൈവളിഗെയിൽ ഒൻപതാം ക്ലാസ് വിദ്യാർഥിക്ക് നേരെ മുതിർന്ന വിദ്യാർഥികളുടെ മർദനം'; താലൂക്ക് ആശുപത്രിയിൽ പ്രവേശിപ്പിച്ചു

മഞ്ചേശ്വരം: (KasargodVartha) പൈവളിഗെ ഗവൺമെൻ്റ് ഹയർ സെക്കൻഡറി സ്കൂളിലെ ഒൻപതാം ക്ലാസ് വിദ്യാർഥിയെ പത്താം ക്ലാസിലെ ഒരു കൂട്ടം വിദ്യാർഥികൾ ചേർന്ന് മർദിച്ചതായി പരാതി. പൈവളിഗെ സ്വദേശിയായ ജലാലുദ്ദീൻ്റെ മകൻ മുഹമ്മദ് ജെദിം (14) ആണ് മർദനത്തിനിരയായത്. വ്യാഴാഴ്ച (16.07.2026) സ്കൂൾ സമയം കഴിഞ്ഞ് വീട്ടിലേക്ക് മടങ്ങുന്നതിനിടെയാണ് ആക്രമണമുണ്ടായത്.

കഴുത്തിനും നെഞ്ചിനും പരിക്ക്

സ്കൂൾ വിട്ടു വരുന്നതിനിടയിലാണ് മുതിർന്ന വിദ്യാർഥികൾ ചേർന്ന് മുഹമ്മദ് ജെദിമിനെ വളഞ്ഞിട്ട് ആക്രമിച്ചത്. കുട്ടിയുടെ കഴുത്തിനും നെഞ്ചിനും ഇടിയേറ്റിട്ടുണ്ടെന്നാണ് പ്രാഥമിക വിവരം. പ്രാഥമിക ശുശ്രൂഷകൾക്ക് ശേഷം പരിക്കുകൾ സാരമുള്ളതായതിനാൽ കുട്ടിയെ മംഗൽപാടി താലൂക്ക് ആശുപത്രിയിൽ പ്രവേശിപ്പിച്ചു.

റാഗിങ് പതിവാകുന്നുവെന്ന് ആരോപണം

ഉപ്പള, പൈവളിഗെ മേഖലകളിലെ വിദ്യാലയങ്ങളിൽ മുതിർന്ന വിദ്യാർഥികൾ ജൂനിയർ വിദ്യാർഥികളെ റാഗ് ചെയ്യുന്നതും മർദിക്കുന്നതും പതിവാകുകയാണെന്ന് നാട്ടുകാർ ആരോപിക്കുന്നു. വ്യാഴാഴ്ച തന്നെ ഉപ്പളയിലെ മറ്റൊരു സ്കൂളിലും സമാനമായ രീതിയിൽ റാഗിങ് പ്രശ്നങ്ങൾ ഉടലെടുത്തിരുന്നു. പിന്നീട് ഇത് നാട്ടുകാരും സ്കൂൾ അധികൃതരും ഇടപെട്ടാണ് ഒത്തുതീർപ്പാക്കിയത്. അതിന് പിന്നാലെയാണ് പൈവളിഗെയിൽ ഈ സംഭവം ഉണ്ടായിരിക്കുന്നത്.

പൊലീസിൽ പരാതി നൽകും

കുട്ടികൾക്കിടയിലെ ഇത്തരം അക്രമപ്രവണതകൾക്കെതിരെയും റാഗിങ്ങിനെതിരെയും സ്കൂൾ അധികൃതരും പൊലീസും കർശന നടപടി സ്വീകരിക്കണമെന്നാണ് രക്ഷിതാക്കളുടെയും നാട്ടുകാരുടെയും ആവശ്യം. സംഭവത്തിൽ പൊലീസിൽ പരാതി നൽകാനാണ് കുട്ടിയുടെ കുടുംബത്തിൻ്റെ തീരുമാനം.

വിദ്യാഭ്യാസ മേഖലയിലെ കൂടുതല്‍ വാർത്തകള്‍ അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക.

Article Summary: A 9th-grade student was hospitalized after being beaten by seniors in Paivalike.

#KasaragodNews #SchoolRagging #Manjeshwaram #PaivalikeSchool #StudentAttack #KeralaNews #RenuNews