'മഴ വന്നാൽ അവധി തരണേ...'; കളക്ടറോട് കുസൃതിച്ചോദ്യങ്ങളുമായി തച്ചങ്ങാട് സ്കൂളിലെ കുട്ടികൾ, തരംഗമായി 'നമസ്തേ കളക്ടർ'

കാസർകോട്: (KasargodVartha) ജില്ലാ ഭരണകൂടവും കുട്ടികളും തമ്മിലുള്ള അകലം കുറയ്ക്കുന്നതിനായി കാസർകോട് ജില്ലാ കളക്ടർ അർജുൻ പാണ്ഡ്യൻ ആവിഷ്കരിച്ച 'നമസ്തേ കളക്ടർ' പരിപാടി ശ്രദ്ധേയമാകുന്നു. തച്ചങ്ങാട് ജിഎച്ച്എസ്സിലെ വിദ്യാർത്ഥികളാണ് പരിപാടിയിലൂടെ ഇത്തവണ കളക്ടറോട് സംവദിച്ചത്. 

'എന്തും ചോദിച്ചോളൂ' എന്ന കളക്ടറുടെ ഉറപ്പ് കൂടി കിട്ടിയതോടെ മിടുക്കന്മാരുടെയും മിടുക്കികളുടെയും ചോദ്യശരങ്ങളാൽ പരിപാടി ഏറെ സജീവമായി. മഴ വന്നാൽ സ്കൂളുകൾക്ക് അവധി തരണമെന്നതായിരുന്നു കുട്ടികളുടെ ഭാഗത്തുനിന്നുണ്ടായ ആദ്യ ആവശ്യം. കളക്ടറാകാൻ തനിക്ക് ആഗ്രഹമുണ്ടെന്നും കളക്ടർ ആയാൽ കുട്ടികൾക്ക് എളുപ്പത്തിൽ അവധി കൊടുക്കാമല്ലോ എന്നും നാലാം ക്ലാസുകാരനായ ആദവ് അശോക് പറഞ്ഞത് വേദിയിൽ ചിരി പടർത്തി.

തൃശൂരോ കാസർകോടോ ഇഷ്ടം?

കളക്ടറുടെ കുട്ടിക്കാലത്തെ പഠനം, സിവിൽ സർവീസ് വിജയം, വായനാ ശീലങ്ങൾ, കിളിമഞ്ചാരോ പർവ്വതം കീഴടക്കിയപ്പോഴുള്ള അനുഭവം തുടങ്ങി നിരവധി ചോദ്യങ്ങൾക്കാണ് കളക്ടർ മറുപടി നൽകിയത്. ഇതിനിടയിൽ തൃശൂർ കളക്ടറേറ്റ് ആണോ കാസർകോട് കളക്ടറേറ്റ് ആണോ കൂടുതൽ ഇഷ്ടമെന്ന ചോദ്യത്തിന് മുന്നിൽ കളക്ടർ ഒന്ന് പരുങ്ങിയെങ്കിലും, എല്ലാ കളക്ടറേറ്റും തനിക്ക് ഒരുപോലെ ഇഷ്ടമാണെന്ന് അദ്ദേഹം വ്യക്തമാക്കി. 

കാസർകോട് ഏറെ വികസന സാധ്യതയുള്ള സ്ഥലമാണെന്നും വിദ്യാഭ്യാസ മേഖലയിലെ അടിസ്ഥാന സൗകര്യ വികസനത്തിന് തൻ്റെ ഭരണത്തിൽ പ്രാമുഖ്യം നൽകുന്നുണ്ടെന്നും അദ്ദേഹം കുട്ടികളെ അറിയിച്ചു. ജീവിതത്തിലെ പ്രതിസന്ധികളെ പോസിറ്റീവായി എടുക്കണമെന്നും ലഹരി പോലെ തന്നെ അപകടകരമാണ് ഡിജിറ്റൽ അഡിക്ഷൻ എന്നും കളക്ടർ ഓർമിപ്പിച്ചു.

സ്കൂൾ വികസനത്തിന് വികസന പാക്കേജ്

സ്കൂളിന് മുന്നിലെ റോഡിൽ സീബ്രാലൈനും ഡിവൈഡറും ഇല്ലാത്തത് വലിയ പ്രശ്നമാണെന്ന് കുട്ടികൾ ചൂണ്ടിക്കാണിച്ചപ്പോൾ, മഴ പെയ്തൊഴിയുന്ന ഇടവേളയിൽ സീബ്രാലൈൻ വരയ്ക്കാൻ അധികാരികളെ ചുമതലപ്പെടുത്തുമെന്ന് കളക്ടർ ഉറപ്പുനൽകി.  ഹൈസ്കൂളിൻ്റെ ഓടിട്ട കെട്ടിടം മാറ്റി കോൺക്രീറ്റ് ആക്കി തരണമെന്ന ആവശ്യത്തിന്മേൽ, കാസർകോട് വികസന പാക്കേജിൽ പെടുത്തി നടപടികൾ സ്വീകരിക്കുമെന്ന് അദ്ദേഹം വ്യക്തമാക്കി. 

പ്രകൃതിയോട് അടുക്കാൻ ശലഭോദ്യാനവും നേച്ചർ പാർക്കും വേണമെന്ന ആവശ്യവും കളക്ടറുടെ പരിഗണനയിലുണ്ട്. എല്ലാ കുട്ടികൾക്കും കൂടി സ്ഥിരമായി കളക്ടറുടെ വീഡിയോകൾ കാണാൻ സ്മാർട്ട് ക്ലാസ് റൂം വേണമെന്ന ആവശ്യമാണ് നാലാം ക്ലാസുകാരൻ നൃത്തിക് ബാബുരാജ് ഉന്നയിച്ചത്.

കഴിഞ്ഞവർഷത്തെ ഉജ്ജ്വല ബാല്യം പുരസ്കാരം നേടിയ ഇഷാന എസ് പാൽ വരച്ച കളക്ടറുടെ ഫോട്ടോ ചടങ്ങിൽ സ്നേഹപൂർവം സമ്മാനിച്ചു. തുടർന്ന് കുട്ടികൾക്ക് ചോക്ലേറ്റുകൾ വിതരണം ചെയ്ത കളക്ടർ, അവരോടൊപ്പം ഫോട്ടോ എടുക്കുകയും പങ്കെടുത്തവർക്കുള്ള സർട്ടിഫിക്കറ്റുകൾ വിതരണം ചെയ്യുകയും ചെയ്തു. 

തച്ചങ്ങാട് ജിഎച്ച്എസ്സിലെ ഇരുപതോളം കുട്ടികളും നാല് അധ്യാപകരുമാണ് പദ്ധതിയിൽ പങ്കെടുത്തത്. അധ്യാപകരായ ടി മധുസൂദനൻ, കെ വി സൗമ്യ, കെ പ്രേമചന്ദ്രൻ, എച്ച് ഷബ്ന എന്നിവർ കുട്ടികളെ അനുഗമിച്ചു. വിദ്യാർത്ഥികൾക്ക് ഈ പരിപാടിയിൽ പങ്കെടുക്കാൻ dcipksd@gmail(dot)com എന്ന ഇമെയിൽ വിലാസത്തിൽ രജിസ്റ്റർ ചെയ്യാവുന്നതാണ്.

വിദ്യാർത്ഥികൾക്കായുള്ള ഈ വിജ്ഞാനപ്രദമായ വാർത്ത സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകൾ അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. 

Article Summary: Under the 'Namaste Collector' initiative, students from Thachangad GHSS interacted with Kasaragod District Collector Arjun Pandian, raising questions about his career, mountaineering, and demanding continuous infrastructure developments like smart classrooms.

#NamasteCollector #ArjunPandian #KasaragodNews #SchoolStudents #KasaragodDevelopment #MalayalamNews #CollectorInterview #EducationKerala