ഓടുമേഞ്ഞ കെട്ടിടം: മൊഗ്രാൽ ജിവിഎച്ച്എസ്എസ് ലെ ഏഴു ക്ലാസ് റൂമുകൾ ഒഴിപ്പിച്ചു
● കെട്ടിടത്തിന് ഫിറ്റ്നസ് സർട്ടിഫിക്കറ്റ് ഉണ്ട്.
● വികസന ഫണ്ടിൽ തിരിമറി നടന്നത് അന്വേഷിക്കുന്നു.
● തകർച്ചാ ഭീഷണി നേരിടുന്ന കെട്ടിടങ്ങൾ നിരീക്ഷണത്തിൽ.
മൊഗ്രാൽ: (KasargodVartha) ശക്തമായ കാലവർഷത്തെ മുൻനിർത്തി സ്കൂളുകളിൽ സുരക്ഷാ സംവിധാനം ഒരുക്കുന്നതിന്റെ ഭാഗമായി മൊഗ്രാൽ ജിവിഎച്ച്എസ്എസിലെ ഏഴ് ക്ലാസ് മുറികൾ പ്രവർത്തിക്കുന്ന ഓടുമേഞ്ഞ കെട്ടിടത്തിൽ നിന്ന് വിദ്യാർത്ഥികളെ സ്കൂൾ അധികൃതർ തിങ്കളാഴ്ച രാവിലെ ഒഴിപ്പിച്ചു. ഇത് താൽക്കാലിക നടപടിയാണ്.
കാലപ്പഴക്കം ചെന്ന ഓടുമേഞ്ഞ സ്കൂൾ കെട്ടിടത്തിന്റെ മേൽക്കൂര സുരക്ഷാ ഭീഷണി നേരിടുന്നതിനാലാണ് കുട്ടികളെ മാറ്റിയത്. സ്കൂളിൽ ക്ലാസ് മുറികളുടെ കുറവുണ്ടെങ്കിലും വിദ്യാർത്ഥികളുടെ സുരക്ഷയുടെ കാര്യത്തിൽ വിട്ടുവീഴ്ച വേണ്ടെന്ന നിലപാടിലാണ് സ്കൂൾ അധികൃതർ. കെട്ടിടത്തിന് ഫിറ്റ്നസ് സർട്ടിഫിക്കറ്റും ഉണ്ട്. സ്കൂൾ പി.ടി.എയും ഈ വിഷയത്തിൽ അധ്യാപകരുടെ നിലപാടിനൊപ്പമാണ്.
മൊഗ്രാൽ വൊക്കേഷണൽ ഹയർസെക്കൻഡറി സ്കൂളിൽ 2500-ലധികം വിദ്യാർത്ഥികൾ പഠിക്കുന്നുണ്ട്. എന്നാൽ ഇതിന് ആവശ്യമായ കെട്ടിടസൗകര്യം ഇല്ല. സ്കൂൾ കെട്ടിടത്തിനായി പി.ടി.എ.-എസ്.എം.സി. കമ്മിറ്റികൾ നിരന്തരമായി ബന്ധപ്പെട്ടവരെ സമീപിക്കുന്നുണ്ട്.
ഇതിനിടയിലാണ് സ്കൂളിലെ വികസന ഫണ്ടിൽ തിരിമറി നടന്നത്. ഇത് സ്കൂളിന്റെ ദൈനംദിന പ്രവർത്തനങ്ങളെ പോലും ബാധിച്ചിട്ടുണ്ട്. ഇത് സംബന്ധിച്ച് നൽകിയ പരാതിയിൽ അന്വേഷണം നടക്കുന്നുണ്ട്. അന്വേഷണം വേഗത്തിലാക്കണമെന്ന് ഇതിനകം പി.ടി.എ. ആവശ്യപ്പെട്ടിട്ടുമുണ്ട്.
സംസ്ഥാനത്തിന്റെ വിവിധ ഭാഗങ്ങളിൽ സ്കൂൾ കെട്ടിടങ്ങൾ തകർന്നു വീഴുന്നത് വാർത്തകളിൽ ഇടംപിടിച്ചതോടെയാണ് വിദ്യാർത്ഥികളുടെ സുരക്ഷയുടെ കാര്യത്തിൽ ജില്ലാ വിദ്യാഭ്യാസ അധികൃതരുടെ ഇടപെടലുകൾ ഉണ്ടാകുന്നത്. വൈദ്യുതി ലൈൻ കടന്നുപോകുന്ന സ്കൂൾ കെട്ടിടങ്ങൾ, തകർച്ചാ ഭീഷണി നേരിടുന്ന കെട്ടിടങ്ങളൊക്കെ ഇപ്പോൾ അധികൃതരുടെ നിരീക്ഷണത്തിലാണ്.
ഈ വിഷയത്തെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക.
Article Summary: Mogral school evacuates students from unsafe old building.
#Mogral #SchoolSafety #KeralaEducation #BuildingCollapse #MonsoonSafety #Kasaragod
