നവകേരളത്തിനായി സാക്ഷരതാപ്രവര്‍ത്തകര്‍ മുന്നിട്ടിറങ്ങണം; മന്ത്രി ഇ ചന്ദ്രശേഖരന്‍

കാഞ്ഞങ്ങാട്: (www.kasargodvartha.com 26.02.2017) നവകേരള സൃഷ്ടിക്കായി മനുഷ്യത്വപരമായ പ്രവര്‍ത്തനങ്ങളിലൂന്നി സംസ്ഥാന സര്‍ക്കാര്‍ നടപ്പിലാക്കുന്ന ഹരിതകേരളം,ആര്‍ദ്രം,ലൈഫ്,പൊതുവിദ്യാഭ്യാസ സംരക്ഷണയജ്ഞം എന്നിവയുടെ വിജയത്തിന് സാക്ഷരതാപ്രവര്‍ത്തകരുടെ സഹകരണം അനിവാര്യമാണെന്ന് റവന്യുവകുപ്പ് മന്ത്രി ഇ ചന്ദ്രശേഖരന്‍ പറഞ്ഞു. സംസ്ഥാന സാക്ഷരതാമിഷന്‍ അതോറിറ്റിയുടെ നേതൃത്വത്തില്‍ ജില്ലയിലെ പ്രേരക്, അസിസ്റ്റന്റ് പ്രേരക്മാര്‍ക്കുള്ള ദ്വിദിനപരിശീലനപരിപാടി പടന്നക്കാട് ശാന്തിഗ്രാമില്‍ ഉദ്ഘാടനം ചെയ്യുകയായിരുന്നു അദ്ദേഹം.

സമൂഹത്തിന് വെളിച്ചം പകരുന്നവരാണ് സാക്ഷരതാപ്രവര്‍ത്തകരെന്നും സമ്പൂര്‍ണസാക്ഷരതായജ്ഞം കേരളത്തിലെ കുടുംബങ്ങളില്‍ സൃഷ്ടിച്ച മാറ്റങ്ങള്‍ വിപ്ലവകരമായിരുന്നുവെന്നും മന്ത്രി പറഞ്ഞു. ആദിവാസി, തീരദേശമേഖലസാക്ഷരതയിലും പരിസ്ഥിതി സാക്ഷരതയിലും പുതിയ പരിവര്‍ത്തനങ്ങളുണ്ടാകണം. സാക്ഷരതാപ്രവര്‍ത്തകര്‍ വലിയകര്‍ത്തവ്യമായും സാമൂഹികഉത്തരവാദിത്തമായും ഈ പ്രവര്‍ത്തനങ്ങള്‍ഏറ്റെടുക്കണമെന്നും മന്ത്രി പറഞ്ഞു.

കൂടുതല്‍ ഉത്തരവാദിത്തങ്ങള്‍ ഏറ്റെടുക്കുമ്പോള്‍ കാലാനുസൃതമായ വേതനം സാക്ഷരതാപ്രവര്‍ത്തകര്‍ക്ക് ലഭിക്കും. വിവരസാങ്കേതിക വിദ്യയിലും സാക്ഷരത അനിവാര്യമാണ്. അക്ഷരം പഠിപ്പിക്കുന്നതിലുപരിയായി ജീവിതവിജയതത്തിനുപകരിക്കുന്ന പാഠങ്ങള്‍ പകര്‍ന്ന് കൊടുക്കാന്‍ സാധിക്കണമെന്നും അദ്ദേഹം കൂട്ടിച്ചേര്‍ത്തു.