ശാസ്ത്രലോകത്ത് അത്ഭുതമായി ഒരു മലയാളി ബാലൻ; നാസയുടെ പ്രോജക്റ്റിൽ ഇരട്ട നേട്ടവുമായി കാസർകോട് നീലേശ്വരം സ്വദേശി

നീലേശ്വരം: (KasargodVartha) നാസയുടെ സിറ്റിസണ്‍ സയന്റിസ്റ്റ്‌ പ്രൊജക്റ്റിൽ രണ്ട് ഛിന്നഗ്രഹങ്ങൾ കണ്ടെത്തി നീലേശ്വരം സ്വദേശിയായ 13 വയസ്സുകാരൻ സൂര്യ നാരായണൻ. ബെംഗളൂരു അമരജ്യോതി പബ്ലിക് സ്കൂളിലെ എട്ടാം ക്ലാസ് വിദ്യാർത്ഥിയാണ് ഈ മിടുക്കൻ. 

ഐഎഎസ്‌ സി എന്ന നാസ സിറ്റിസൺ സയന്റിസ്റ്റ് പ്രോജക്റ്റിലാണ് ചൊവ്വയ്ക്കും വ്യാഴത്തിനും ഇടയിലുള്ള പ്രധാന ഛിന്നഗ്രഹ വലയത്തിൽ സൂര്യ രണ്ട് ഛിന്നഗ്രഹങ്ങളെ കണ്ടെത്തിയത്. നിലവിൽ ഈ ഛിന്നഗ്രഹങ്ങൾക്ക് 2023 വി.ബി 20, 2023 ഡബ്ല്യു.സി 48 എന്നിങ്ങനെ താൽക്കാലികമായി പേരുകൾ നൽകിയിരിക്കുന്നു. 

സൂര്യ നാരായണൻ ഈ ഛിന്നഗ്രഹങ്ങളെ ആദ്യമായി കണ്ടെത്തിയ വർഷമാണ് ഈ പേരുകൾ സൂചിപ്പിക്കുന്നത്. ഈ ഛിന്നഗ്രഹങ്ങൾക്ക് സ്വന്തമായി പേരുകൾ നൽകാനുള്ള അപൂർവ്വ അവസരവും ഇപ്പോൾ സൂര്യക്ക് ലഭിച്ചിരിക്കുകയാണ്.

നീലേശ്വരം സ്വദേശി ഉമേശൻ അമരനയുടെയും പിലിക്കോട് സ്വദേശിനി പി.വി. രമ്യ നായരുടെയും മകനാണ് സൂര്യ നാരായണൻ. ഉമേശൻ ബെംഗളൂരിൽ കൺസ്ട്രക്ഷൻ കോൺട്രാക്ടറായി ജോലി ചെയ്യുന്നു. എൻജിനീയറിംഗ് ബിരുദധാരിയായ രമ്യ ഒരു സൈക്കോളജിസ്റ്റാണ്. 

സൂര്യനാരായണന്റെ ജനനവും പ്രാഥമിക വിദ്യാഭ്യാസവുമെല്ലാം ബെംഗളൂരിൽ ആയിരുന്നു. പത്ത് വയസ്സു മുതൽ ബഹിരാകാശത്തെയും ജ്യോതിശാസ്ത്രത്തെയും കുറിച്ചുള്ള വിഷയങ്ങളിൽ സൂര്യക്ക് വളരെയധികം താൽപ്പര്യമുണ്ടായിരുന്നു. പാഠപുസ്തകങ്ങൾക്ക് പുറമെ ജ്യോതിശാസ്ത്രം, ജ്യോതിർഭൗതികം എന്നീ വിഷയങ്ങളിലെ പുസ്തകങ്ങളും വായിക്കുന്നത് സൂര്യയുടെ ഒരു ശീലമായിരുന്നു. അഞ്ചാം ക്ലാസ്സിൽ എത്തിയതോടെ സൂര്യ നാഷണൽ ആസ്ട്രോണമി ചലഞ്ചിൽ പങ്കെടുത്തുതുടങ്ങി. 

ബഹിരാകാശ വിഷയങ്ങളിൽ താൽപ്പര്യമുള്ള വിദ്യാർത്ഥികൾ രാജ്യത്തിന്റെ വിവിധ ഭാഗങ്ങളിൽ നിന്നും എത്തി തങ്ങളുടെ കഴിവുകൾ മാറ്റുരയ്ക്കുന്ന ഒരു മത്സരമായിരുന്നു ഇത്. ഈ ചലഞ്ചിൽ മികച്ച റാങ്ക് നേടിയ സൂര്യ, ആറാം ക്ലാസ്സിൽ പഠിക്കുമ്പോളാണ് അന്താരാഷ്ട്ര ആസ്ട്രോ റിസർച്ച് ക്യാമ്പയിനിന്റെ അറിയിപ്പ് ശ്രദ്ധിക്കുന്നത്. 

നാഷണൽ ആസ്ട്രോണമി ചലഞ്ചിൽ സ്ഥിരമായി പങ്കെടുക്കുന്ന സമയമായിരുന്നു അത്. ലാപ്ടോപ്പും ഇന്റർനെറ്റ് കണക്ഷനും ഉള്ളവർക്ക് പങ്കെടുക്കാവുന്ന ഒരു പ്രോജക്റ്റായിരുന്നു ഇത്. കഴിഞ്ഞ രണ്ടു വർഷത്തിനിടെ ഇത്തരത്തിൽ പങ്കെടുത്ത ഐ എ എസ് സി ക്യാമ്പയിനുകളിലൂടെ പ്രാഥമിക പരീക്ഷണങ്ങളുടെ ഭാഗമായി 20ൽ അധികം ഛിന്നഗ്രഹങ്ങളെ സൂര്യ തിരിച്ചറിഞ്ഞു. ഇതിൽ രണ്ട് ഛിന്നഗ്രഹങ്ങളെയാണ് ഇപ്പോൾ നാസ അംഗീകരിച്ചിരിക്കുന്നത്.

ഹവായിയിലെ ഇൻസ്റ്റിറ്റ്യൂട്ട് ഓഫ് ആസ്ട്രോണമിയിലെ പാൻ-സ്റ്റാർസ് ടെലിസ്കോപ്പുകളിൽ നിന്ന് എടുത്ത ചിത്രങ്ങൾ ഉപയോഗിച്ച് ചലിക്കുന്ന വസ്തുക്കളെ കണ്ടെത്താൻ സഹായിക്കുന്ന ആസ്ട്രോമെട്രിക്ക എന്ന സോഫ്റ്റ്‌വെയറാണ് സൂര്യ ഉപയോഗിച്ചത്. പ്രാഥമിക കണ്ടെത്തലുകൾ സമർപ്പിച്ച് ഒരു വർഷത്തിനു ശേഷമാണ് നാസ ഇത് സ്ഥിരീകരിച്ചത്. 

ഇതിനു മുൻപ് മൂന്ന് പ്രോജക്റ്റുകളിലായി 23 പ്രാഥമിക കണ്ടുപിടിത്തങ്ങൾ ഈ കൊച്ചുപ്രായത്തിൽ തന്നെ സൂര്യ നടത്തിയിട്ടുണ്ട്. അക്കാദമിക് രംഗത്തും സൂര്യ മികച്ച പ്രകടനം കാഴ്ചവെച്ചിട്ടുണ്ട്. എസ് ഒ എഫ്, സിൽവർസോൺ, എൻഎസി എന്നിവയുൾപ്പെടെ വിവിധ ഒളിമ്പ്യാഡുകളിൽ ഒന്നിലധികം അന്തർദേശീയ, സോണൽ റാങ്കുകൾ നേടാൻ സൂര്യക്ക് കഴിഞ്ഞിട്ടുണ്ട്. 

ഈ വർഷത്തെ സയൻസ് ഒളിമ്പ്യാഡ് ഫൗണ്ടേഷന്റെ അക്കാദമിക് എക്സലൻസ് അവാർഡ് ജേതാവ് കൂടിയാണ് സൂര്യ. ബെംഗളൂരു അമരജ്യോതി പബ്ലിക് സ്കൂളിലെ എൽകെജി വിദ്യാർത്ഥിനിയാണ് സൂര്യയുടെ സഹോദരി തേജസ്വി നാരായണൻ.

നാസയുടെ പ്രോജക്റ്റിൽ രണ്ട് ഛിന്നഗ്രഹങ്ങൾ കണ്ടെത്തി അത്ഭുതം സൃഷ്ടിച്ച മലയാളി ബാലൻ സൂര്യ നാരായണനെക്കുറിച്ച്  നിങ്ങളുടെ അഭിപ്രായങ്ങൾ പങ്കുവെക്കുക.

Summary: 13-year-old Suryanarayanan from Nileshwaram, Kerala, discovered two asteroids in NASA's Citizen Scientist Project, located between Mars and Jupiter.

#KeralaProdigy #NASA #AsteroidDiscovery #Suryanarayanan #Science #Astronomy