മൊഗ്രാൽ സ്കൂളിന് അഭിമാന നേട്ടം; അധ്യാപകൻ എം മനോജ് കുമാറിന് ദേശീയ പുരസ്കാരം

മൊഗ്രാൽ: (KasargodVartha) വിദ്യാഭ്യാസ ഭരണ നിർവഹണത്തിലെ നൂതന ആശയങ്ങൾക്കും മികച്ച പ്രവർത്തന രീതികൾക്കുമുള്ള നാഷണൽ ഇൻസ്റ്റിറ്റ്യൂട്ട് ഓഫ് എജുക്കേഷണൽ പ്ലാനിങ് ആൻഡ് അഡ്മിനിസ്ട്രേഷന്റെ 2023-24 വർഷത്തെ ദേശീയ പുരസ്കാരം നേടി എം മനോജ് കുമാർ. കാസർകോട് മൊഗ്രാൽ ഗവൺമെന്റ് വിഎച്ച്എസ്ഇ സ്കൂളിലെ ഇക്കണോമിക്സ് അധ്യാപകനും നിലമ്പൂർ മുൻ ബി പി സി യുമായ ഇദ്ദേഹത്തിന്റെ അർപ്പണബോധത്തോടെയുള്ള പ്രവർത്തനങ്ങൾക്കാണ് ദേശീയതലത്തിൽ അംഗീകാരം ലഭിച്ചിരിക്കുന്നത്.

ഡൽഹിയിൽ നടന്ന അവാർഡ് ദാനച്ചടങ്ങ്

രാജ്യത്തെ ജില്ലാ-ബ്ലോക്ക് തല വിദ്യാഭ്യാസ ഓഫീസർമാർക്ക് നൽകുന്ന ഏറ്റവും വലിയ ദേശീയ അവാർഡാണിത്. ന്യൂഡൽഹിയിലെ നീപ ആസ്ഥാനത്ത് നടന്ന ചടങ്ങിൽ എൻ സി ഇ ആർ ടി മുൻ ഡയറക്ടർ പത്മശ്രീ പ്രൊഫ. ജെ.എസ്. രജപുത് അവാർഡ് സമ്മാനിച്ചു. നീപ ചാൻസലർ പ്രൊഫ. രാമ ശങ്കർ ദുബെ അധ്യക്ഷത വഹിച്ച ചടങ്ങിൽ വൈസ് ചാൻസലർ പ്രൊഫ. ശശികല വഞ്ചാരി, രജിസ്ട്രാർ സി.എസ്. സൂര്യ എന്നിവർ സംസാരിച്ചു. രാജ്യസഭ എം.പി. വിനോദ് ശ്രീധർ തവ്ഡെ ചടങ്ങിൽ വിശിഷ്ടാതിഥിയായിരുന്നു.

പുരസ്കാരത്തിന് അർഹമാക്കിയ പ്രവർത്തനങ്ങൾ

സാമൂഹികമായും സാമ്പത്തികമായും പിന്നോക്കം നിൽക്കുന്ന വിദ്യാർത്ഥികളുടെ പഠനത്തിൽ സമത്വവും വൈവിധ്യവും പ്രോത്സാഹിപ്പിക്കുന്നതിന് സ്വീകരിച്ച നൂതന പ്രവർത്തനങ്ങളാണ് എം. മനോജ് കുമാറിനെ അവാർഡിന് അർഹനാക്കിയത്.

കോവിഡിന് ശേഷം നിലമ്പൂർ ഉപജില്ലയിലെ ഉൾവനങ്ങളിൽ താമസിക്കുന്ന ചോലനായ്ക്ക വിഭാഗം കുട്ടികൾ ഉൾപ്പെടെ അതീവ പിന്തുണ ആവശ്യമുള്ളവരെ വിദ്യാലയങ്ങളിലേക്ക് തിരികെ എത്തിക്കുന്നതിനും, അവരുടെ പഠന തുടർച്ച ഉറപ്പുവരുത്തുന്നതിനും വിവിധ ഏജൻസികളുടെ ഏകോപനത്തിലൂടെ അദ്ദേഹം നടത്തിയ പ്രവർത്തനങ്ങൾ വലിയ തോതിൽ ദേശീയ ശ്രദ്ധ ആകർഷിച്ചു.

ശ്രദ്ധ നേടിയ പ്രധാന പദ്ധതികൾ

ഒട്ടേറെ പുതുമയാർന്ന പദ്ധതികളാണ് ഈ കാലയളവിൽ അദ്ദേഹം മുൻകൈയെടുത്ത് നടപ്പിലാക്കിയത്:

● എങ്കെ എങ്ക കൂട്ടം: പുലിമുണ്ട ഉന്നതിയിലെ കുട്ടികളെ സ്കൂളുകളിലേക്ക് തിരികെ എത്തിക്കാനുള്ള പദ്ധതി.
● തിങ്ക ബാന് ബെള്ളി: കാട്ടാനയുടെ ആക്രമണത്തിൽ മരിച്ച പൂച്ചപ്പാറ മണിയുടെ മകൾക്ക് വേണ്ടി തയ്യാറാക്കിയ പ്രത്യേക പഠന പദ്ധതി.
● ഉയരെ: ഗോത്ര വിഭാഗം ഭിന്നശേഷി കുട്ടികൾക്കായുള്ള ആകാശയാത്ര.
● പഠന വീട്: പ്രളയ കാലത്ത് വാണിയമ്പുഴ ബദൽ സ്കൂളിൽ നടപ്പിലാക്കിയ പദ്ധതി.
● തിരികെ: നിലമ്പൂർ ബി.ആർ.സി.യുടെ നേതൃത്വത്തിൽ ആരംഭിച്ച് പിന്നീട് സംസ്ഥാന തലത്തിലേക്ക് വ്യാപിപ്പിച്ച പദ്ധതി.

പൊതുവിദ്യാഭ്യാസ വകുപ്പ്, സമഗ്ര ശിക്ഷാ കേരളം, റവന്യൂ-വനം വകുപ്പുകൾ, പോലീസ്, എക്സൈസ്, കുടുംബശ്രീ തുടങ്ങി ഒട്ടേറെ ഏജൻസികളുടെയും അധ്യാപകരുടെയും കൂട്ടായ പരിശ്രമമാണ് ഈ നേട്ടങ്ങൾക്ക് പിന്നിൽ. മുരിയൻ കണ്ടത്തിൽ ഗോപാലന്റെയും മീനാക്ഷിയുടെയും മകനാണ് എം. മനോജ് കുമാർ. ഭാര്യ: രജീഷ് കല. മക്കൾ: അക്ഷയ് എം. കുമാർ, ആകാശ് എം. കുമാർ.

കൂടുതൽ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായം ഞങ്ങളുടെ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമന്റായി രേഖപ്പെടുത്താനും മറക്കരുത്. 

Article Summary: M. Manoj Kumar wins NIEPA National Award for tribal education.

#EducationNews #NationalAward #NIEPA #KeralaTeacher #MogralSchool #TribalEducation #KeralaNews #AnjuNews