Celebration | രജത ജൂബിലി നിറവിൽ എൽബിഎസ് എൻജിനീയറിങ് കോളജ് 1999 ബാച്ച്; ആഘോഷങ്ങൾ ഡിസംബർ 27, 28ന്

കാസർകോട്: (KasargodVartha) എൽബിഎസ് എൻജിനിയറിങ് കോളേജിന്റെ 1999 ബാച്ച് വിദ്യാർത്ഥികളുടെ രജതജൂബിലി ഒത്തുചേരൽ 'കെ.എൽ. 14 എൽ.ബി.എസ്. 99' എന്ന പേരിൽ ഡിസംബർ 27, 28 തീയതികളിൽ വിപുലമായ പരിപാടികളോടെ നടക്കുമെന്ന് സംഘാടകർ വാർത്താസമ്മേളനത്തിൽ അറിയിച്ചു. ലോകത്തിന്റെ വിവിധ ഭാഗങ്ങളിൽ ജോലി ചെയ്യുന്ന 150 ഓളം പൂർവ വിദ്യാർത്ഥികളും മുതിർന്ന എൻജിനീയർമാരും ഈ ചരിത്രപരമായ സംഗമത്തിൽ പങ്കുചേരും. 

കോളജിന് അമൂല്യ സംഭാവനകൾ നൽകിയ വിരമിച്ചവരും ഇപ്പോഴത്തെ സേവനമനുഷ്ഠിക്കുന്നവരുമായ 30-ൽ അധികം അധ്യാപകരെ ചടങ്ങിൽ ആദരിക്കും. കോളജിന്റെ അടിസ്ഥാന സൗകര്യ വികസനത്തിന് ഒരു കൈത്താങ്ങുമായി 1999 ബാച്ചിന്റെ നേതൃത്വത്തിൽ കാമ്പസിൽ സൗരോർജ വിളക്കുകൾ സ്ഥാപിക്കും. കൂടാതെ, കാമ്പസിന്റെ ഹരിതാഭ നിലനിർത്തുന്നതിനും വർദ്ധിപ്പിക്കുന്നതിനും ലക്ഷ്യമിട്ട് ഒരു ഉദ്യാനവും നിർമ്മിക്കും. 

വരും തലമുറകൾക്കുകൂടി പ്രയോജനപ്പെടുന്ന രീതിയിലാണ് ഈ പദ്ധതികൾ ആസൂത്രണം ചെയ്തിരിക്കുന്നത്.  ഈ സംഗമത്തിന്റെ ഓർമ്മയ്ക്കായി ഒരു സുവനീറും കൂട്ടായ്മയുടെ വിവരങ്ങൾ പങ്കുവെക്കുന്നതിനും അംഗങ്ങളുടെ രചനകൾ പ്രസിദ്ധീകരിക്കുന്നതിനുമായി ഒരു ഓൺലൈൻ പോർട്ടലും ചടങ്ങിൽ പ്രകാശനം ചെയ്യും.

ഡിസംബർ 27-ന് ബേക്കലിലെ ഗേറ്റ് വേയിൽ 'കെ.എൽ. 14 എൽ.ബി.എസ്. 99' ന്റെ ആഘോഷങ്ങൾക്ക് തുടക്കമാകും. പൂർവ വിദ്യാർത്ഥികളുടെ വിവിധ കലാപരിപാടികളും അന്നേദിവസം അരങ്ങേറും. ഡിസംബർ 28-ന് കോളേജ് ഓഡിറ്റോറിയത്തിൽ നടക്കുന്ന സമ്മേളനം എൽ.ബി.എസ്. സെന്റർ ഡയറക്ടറും പൂർവ വിദ്യാർത്ഥിയുമായ ഡോ. എം. അബ്ദുർ റഹ്മാൻ ഉദ്ഘാടനം ചെയ്യും. 

സുവനീറിന്റെയും ഓൺലൈൻ പോർട്ടലിന്റെയും പ്രകാശന കർമ്മവും അദ്ദേഹം നിർവഹിക്കും. തുടർന്ന് മുതിർന്ന അധ്യാപകരെ ആദരിക്കുന്ന ചടങ്ങും നടക്കും. കോളജ് പ്രിൻസിപ്പൽ പ്രൊഫ. മുഹമ്മദ് ഷുക്കൂർ അധ്യക്ഷത വഹിക്കും. സൗരോർജ തെരുവുവിളക്കുകളുടെ ഉദ്ഘാടനവും അദ്ദേഹം നിർവഹിക്കും. വിട്ടുപിരിഞ്ഞ അധ്യാപകരുടെയും പൂർവ വിദ്യാർത്ഥികളുടെയും സ്മരണയ്ക്കായി കാമ്പസിൽ വൃക്ഷത്തൈകൾ നടും.

വാർത്താസമ്മേളനത്തിൽ ഡോ. അൻവർ എസ് ആർ, ദിലീപ് കുമാർ പി, ഷബീന അബ്ദുൽ റഹിമാൻ എന്നിവർ പങ്കെടുത്തു.

#LBSCollege #AlumniReunion #SilverJubilee #Kasargod #EducationEvent #SolarProject