കാസർകോട് ഇനി മികച്ച ഉന്നത വിദ്യാഭ്യാസം കെ.എം.സി.ടി ക്യാമ്പസ് തുറന്നു

കാസർകോട്: (KasargodVartha) കേരളത്തിലെ പ്രമുഖ വിദ്യാഭ്യാസ, ആരോഗ്യ സ്ഥാപനങ്ങളിലൊന്നായ കെ.എം.സി.ടി ഗ്രൂപ്പ് ഓഫ് ഇൻസ്റ്റിറ്റ്യൂഷൻസിൻ്റെ ഏഴാമത്തെ ക്യാമ്പസിൻ്റെയും, ക്യാമ്പസ്സിലെ ആദ്യ കോളേജ്, കെഎംസിടി കോളേജ് ഓഫ് എഞ്ചിനീയറിംഗ് ആൻഡ് മാനേജ്മെൻ്റിൻ്റെയും ഉദ്ഘാടന കർമ്മം പൊതുമരാമത്ത് ടൂറിസം വകുപ്പ് മന്ത്രി അഡ്വക്കേറ്റ് പി.എ. മുഹമ്മദ്‌ റിയാസ് നിർവഹിച്ചു. എ.പി.ജെ അബ്ദുൾ കലാം ടെക്നോളജിക്കൽ യൂണിവേഴ്സിറ്റിയുടെ (കെ.ടി.യു) അഫിലിയേഷനും എ.ഐ.സി.ടി.ഇയുടെ അംഗീകാരവുമുള്ള സ്ഥാപനമാണിത്.

വർഷങ്ങളായി കാസർകോട് ജില്ലയിലെ മികച്ച ഉന്നത വിദ്യാഭ്യാസ സ്ഥാപനങ്ങളുടെ അഭാവം മൂലം വിദ്യാർത്ഥികൾ സമീപ ജില്ലകളിലെയും അയൽ സംസ്ഥാനങ്ങളിലെയും വിദ്യാഭ്യാസ സ്ഥാപനങ്ങളെ ആശ്രയിക്കേണ്ടി വന്ന സാഹചര്യം ഈ പുതിയ ക്യാമ്പസിലൂടെ മാറുമെന്നാണ് കെ.എം.സി.ടി ഗ്രൂപ്പ്‌ പ്രതീക്ഷിക്കുന്നത്. 

കാസർകോട്ടെ സാമ്പത്തികമായി പിന്നാക്കം നിൽക്കുന്ന വിദ്യാർത്ഥികൾക്ക് കുറഞ്ഞ ചെലവിൽ മികച്ച വിദ്യാഭ്യാസം നൽകാനും, അതുവഴി അവരെ സമൂഹത്തിൻ്റെ മുൻനിരയിലേക്കെത്തിച്ച് ലോകോത്തര തൊഴിൽ അവസരങ്ങൾ നേടിക്കൊടുക്കാനുമാണ് ഗ്രൂപ്പ്‌ ലക്ഷ്യമിടുന്നത്.

വിദ്യാർത്ഥികളുടെ തൊഴിൽസാധ്യതകൾ വർധിപ്പിക്കുന്നതിനും അവരുടെ കഴിവുകൾ പരമാവധി വളർത്തിയെടുക്കാനും കേരള സർക്കാർ ഒട്ടനവധി ദീർഘകാല പദ്ധതികൾ ആവിഷ്കരിച്ചിട്ടുണ്ടെന്ന് മന്ത്രി മുഹമ്മദ്‌ റിയാസ് പറഞ്ഞു. കെഎംസിടി, സർക്കാരിൻ്റെ ഉന്നത വിദ്യാഭ്യാസ മേഖലയിലെ സാധ്യതകൾ തിരിഞ്ഞറിഞ്ഞുള്ള ഇടപെടലുകളെ സജീവമായി പിന്തുണക്കുന്ന സ്ഥാപനമാണ്' എന്നും മന്ത്രി കൂട്ടിച്ചേർത്തു.

പരിപാടിയോടനുബന്ധിച്ച് കെഎംസിടി ഗ്രൂപ്പ് ഓഫ് ഇൻസ്റ്റിറ്റ്യൂഷൻസ് ചെയർമാൻ ഡോ. നവാസ് കെ.എം. സ്വാഗതം പറഞ്ഞു. സ്ഥാപക ചെയർമാൻ ഡോ.കെ.മൊയ്തു അധ്യക്ഷനായിരുന്നു. കാസർകോട് കാമ്പസിലെ പുതിയ അക്കാഡമിക് കെട്ടിടത്തിൻ്റെ ശിലാസ്ഥാപനം കാസർഗോഡ് എം.എൽ.എ. എൻ. എ. നെല്ലിക്കുന്നും, ഹോസ്റ്റൽ കെട്ടിടത്തിൻ്റെ ശിലാസ്ഥാപനം കർണാടക സ്റ്റേറ്റ് അല്ലയ്ഡ് ആൻഡ് ഹെൽത്ത്കെയർ കൗൺസിൽ ചെയർമാൻ ഡോ. യു. ടി. ഇഫ്തികാറും ചേർന്ന് നിർവഹിച്ചു.

തുടർന്ന് ക്യാമ്പസ്സിലെ ആദ്യ കോളേജിലെ വിവിധ ലാബുകളുടെയും ലൈബ്രറികളുടെയും ഉദ്ഘാടനം എം.എൽ.എ.മാരായ ഇ.കെ. ചന്ദ്രശേഖരൻ, എ.കെ.എം. അഷ്‌റഫ്‌, സി.എച്. കുഞ്ഞമ്പു, എം. രാജാഗോപാലൻ, കെ.എം. സച്ചിൻ ദേവ്, എന്നിവർ നിർവഹിച്ചു. 

ഹരിപ്രസാദ് മയ്യിപ്പടി ജയസിംഹ വർമ രാജ വിശ്ഷ്ടാതിഥിയായിരുന്നു. ടി.എം. ഷാഹിദ് തേക്കിൽ, അഡ്വക്കേറ്റ് ഐ. സജു, ശ്രീമതി ശാന്ത ബി, പി. എം. കേളുക്കുട്ടി, പ്രൊഫസർ മുഹമ്മദ്‌ അലി മുലിയാർ എന്നിവർ ആശംസകൾ അർപ്പിക്കുകയും ചെയ്തു. കോളേജ് പ്രിൻസിപ്പാൾ ഡോ. മുഹമ്മദ്‌ അൻഷാദ് പി.വൈ. നന്ദി പറഞ്ഞു.

ഈ വാർത്ത നിങ്ങളുടെ സുഹൃത്തുക്കളുമായി പങ്കുവെക്കൂ. കാസർകോട്ടെ വിദ്യാഭ്യാസ രംഗത്തെ ഈ മാറ്റത്തെക്കുറിച്ച് നിങ്ങളുടെ അഭിപ്രായമെന്താണ്?

Article Summary: KMCT Group's 7th campus and its first college inaugurated in Kasaragod.

#KMCT #Kasaragod #MohamedRiyas #EngineeringCollege #KTU #HigherEducation