സർക്കാർ സ്കൂളുകളിൽ ഇനി വായനയ്ക്ക് ഒരു പിരീഡും ഗ്രേസ് മാർക്കും

തിരുവനന്തപുരം: (KasargodVartha) അടഞ്ഞുകിടക്കുന്ന സർക്കാർ സ്കൂൾ ലൈബ്രറികൾ ഇനി സജീവമാകും. വിദ്യാർത്ഥികളിൽ വായനാശീലം പ്രോത്സാഹിപ്പിക്കുന്നതിന്റെ ഭാഗമായി സ്കൂളുകളിൽ ആഴ്ചയിൽ ഒരു പിരീഡും ഗ്രേസ് മാർക്കും നൽകുന്നത് സർക്കാരിന്റെ സജീവ പരിഗണനയിലാണ്.

വായനയ്ക്ക് ഗ്രേസ് മാർക്ക് വരുന്നതോടെ വിദ്യാർത്ഥികളിൽ വായനാശീലം വളർത്താൻ സാധിക്കുമെന്ന് വിദ്യാഭ്യാസ മന്ത്രി വി. ശിവൻകുട്ടി തന്റെ ഫേസ്ബുക്ക് പോസ്റ്റിലൂടെ അറിയിച്ചിരുന്നു. ഇതിന് വലിയ സ്വീകാര്യതയാണ് ലഭിച്ചത്. ഈ തീരുമാനത്തിന്റെ പശ്ചാത്തലത്തിൽ, സ്കൂളുകളിലെ ലൈബ്രറികൾ പൊടിതട്ടിയെടുക്കുന്ന തിരക്കിലാണ് സ്കൂൾ അധികൃതരും പി.ടി.എയും.

വായന പ്രോത്സാഹിപ്പിക്കുന്ന പ്രവർത്തനങ്ങൾക്കായി ആഴ്ചയിൽ ഒരു പിരീഡ് മാറ്റിവയ്ക്കും. കൂടാതെ, കലോത്സവത്തിൽ വായനയുമായി ബന്ധപ്പെട്ട ഒരു ഇനം ഉൾപ്പെടുത്താനും ആലോചനയുണ്ടെന്ന് വിദ്യാഭ്യാസ മന്ത്രി പറയുന്നു.

ഒന്നു മുതൽ നാലു വരെ ക്ലാസുകളിലെ കുട്ടികൾക്ക് അനുയോജ്യമായ വായനാ പ്രവർത്തനങ്ങൾക്കും, അഞ്ചു മുതൽ പന്ത്രണ്ടു വരെ ക്ലാസുകളിലെ കുട്ടികൾക്ക് പത്രവായനയും തുടർപ്രവർത്തനങ്ങൾക്കുമായി ആഴ്ചയിൽ ഒരു പിരീഡ് മാറ്റിവയ്ക്കാനാണ് ആലോചിക്കുന്നതെന്നും മന്ത്രിയുടെ ഫേസ്ബുക്ക് പോസ്റ്റിൽ പറയുന്നുണ്ട്.

സർക്കാർ സ്കൂളുകളിലെ ലൈബ്രറികൾ പലയിടത്തും അടഞ്ഞുകിടക്കുന്നത് ഇതുമായി ബന്ധപ്പെട്ട പ്രവർത്തനങ്ങൾക്ക് അധ്യാപകരെ ലഭിക്കാത്തതുകൊണ്ടും, നിയമിക്കാത്തതുകൊണ്ടുമാണ്. ഓരോ സ്കൂളിലും ലക്ഷക്കണക്കിന് രൂപയുടെ പുസ്തകങ്ങളാണ് അലമാരകളിൽ വെറുതെയിരിക്കുന്നത്.

സ്കൂളുകളിൽ വരുത്തുന്ന പത്രങ്ങളാകട്ടെ ലൈബ്രറികൾക്ക് പകരം പ്രധാനാധ്യാപകന്റെ ഓഫീസ് മുറികളിലോ സ്റ്റാഫ് റൂമുകളിലോ ആണ് കൊണ്ടിടാറ്. ഇത് വിദ്യാർത്ഥികൾക്ക് പ്രയോജനപ്പെടാറില്ല. വായനയ്ക്ക് ഒരു പിരീഡ് തന്നെ വരുന്നതോടെ ഈ അവസ്ഥയ്ക്ക് മാറ്റമുണ്ടാകുമെന്ന് അധ്യാപകരും വിദ്യാർത്ഥികളും പ്രതീക്ഷിക്കുന്നു.

വായനയ്ക്ക് ഗ്രേസ് മാർക്ക് നൽകുന്നതിനെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക.

Article Summary: Kerala government to promote reading in schools.

#Kerala #Education #Reading #GraceMarks #SchoolLibrary #VSivankutty