അച്ചടക്കം പഠിപ്പിക്കാൻ അധ്യാപകർക്ക് ചൂരൽ എടുക്കാം; ഹൈകോടതിയുടെ സുപ്രധാന നിരീക്ഷണം ​​​​​​​

കൊച്ചി: (KasargodVartha) സ്‌കൂളുകളിൽ അച്ചടക്കം ഉറപ്പാക്കുന്നതിനും വിദ്യാർത്ഥികളെ തിരുത്തുന്നതിനും അധ്യാപകർക്ക് 'ചെറിയ ചൂരൽ പ്രയോഗം' നടത്താമെന്ന് ഹൈകോടതി. നല്ല ഉദ്ദേശ്യത്തോടെ നൽകുന്ന ഇത്തരം ശിക്ഷകളെ കുറ്റമായി കാണാനാവില്ലെന്ന് ജസ്റ്റിസ് സി. പ്രദീപ്കുമാർ വ്യക്തമാക്കി. തിരുവനന്തപുരം വെങ്ങാനൂരിലെ സ്‌കൂൾ അധ്യാപകനെതിരേ വിഴിഞ്ഞം പൊലീസ് രജിസ്റ്റർ ചെയ്ത കേസിലെ തുടർനടപടികൾ റദ്ദാക്കിയാണ് കോടതിയുടെ സുപ്രധാന നിരീക്ഷണം.

നല്ല ഉദ്ദേശ്യം പ്രധാനം

വിദ്യാർത്ഥിയെ നന്നാക്കിയെടുക്കുക എന്ന ലക്ഷ്യത്തോടെ അധ്യാപകൻ ശാരീരികമായി ശിക്ഷിക്കുന്നത് ക്രിമിനൽ കുറ്റമായി കണക്കാക്കാനാവില്ല. അധ്യാപകനോ അധ്യാപികയോ നല്ല ഉദ്ദേശ്യത്തോടെ (Bona fide intention) വിദ്യാർഥിയെ ശാരീരികമായി ശിക്ഷിക്കുന്നതിൽ തെറ്റില്ലെന്ന് കോടതി ചൂണ്ടിക്കാട്ടി. അച്ചടക്കം നിലനിർത്താൻ ഇത്തരം നടപടികൾ ആവശ്യമായി വന്നേക്കാം.

രക്ഷിതാക്കളുടെ അനുമതി

കുട്ടികളെ അച്ചടക്കത്തോടെ വളർത്താൻ രക്ഷിതാക്കൾ അധ്യാപകർക്ക് മൗനാനുവാദം നൽകുന്നതായി കണക്കാക്കേണ്ടതുണ്ടെന്ന മുൻ ഉത്തരവുകൾ ഹൈകോടതി ഈ കേസിൽ പരിഗണിച്ചു. അധ്യാപകർ അച്ചടക്ക നടപടി സ്വീകരിക്കുന്നത് വിദ്യാർത്ഥിയുടെ ഭാവിക്കും നന്മയ്ക്കും വേണ്ടിയാണെന്നത് കോടതി പ്രത്യേകം എടുത്തുപറഞ്ഞു.

കേസ് റദ്ദാക്കി

2025 ഫെബ്രുവരി 10-ന് നടന്ന സംഭവത്തെ തുടർന്നാണ് അധ്യാപകനെതിരെ കേസെടുത്തത്. തന്നെ സ്റ്റാഫ് മുറിയിലേക്കു വിളിച്ചുവരുത്തിയ അധ്യാപകൻ ചൂരൽ ഉപയോഗിച്ച് അടിച്ചെന്നായിരുന്നു വിദ്യാർഥിയുടെ പരാതി. തിരുവനന്തപുരം അഡീഷണൽ ജില്ലാ സെഷൻസ് കോടതിയിൽ നടന്നുവന്നിരുന്ന ഈ കേസിന്റെ തുടർനടപടികൾ അവസാനിപ്പിക്കണം എന്നാവശ്യപ്പെട്ടാണ് അധ്യാപകൻ ഹൈകോടതിയെ സമീപിച്ചത്. അധ്യാപകന്റെ ഹർജി ഹൈകോടതി അനുവദിച്ചു.

ഈ വാർത്ത ഉപകാരപ്രദമെന്ന് തോന്നിയാൽ സുഹൃത്തുകൾക്കും കുടുംബാംഗങ്ങൾക്കും ഷെയർ ചെയ്യൂ. അഭിപ്രായങ്ങൾ കമന്റായി പങ്കുവെക്കാനും മറക്കരുത്. പുതിയ വാർത്തകൾ സമയബന്ധിതമായി അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യൂ. 

Article Summary: Kerala High Court ruled that minor corporal punishment by teachers for disciplinary purposes is not a crime, quashing a case against a teacher in Thiruvananthapuram.

#KeralaHighCourt #Teachers #Education #LegalNews #KeralaNews #JusticePradeepKumar