സമരത്തെ തുടര്‍ന്ന് ഒരാഴ്ചയായി അടച്ചിട്ട കേന്ദ്രസര്‍വ്വകലാശാല 22ന് തുറക്കും; പുറത്താക്കിയ വിദ്യാര്‍ത്ഥിയെ തിരിച്ചെടുക്കുന്ന കാര്യം എക്‌സിക്യൂട്ടീവ് കൗണ്‍സില്‍ തീരുമാനിക്കും

പെരിയ: (www.kasargodvartha.com 17.10.2018) വിദ്യാര്‍ത്ഥി സമരത്തെ തുടര്‍ന്ന് ഒരാഴ്ചയായി അടച്ചിട്ട കേരള കേന്ദ്രസര്‍വ്വകലാശാല 22ന് തുറക്കുമെന്ന് സര്‍വ്വകലാശാല അധികൃതര്‍ അറിയിച്ചു. അതേസമയം പുറത്താക്കിയ വിദ്യാര്‍ത്ഥിയെ തിരിച്ചെടുക്കുന്ന കാര്യം നവംബര്‍ രണ്ടിന് ചേരുന്ന എക്‌സിക്യൂട്ടീവ് കൗണ്‍സില്‍ യോഗത്തില്‍ തീരുമാനിക്കും. വിദ്യാര്‍ത്ഥി കേന്ദ്രസര്‍വ്വകലാശാലയ്ക്ക് മാപ്പ് എഴുതി നല്‍കിയിട്ടുണ്ട്. ജില്ലാ കലക്ടറും ജില്ലാ പോലീസ് ചീഫും കേന്ദ്ര സര്‍വ്വകലാശാല അധികൃതരും, വിദ്യാര്‍ത്ഥി സംഘടനാ പ്രതിനിധികളും തമ്മില്‍ നടന്ന ചര്‍ച്ചയില്‍ മാപ്പെഴുതിക്കൊടുത്താല്‍ വിദ്യാര്‍ത്ഥിയെ തിരിച്ചെടുക്കുമെന്ന് തീരുമാനിച്ചിരുന്നു.

യൂണിവേഴ്‌സിറ്റി അധികൃതര്‍ക്കെതിരെ ഫേസ്ബുക്കില്‍ പോസ്റ്റിട്ടതിന് കോഴിക്കോട് സ്വദേശിയും ഇന്റര്‍നാഷണല്‍ റിലേഷന്‍ഷിപ്പ് രണ്ടാം വര്‍ഷ വിദ്യാര്‍ത്ഥിയുമായ അഖിലിനെ കഴിഞ്ഞ സെപ്തംബര്‍ ആറിന് കോളജില്‍ നിന്നും പുറത്താക്കിയിരുന്നു. പിന്നീട് എംപി, എംഎല്‍എ, വൈസ് ചാന്‍സിലര്‍ എന്നിവരുടെ സാന്നിധ്യത്തില്‍ നടന്ന ചര്‍ച്ചയില്‍ വിദ്യാര്‍ത്ഥിയെ തിരിച്ചെടുക്കുന്ന കാര്യം പരിഗണിക്കുമെന്ന് അറിയിച്ചിരുന്നുവെങ്കിലും അഖിലിനെ ക്യാമ്പസില്‍ കയറ്റുന്നത് വിലക്കികൊണ്ട് അധികൃതര്‍ ഉത്തരവിടുകയാണ് ചെയ്തത്. ഇതിനാല്‍ വിദ്യാര്‍ത്ഥിയെ ക്യാമ്പസില്‍ കടക്കാന്‍ സെക്യൂരിറ്റിക്കാര്‍ അനുവദിക്കുകയും ചെയ്തിരുന്നില്ല.

ഇതോടെ മനസികമായി തകര്‍ന്ന അഖില്‍ ഒക്ടോബര്‍ ഒമ്പതിന് രാവിലെ ക്യാമ്പസിലെ ഗ്രൗണ്ടില്‍ വെച്ച് ആത്മഹത്യാ കുറിപ്പ് എഴുതി വെച്ച് കൈഞരമ്പ് മുറിച്ച് ആത്മഹത്യക്ക് ശ്രമിച്ചിരുന്നു. ഇതേ തുടര്‍ന്ന് കോളജ് അക്കാദമിക് ബ്ലോക്ക് ഉപരോധിച്ചു കൊണ്ട് വിദ്യാര്‍ത്ഥികള്‍ ശക്തമായ സമരത്തിലായിരുന്നു. ഇതേ തുടര്‍ന്നാണ് യൂണിവേഴ്‌സിറ്റി അനിശ്ചിത കാലത്തേക്ക് അടച്ചിട്ടത്. അഖിലിനെ തിരിച്ചെടുക്കുന്നതു വരെ സമരം തുടരുമെന്ന് വിദ്യാര്‍ത്ഥി സംഘടനകള്‍ വ്യക്തമാക്കുകയും ചെയ്തിരുന്നു.