പഴയ ബുക്ക് ഡിപ്പോ പൊളിച്ചുനീക്കി; കാസർകോട് സ്കൂൾ ഗ്രൗണ്ട് നവീകരിക്കുന്നു

കാസർകോട്: (KasargodVartha) കാലപ്പഴക്കത്താൽ അപകടാവസ്ഥയിലായിരുന്ന പഴയ ജില്ലാ ബുക്ക് ഡിപ്പോ കെട്ടിടം പൊളിച്ചുനീക്കി. കാസർകോട് ജി.എച്ച്.എസ്.എസ് സ്കൂളിൽ പ്രവർത്തിച്ചിരുന്ന, ഏത് സമയത്തും തകർന്നു വീഴാമായിരുന്ന ഈ കെട്ടിടം നഗരസഭയുടെയും എൻ.എ. നെല്ലിക്കുന്ന് എം.എൽ.എയുടെയും നിരന്തര ഇടപെടലുകളെ തുടർന്നാണ് പൊളിച്ചു മാറ്റിയത്. 

സ്കൂൾ ഗ്രൗണ്ടിന് സമീപത്തായിരുന്നതിനാൽ വിദ്യാർഥികൾ ഭീതിയോടെയാണ് ഗ്രൗണ്ടിൽ കളിച്ചിരുന്നത്. കെട്ടിടം പൊളിച്ചുമാറ്റിയതോടെ വിദ്യാർഥികളുടെ ഭീതി ഒഴിയുകയും ഗ്രൗണ്ടിന് കൂടുതൽ സ്ഥലം ലഭ്യമാവുകയും ചെയ്തു.

ഗ്രൗണ്ട് നവീകരിക്കുന്നതിനായി കാസർകോട് നഗരസഭ 2025-26 വാർഷിക പദ്ധതിയിൽ 10 ലക്ഷം രൂപ വകയിരുത്തിയിട്ടുണ്ട്. എന്നാൽ, കെട്ടിടം പൊളിച്ചുമാറ്റാത്തതുകൊണ്ട് നിർമാണ പ്രവർത്തനങ്ങൾ ആരംഭിക്കാൻ സാധിച്ചിരുന്നില്ല. 

200 മീറ്റർ ട്രാക്ക് സൗകര്യമുള്ള ഗ്രൗണ്ടാണ് നഗരസഭ ഒരുക്കുന്നതെന്ന് ചെയർമാൻ അബ്ബാസ് ബീഗം പറഞ്ഞു. പഴയ ഡിപ്പോ കെട്ടിടം പൊളിച്ചുമാറ്റുന്നതിന് വകുപ്പ് തലത്തിൽ നിരവധി സാങ്കേതിക പ്രശ്നങ്ങളുണ്ടായിരുന്നു. 

നഗരസഭയും എം.എൽ.എയും നടത്തിയ നിരന്തര ഇടപെടലുകളിലൂടെ സാങ്കേതിക പ്രശ്നങ്ങളെല്ലാം പരിഹരിക്കാൻ കഴിഞ്ഞുവെന്നും അദ്ദേഹം കൂട്ടിച്ചേർത്തു. ഇനി ഗ്രൗണ്ടിന്റെ നവീകരണ പ്രവർത്തനങ്ങൾ വേഗത്തിൽ പൂർത്തിയാക്കുമെന്നും അദ്ദേഹം അറിയിച്ചു.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായം കമന്റ് ചെയ്യുക.

Article Summary: Demolition of old book depot for Kasaragod school ground renovation.

#Kasaragod #SchoolRenovation #BookDepot #KeralaNews #Kasargodvartha #KasargodNews