കാറ്റിൽ നിലച്ച വൈദ്യുതി പുനഃസ്ഥാപിക്കാനായില്ല; വെള്ളമില്ലാത്തതിനെ തുടർന്ന് മൊഗ്രാലിൽ സ്കൂളുകൾക്ക് ഉച്ചയ്ക്ക് ശേഷം അവധി

മൊഗ്രാൽ: (KasargodVartha) കഴിഞ്ഞ ദിവസം (തിങ്കളാഴ്ച, 2025 ഒക്ടോബർ 13) കാറ്റിലും മഴയിലും നിലച്ചുപോയ വൈദ്യുതി പുനഃസ്ഥാപിക്കാനാകാത്തത് ജനജീവിതത്തെ ദുരിതത്തിലാക്കി. സ്കൂളുകളിൽ വെള്ളം ഇല്ലാത്തതിനെ തുടർന്ന് പലയിടത്തും ഉച്ചയ്ക്ക് ശേഷം അവധി നൽകി. 

മൊഗ്രാൽ ജി വി എച്ച് എസ് എസ് ഹൈസ്കൂൾ ക്ലാസുകൾക്ക് ഉച്ചയ്ക്ക് ശേഷം അവധി നൽകിയതായി അധികൃതർ അറിയിച്ചു. കെഎസ്ഇബിയുടെ പഴഞ്ചൻ രീതികളിൽ നിന്ന് മോചനം വേണമെന്ന ആവശ്യം ഇതോടെ ശക്തമായിരിക്കുകയാണ്. 

ജില്ലയിലെ വൈദ്യുതി പ്രതിസന്ധി പരിഹരിക്കുന്നതിനായി നേരത്തെ വകുപ്പുതലത്തിൽ പോലും യോഗങ്ങൾ ചേർന്നുവെങ്കിലും ഒന്നിനും ശാശ്വത പരിഹാരം കാണാൻ കഴിഞ്ഞിട്ടില്ല. ഒരു മഴയോ കാറ്റോ അടിച്ചാൽ ജില്ലയിൽ വൈദ്യുതി നിലയ്ക്കുന്ന അവസ്ഥ ഈ കാലഘട്ടത്തിൽ ഉണ്ടാകാൻ പാടില്ലാത്തതാണെന്ന് ഉപഭോക്താക്കൾ പറയുന്നു.

സംസ്ഥാനത്തെ കെഎസ്ഇബി സംവിധാനം ഒരുപാട് മാറേണ്ടിയിരിക്കുന്നു. മഴക്കാലം കഴിഞ്ഞപ്പോൾ പൊട്ടിവീണ കമ്പികളും, ഇലക്ട്രിക് പോസ്റ്റുകളും മാറ്റി സ്ഥാപിച്ചിട്ടും കന്നിമാസത്തിൽ പെയ്ത നേരിയ കാറ്റിലും മഴയിലും വൈദ്യുതി തടസ്സപ്പെട്ടത് കെഎസ്ഇബി സമഗ്രമായ ഒരു പഠനത്തിന് വിധേയമാക്കേണ്ടതുണ്ട്. 

നിലവിലെ ഈ പഴഞ്ചൻ രീതികളിൽ നിന്ന് ഉപഭോക്താക്കൾക്ക് മോചനം ലഭിക്കണം. വൈദ്യുതി വിതരണം ഇല്ലാതെ ഒന്നും നടക്കില്ലെന്ന അവസ്ഥയാണ് ഉള്ളത്. തടസ്സപ്പെടാതെ നോക്കേണ്ടത് വൈദ്യുതി വകുപ്പിന്റെ ചുമതലയാണ്. ഇതിലെ അനാസ്ഥയാണ് ഇത്തരത്തിൽ ദിവസങ്ങളോളം വൈദ്യുതി തടസ്സം നേരിടാൻ കാരണമായതെന്ന് വിമർശനം ഉയരുന്നു.

രാജ്യത്തെ ഡിജിറ്റൽ യുഗത്തിൽ ഇത്തരം ശാസ്ത്രീയമല്ലാത്ത കെഎസ്ഇബി പദ്ധതികൾക്ക് പകരം പുതിയ ശാസ്ത്രീയ പദ്ധതികൾ ആവിഷ്കരിച്ച് നടപ്പാക്കേണ്ടതുണ്ട്. ഒരു കാറ്റടിച്ചാലോ മഴപെയ്താലോ വൈദ്യുതി ബന്ധം തകരുന്ന ഒരു അവസ്ഥ ഉണ്ടാകുന്നത് ഈ ഡിജിറ്റൽ യുഗത്തിൽ ഒട്ടും അംഗീകരിക്കാനാവില്ല. 

നിലവിലെ സാഹചര്യത്തെക്കുറിച്ച് പഠിക്കാൻ കെഎസ്ഇബി പുതിയ എൻജിനീയർമാരെ പ്രാപ്തരാക്കണം. പഴയ രീതികൾ ഉപയോഗിച്ച് തട്ടിക്കൂട്ടി ഉണ്ടാക്കുന്ന പ്രവൃത്തികൾക്കൊന്നും ആയുസ്സുണ്ടാവുന്നില്ല എന്നതിന്റെ തെളിവാണ് കഴിഞ്ഞ ദിവസത്തെ വൈദ്യുതി തടസ്സം.

നേരിയ ഒരു കാറ്റിലും മഴയിലും ഒരു ദിവസം മുഴുവൻ വൈദ്യുതി തടസ്സം വീണ്ടും നേരിട്ടത് ഉപഭോക്താക്കളെ ആശങ്കയിലാക്കുന്നുണ്ട്. കാസർകോടിനെ പോലെ കഴിഞ്ഞ ദിവസം രാത്രി ഇടുക്കി, കോട്ടയം ഭാഗത്തും ശക്തമായ കാറ്റും, മഴയും, ഇടിയും ഉണ്ടായിരുന്നു. അവിടെയൊന്നും വൈദ്യുതി തടസ്സപ്പെട്ടതുമില്ല.

കാസർകോട് ജില്ലക്കാർക്ക് മാത്രമാണ് പലപ്പോഴും വൈദ്യുതി തടസ്സം ദിവസങ്ങളോളം നേരിടേണ്ടി വരുന്നത്. വൈദ്യുതി തടസ്സം മൂലം ഗാർഹിക ഉപഭോക്താക്കൾക്കും ഹോട്ടൽ വ്യാപാരികൾക്കും ഉണ്ടാകുന്ന നഷ്ടം വലുതാണ്. ഇതിനൊരു ശാശ്വതമായ പരിഹാരം അനിവാര്യമാണ്. വൈദ്യുതി വകുപ്പ് ആവിഷ്കരിക്കുന്ന നൂതന പദ്ധതികളാണ് ഇതിനായി ആവശ്യം.

കാസർകോടൻ വൈദ്യുതി പ്രതിസന്ധിയെക്കുറിച്ചുള്ള ഈ വാർത്ത നിങ്ങൾ മറ്റുള്ളവരുമായി പങ്കുവെക്കുക. 

Article Summary: Kasaragod Mogral faces severe power cuts and school closure due to KSEB failure to restore electricity.

#Kasaragod #KSEB #PowerOutage #Mogral #KeralaNews #ElectricityCrisis