കാസർകോട് ഗവ മെഡിക്കൽ കോളേജിൽ എംബിബിഎസ് പ്രവേശനത്തിന് തകൃതിയായ ഒരുക്കം; രണ്ടാംഘട്ട അലോട്ട്മെൻ്റ് നീട്ടിയത് അനുഗ്രഹമായി

കാസർകോട്: (KasargodVartha) ജില്ലയിലെ ജനങ്ങളുടെ ദശാബ്ദങ്ങളായുള്ള സ്വപ്നം യാഥാർത്ഥ്യമാക്കിക്കൊണ്ട് കാസർകോട് ഗവ. മെഡിക്കൽ കോളേജ് എംബിബിഎസ് പ്രവേശനത്തിനുള്ള ഒരുക്കങ്ങൾ അതിവേഗം പൂർത്തിയാക്കി. സെപ്റ്റംബർ 22-ന് ക്ലാസുകൾ ആരംഭിക്കുമെന്നാണ് ആദ്യം പ്രഖ്യാപിച്ചിരുന്നത്. 

എന്നാൽ, നാഷണൽ മെഡിക്കൽ കൗൺസിൽ (എൻഎംസി) രണ്ടാംഘട്ട അലോട്ട്‌മെന്റ് തീയതി നീട്ടിയതിനാൽ പുതുക്കിയ തീയതിയിൽ തന്നെ ക്ലാസുകൾ തുടങ്ങും. പുതിയ തീയതി എൻഎംസി ഉടൻ പ്രഖ്യാപിക്കും.

കോളേജിന് 50 സീറ്റുകളാണ് അനുവദിച്ചിട്ടുള്ളത്. ഉക്കിനടുക്കയിലെ കാമ്പസിൽ ലാബുകൾ, സെമിനാർ ഹാളുകൾ, ക്ലാസ് മുറികൾ, ലൈബ്രറി തുടങ്ങിയ സൗകര്യങ്ങൾ ഒരുക്കിക്കഴിഞ്ഞു. ആരോഗ്യ സർവകലാശാലയുടെ അഫിലിയേഷൻ നടപടിക്രമവും പൂർത്തിയാക്കിയിട്ടുണ്ട്. 

കോവിഡ് മഹാമാരിയുടെ സമയത്ത് കോവിഡ് ആശുപത്രിയായി പ്രവർത്തിച്ച മെഡിക്കൽ കോളേജ് സമുച്ചയം, മെഡിക്കൽ കോളേജിന് അനുയോജ്യമായ രീതിയിൽ നവീകരിക്കുന്ന നിർമ്മാണ പ്രവർത്തനങ്ങൾ പുതിയ കരാർ കമ്പനിയുടെ നേതൃത്വത്തിൽ അതിവേഗം പുരോഗമിക്കുകയാണ്.

താൽക്കാലിക ടീച്ചിങ് ആശുപത്രിയായി കാസർകോട് ജനറൽ ആശുപത്രിയെയാണ് തിരഞ്ഞെടുത്തിരിക്കുന്നത്. 500 കിടക്കകളുള്ള ടീച്ചിങ് ആശുപത്രിയുടെ നിർമ്മാണം കോളേജ് കാമ്പസിൽ തന്നെ പുരോഗമിക്കുന്നുണ്ട്. നിലവിൽ പ്രവേശനം നേടുന്ന ബാച്ചിന്റെ രണ്ടാം വർഷം തുടങ്ങുന്നതിന് മുമ്പ് 500 കിടക്കകളുള്ള ആശുപത്രി പ്രവർത്തനസജ്ജമാകുമെന്നാണ് പ്രതീക്ഷ. ഇപ്പോഴത്തെ ഒപി വിഭാഗവും ലബോറട്ടറിയും പ്രവർത്തനത്തിലാണ്.

അധ്യാപന സൗകര്യങ്ങൾ ഒരുക്കുന്നതിന്റെ ഭാഗമായി ഉക്കിനടുക്കയിലെ അഡ്മിനിസ്ട്രേറ്റീവ് ബ്ലോക്കിലാണ് തിയറി ക്ലാസുകൾക്കുള്ള ഒരുക്കങ്ങൾ നടത്തുന്നത്. വിദ്യാർത്ഥികൾക്കായുള്ള ഹോസ്റ്റലുകളുടെയും ജീവനക്കാരുടെ ക്വാർട്ടേഴ്സുകളുടെയും വൈദ്യുതീകരണം ഒഴികെയുള്ള നിർമ്മാണം പൂർത്തിയായി.

സെപ്റ്റംബർ രണ്ടിനാണ് കാസർകോട് മെഡിക്കൽ കോളേജിൽ എംബിബിഎസ് പ്രവേശനത്തിന് എൻഎംസി ഔദ്യോഗിക അനുമതി നൽകിയത്. എൽഡിഎഫ് സർക്കാർ ജില്ലയ്ക്ക് നൽകിയ ഓണസമ്മാനമായാണ് ഇത് വിലയിരുത്തപ്പെടുന്നത്. കലക്ടറുടെ നേതൃത്വത്തിൽ ദിവസേന പ്രവർത്തനങ്ങൾ വിലയിരുത്തപ്പെടുന്നുണ്ട്. 

അടുത്ത ദിവസങ്ങളിൽ മെഡിക്കൽ എജ്യുക്കേഷൻ ഡയറക്ടർ ഡോ. കെ.വി. വിശ്വനാഥന്റെ നേതൃത്വത്തിൽ പുരോഗതി പരിശോധിക്കും. പ്രവേശന നടപടികൾ പൂർത്തിയാകുന്ന മുറയ്ക്ക് തന്നെ ക്ലാസുകൾ ആരംഭിക്കാൻ എല്ലാ തയ്യാറെടുപ്പുകളും പൂർത്തിയായതായി പ്രിൻസിപ്പൽ ഡോ. പി.എസ്. ഇന്ദു അറിയിച്ചു.

കാസർകോട്ടുകാരുടെ സ്വപ്നമായ മെഡിക്കൽ കോളേജ് യാഥാർത്ഥ്യമാകുന്നതിനെക്കുറിച്ച് നിങ്ങളുടെ അഭിപ്രായം കമന്റ് ചെയ്യുക. ഈ വാർത്ത സുഹൃത്തുക്കൾക്ക് ഷെയർ ചെയ്യൂ.

Article Summary: Kasaragod Medical College prepares for MBBS admission.

#Kasaragod #MedicalCollege #MBBSAdmission #KeralaHealth #EducationNews #KasargodVartha