PSC Coaching | ഉദ്യോഗാർഥികൾക്ക് സുവർണാവസരം: സർക്കാരിന്റെ സൗജന്യ പി എസ് സി കോച്ചിംഗ്; ജനുവരിയിൽ പുതിയ ബാച്ച്; അപേക്ഷിക്കാൻ അവസാന തീയതി ഡിസംബർ 20

ചെർക്കള: (KasargodVartha) സർക്കാർ ജോലി സ്വപ്നം കാണുന്ന ഉദ്യോഗാർത്ഥികൾക്ക് സുവർണാവസരം. സംസ്ഥാന സർക്കാരിന്റെ ന്യൂനപക്ഷ വികസന വകുപ്പിന് കീഴിൽ ചെർക്കളയിൽ പ്രവർത്തിക്കുന്ന സി.എച്ച്. മുഹമ്മദ് കോയ തൊഴിൽ പരിശീലന കേന്ദ്രത്തിൽ സൗജന്യ പി.എസ്.സി. പരീക്ഷാ കോച്ചിംഗ് പുതിയ ബാച്ച് 2025 ജനുവരി ഒന്നിന് ആരംഭിക്കും. ഈ അവസരം പരമാവധി പ്രയോജനപ്പെടുത്തുവാനായി അപേക്ഷകൾ വെള്ളിയാഴ്ചക്കകം (ഡിസംബർ 20) സമർപ്പിക്കേണ്ടതാണ്.

കാസർകോട് ജില്ലയിലെ ഏക സൗജന്യ പി.എസ്.സി. കോച്ചിംഗ് സെന്റർ ചെർക്കള ബേർക്ക റോഡിലാണ് സ്ഥിതി ചെയ്യുന്നത്. പത്താം ക്ലാസ് പഠനം പൂർത്തിയാക്കിയ ഏതൊരാൾക്കും ഈ കോഴ്സിൽ ചേരാവുന്നതാണ്. മുൻകാലങ്ങളിൽ പത്താം ക്ലാസ് കഴിഞ്ഞ പല ഉദ്യോഗാർത്ഥികളും സർക്കാർ ജോലിക്കുള്ള ശ്രമങ്ങളിൽ വേണ്ടത്ര ശ്രദ്ധ ചെലുത്തിയിരുന്നില്ല. എന്നാൽ ഈ പ്രവണതയ്ക്ക് മാറ്റം വരുത്തുന്ന ഒരു കാഴ്ചയാണ് ഇപ്പോൾ കാണാൻ സാധിക്കുന്നത്. 

കഴിഞ്ഞ രണ്ടു ദിവസങ്ങളിലായി കോച്ചിംഗ് സെന്ററിലേക്ക് അപേക്ഷകരുടെ വലിയ തിരക്കാണ് അനുഭവപ്പെടുന്നത്. ഈ പ്രതികരണം കണക്കിലെടുത്ത് ജനുവരി ഒന്നിന് കൂടുതൽ ബാച്ചുകളും, ശനി, ഞായർ ദിവസങ്ങളിൽ അവധി ദിന ബാച്ചുകളും പുതുതായി ആരംഭിക്കുമെന്ന് പ്രിൻസിപ്പൽ ഡോ. ഗീത കെ.പി. അറിയിച്ചു. അതിനാൽ, താല്പര്യമുള്ള ഉദ്യോഗാർത്ഥികൾ ഡിസംബർ 20-ന് തന്നെ അപേക്ഷകൾ സമർപ്പിക്കണമെന്ന് അവർ അഭ്യർത്ഥിച്ചു.

മുൻ കേരള തദ്ദേശ സ്വയം ഭരണ മന്ത്രി ചെർക്കളം അബ്ദുല്ലയുടെ ശ്രമഫലമായാണ് ചെർക്കളയിൽ ന്യൂനപക്ഷ ഉദ്യോഗാർത്ഥികൾക്കായി സൗജന്യ കോച്ചിംഗ് സെന്ററും വിദ്യാഭ്യാസ സംരംഭകത്വ വായ്പകൾ നൽകുന്നതിനുള്ള ധനകാര്യ സ്ഥാപനവും ആരംഭിച്ചത്. ഈ കോച്ചിംഗ് സെന്ററിന്റെ പ്രചാരണത്തിനായി മുസ്ലിം ലീഗ് കാസർകോട് മണ്ഡലം സെക്രട്ടറി നാസർ ചെർക്കളം സാമൂഹ്യ മാധ്യമങ്ങളിൽ പോസ്റ്റ് ചെയ്ത വീഡിയോ ജില്ലയിൽ വലിയ ശ്രദ്ധ നേടിയിരുന്നു.

 #FreePSCCoaching, #Cherkala, #JobSeekers, #GovernmentTraining, #Kasargod, #PSC