4000 രൂപയ്ക്ക് നീറ്റ് പുനഃപരീക്ഷയുടെ വ്യാജ ചോദ്യപ്പേപ്പർ വിൽപ്പന; ടെലഗ്രാം ഗ്രൂപ്പ് വഴി തട്ടിപ്പ് നടത്തിയ 19കാരൻ അറസ്റ്റിൽ

ജയ്പൂർ: (KasargodVartha) രാജസ്ഥാനിലെ ഭിൽവാരയിൽ നീറ്റ് യുജി പുനഃപരീക്ഷയുടെ വ്യാജ ചോദ്യപ്പേപ്പർ ടെലഗ്രാം വഴി വിൽപന നടത്തിയ വിദ്യാർത്ഥി അറസ്റ്റിലായി. രാജസ്ഥാനിലെ ഛുരു ജില്ലയിലെ ആകാശ് ചൗധരി (19) ആണ് രാജസ്ഥാൻ പൊലീസിൻ്റെ പിടിയിലായത്. ഒരു ചോദ്യപ്പേപ്പറിന് 4000 രൂപയായിരുന്നു വിദ്യാർത്ഥി ഉദ്യോഗാർത്ഥികളിൽ നിന്ന് ഈടാക്കിയിരുന്നത്.

ഡെല്‍ഹിയിൽ നിന്ന് ലഭിച്ച രഹസ്യ വിവരത്തിൻ്റെ അടിസ്ഥാനത്തിൽ പൊലീസ് പ്രതിയുടെ വീട്ടിൽ നടത്തിയ റെയ്ഡിന് ശേഷം വെള്ളിയാഴ്ച പുലർച്ചെയാണ് വിദ്യാർത്ഥിയെ കസ്റ്റഡിയിലെടുത്തത്. ജൂൺ 21-ന് നീറ്റ് യുജി പുനഃപരീക്ഷ നടക്കാനിരിക്കെയാണ് പരീക്ഷയെഴുതുന്ന വിദ്യാർത്ഥികളെ കബളിപ്പിച്ച് ഈ വൻ തട്ടിപ്പ് നടന്നത്.

'പേപ്പർ മാഫിയ' ടെലഗ്രാം ചാനലിലൂടെ വിൽപന

'പേപ്പർ മാഫിയ' എന്ന പേരിലുള്ള ടെലഗ്രാം ചാനലിലൂടെയാണ് വ്യാജ ചോദ്യപ്പേപ്പർ വിൽപന നടന്നത്. പൊലീസിൻ്റെ പിടിയിലാകാതിരിക്കാനും ആളെ തിരിച്ചറിയാതിരിക്കാനുമായി യുഎസ് കേന്ദ്രീകരിച്ചുള്ള വിപിഎന്നും പ്രോക്സി നെറ്റുവ‍‌ർക്കുകളും ഉപയോഗിച്ചായിരുന്നു ആകാശ് ചൗധരി ചോദ്യപ്പേപ്പർ വിൽപന നടത്തിയിരുന്നത്. ഈ ടെലഗ്രാം ചാനലിൽ 52 പേരായിരുന്നു അംഗങ്ങളായി ഉണ്ടായിരുന്നതെന്നാണ് പൊലീസിൻ്റെ പ്രാഥമിക കണ്ടെത്തൽ. ക്യൂആർ കോഡ് ഉപയോ​ഗിച്ചായിരുന്നു ഉദ്യോഗാർത്ഥികളിൽ നിന്ന് ഇയാൾ പണം സ്വീകരിച്ചിരുന്നത്.

ജയ്പൂരിൽ മത്സരപരീക്ഷകൾക്ക് പരിശീലനം നടത്തിവരുന്ന ആകാശ് ചൗധരി, നീറ്റ് പരീക്ഷ പരിശീലന പുസ്തകങ്ങളിൽ നിന്നുള്ള ചോദ്യപ്പേപ്പറുകൾ സ്കാൻ ചെയ്തെടുത്താണ് യഥാ‍ർത്ഥ ചോദ്യപ്പേപ്പറുകൾ എന്ന വ്യാജേന വിൽപന നടത്തിയിരുന്നത്. രണ്ട് ദിവസം മുൻപാണ് പ്രതി ജയ്പൂരിൽ നിന്ന് സ്വന്തം വീട്ടിലെത്തിയത്. ഐടി, പബ്ലിക് എക്സാമിനേഷൻ ആക്ടുകൾ അടക്കം ചുമത്തിയാണ് പ്രതിക്കെതിരെ പൊലീസ് കേസെടുത്തിരിക്കുന്നത്.

ബാങ്ക് ഇടപാടുകൾ പരിശോധിക്കുന്നു

രാജസ്ഥാൻ സ്പെഷ്യൽ ബ്രാഞ്ചിനും ജില്ലാ സ്പെഷ്യൽ ടീമിനും ലഭിച്ച വിവരത്തിൻ്റെ അടിസ്ഥാനത്തിലാണ് പ്രതിയുടെ വീട്ടിൽ പരിശോധന നടത്തിയതെന്ന് പൊലീസ് അറിയിച്ചു. പരിശോധനയിൽ മൊബൈൽ ഫോൺ, നീറ്റ് പഠന സാമ​ഗ്രികൾ, വിവിധ രേഖകൾ എന്നിവ കണ്ടെടുത്തു.

വിദ്യാ‍ർത്ഥിയുടെ ബാങ്ക് ഇടപാടുകൾ അടക്കമുള്ള ഡിജിറ്റൽ രേഖകൾ പൊലീസ് വിശദമായി പരിശോധിച്ചുവരികയാണ്. ഇയാൾ എത്ര പേരെ കബളിപ്പിച്ചു, എത്ര പണം സ്വീകരിച്ചു, ഈ കേസിൽ മറ്റ് ആർക്കെങ്കിലും പങ്കുണ്ടോ തുടങ്ങിയ കാര്യങ്ങളും പൊലീസിൻ്റെ അന്വേഷണ പരിധിയിലുണ്ട്. 

നീറ്റ് പുനഃപരീക്ഷയുമായി ബന്ധപ്പെട്ട ഈ തട്ടിപ്പ് വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ ഫേസ്ബുക് പേജില്‍ ഈ വാര്‍ത്തയുടെ താഴെ കമന്‍റായി പങ്കുവെക്കുക. വാർത്തകൾ കൃത്യമായി അറിയാൻ ഞങ്ങളുടെ ഫേസ്ബുക് പേജും വാട്സ് ആപ്പ് ചാനലും ഫോളോ ചെയ്യുക.

Article Summary: A 19-year-old student, Akash Chaudhary, was arrested in Rajasthan's Bhilwara for selling fake NEET UG re-exam question papers for ₹4,000 via a Telegram channel named 'Paper Mafia'.

#NEETUG2024 #RajasthanPolice #FakeQuestionPaper #TelegramScam #JaipurNews #CrimeNews #NEETExam #RenuNews