തളങ്കരയ്ക്ക് അഭിമാനമായി ദഖീറത്ത് വനിതാ കോളജ്
Nov 10, 2012, 14:52 IST
ദഖീറത്തുല്‍ ഉഖ്‌റാ സംഘത്തിനു കീഴില്‍ മാലിക ദിനാര്‍ വലിയ ജുമുഅത്ത് പള്ളിക്ക് സമീപം 2011 ജൂണ്‍ 31ന് കേന്ദ്ര സര്‍വകലാശാല വൈസ് ചാന്‍സിലര്‍ ഡോ.ജാന്‍സി ജെയിംസ് ആണ് വനിതാ കോളജ് ഉല്‍ഘാടനം ചെയ്തത്. ബി.എ. ഇംഗ്ലീഷ്, ബി.കോം കോഴ്‌സുകളോടെയായിരുന്നു തുടക്കം. 100 ഓളം പെണ്‍കുട്ടികള്‍ ഇപ്പോള്‍ ഇവിടെ പഠിക്കുന്നുണ്ട്.
പാവപ്പെട്ട മുസാഫിറുകള്‍ക്ക് ഭക്ഷണം നല്‍കുക എന്ന ലക്ഷ്യത്തോടെ 1955 നവംബര്‍ 25 നാണ് ദഖീറത്തുല്‍ ഉഖ്‌റാ സംഘം സ്ഥാപിച്ചത്. മാലിക് ദീനാര്‍ പള്ളിയിലെത്തുന്ന പാവപ്പെട്ട യാത്രക്കാര്‍ക്ക് ഒരു ഊണിന്റെ വിലയായി ആറണ നല്‍കിക്കൊണ്ടായിരുന്നു തുടക്കം. സംഘത്തിന്റെ പേരില്‍ പിന്നീട് ഒരു മദ്രസ സ്ഥാപിച്ചു. 1971 ഡിസംബര്‍ ആറിന് 23 അനാഥ ബാലികാ-ബാലന്‍മാര്‍ക്ക് പ്രവേശനം നല്‍കി യതീംഖാനയ്ക്ക് തുടക്കം കുറിച്ചു. 1951ല്‍ ദഖീറത്ത് നഴ്‌സറി സ്കൂളും സ്ഥാപിച്ചു. 1984 ല്‍ ദഖീറത്ത് ഇംഗ്ലീഷ് മീഡിയം സ്കൂളും തുടങ്ങി. 25 വര്‍ഷം പിന്നിട്ട സ്കൂളില്‍ എസ്.എസ്.എല്‍.സി.ബാച്ച് ആരംഭിച്ചതുമുതല്‍ 100 ശതമാനം വിജയം നേടിവരികയാണ്.
സംഘത്തിന് കീഴില്‍ ടൈലറിംഗ് സ്കൂളും ഡിസ്‌പെന്‍സറിയും പ്രവര്‍ത്തിച്ചിരുന്നു. 2010 ഫെബ്രുവരി ഒന്നിന് മുന്‍ വിദ്യാഭ്യാസ മന്ത്രിയായിരുന്ന ഇ.ടി. മുഹമ്മദ് ബഷീര്‍ എം.പി. ആണ് സ്കൂളിന്റെ രജത ജൂബിലി ആഘോഷം ഉല്‍ഘാടനം ചെയ്തത്. രജത ജൂബിലി ആഘോഷത്തിന്റെ ഭാഗമായാണ് ദഖീറത്ത് വനിതാ കോളജ് തുടങ്ങിയത്.
താല്‍കാലിക കെട്ടിടത്തില്‍ ആരംഭിച്ച വനിതാ കോളജിന് ഒരു വര്‍ഷം കൊണ്ടുതന്നെ സ്വന്തമായി മൂന്നുനില കെട്ടിടം യാഥാര്‍ത്ഥ്യമായതിന്റെ സന്തോഷത്തിലാണ് നാട്ടുകാരും ദഖീറത്തുല്‍ ഉഖ്‌റാ സംഘം പ്രവര്‍ത്തകരും. തളങ്കരയുടെയും പരിസരപ്രദേശങ്ങളുടെയും വിദ്യാഭ്യാസ മുന്നേറ്റത്തിന് നാഴികകല്ലുകൂടിയായ ദഖീറത്ത് വനിതാ കോളജ് തളങ്കരയുടെ അഭിമാനമായി ഉയര്‍ന്നു നില്‍ക്കുന്നു.
Keywords: Womens-college, Kasaragod, Thalangara, Building, Education, Minister P.K Abdu rabb, Inaguration, Committee, Malik deenar, Girl, Food, Kerala, Dakheerath
Tags
Share this story
