'സെമിനാർ അജണ്ട കാവിവത്കരണം'; കേരള കേന്ദ്ര സർവകലാശാലയിൽ ആർഎസ്എസ് നേതാവിനെതിരെ വിദ്യാർഥി പ്രതിഷേധം; പോലീസുമായി ഉന്തും തള്ളും

പെരിയ: (KasargodVartha) കേരള കേന്ദ്ര സർവകലാശാലയിൽ വിദ്യാർഥി പ്രതിഷേധം. വന്ദേമാതരവുമായി ബന്ധപ്പെട്ട ദേശീയ സെമിനാറിൽ ആർഎസ്എസ് നേതാക്കൾ പങ്കെടുക്കുന്നതിലാണ് വിദ്യാർഥികൾ കടുത്ത പ്രതിഷേധം ഉയർത്തുന്നത്. സമരത്തെ തുടർന്ന് ക്യാമ്പസിൽ പോലീസുമായി ഉന്തും തള്ളും ഉണ്ടായി. എസ്എഫ്ഐ, എംഎസ്എഫ്, എൻഎസ്‌യുഐ തുടങ്ങിയ വിദ്യാർഥി സംഘടനകളാണ് സംയുക്തമായി പ്രതിഷേധവുമായി രംഗത്തുള്ളത്.

മുഖ്യ പ്രഭാഷകനെ തടയുമെന്ന് പ്രഖ്യാപനം

വന്ദേമാതരത്തിൻ്റെ 150-ാം വാർഷികത്തോടനുബന്ധിച്ച് സർവകലാശാലയിലെ ലൈബ്രറി സെമിനാർ ഹാളിൽ 2026 ഒക്ടോബർ 6, 7 തീയതികളിലാണ് ദ്വിദിന ദേശീയ സെമിനാർ നടക്കുന്നത്. പരിപാടിയിൽ പങ്കെടുക്കുന്ന മുഖ്യ പ്രഭാഷകനായ പ്രജ്ഞാ പ്രവാഹ് ദേശീയ കൺവീനർ ജെ നന്ദകുമാറിനെ തടയുമെന്നാണ് വിദ്യാർഥികളുടെ പ്രഖ്യാപനം.

നന്ദകുമാർ ക്യാമ്പസിൽ എത്തിയാൽ തടയുമെന്നും മതനിരപേക്ഷവും ജനാധിപത്യപരവുമായ ക്യാമ്പസ് സംരക്ഷിക്കാൻ ശക്തമായ ഇടപെടൽ നടത്തുമെന്നുമാണ് എസ്എഫ്ഐയുടെ നിലപാട്. ഇതോടെ പ്രതിഷേധക്കാർക്കെതിരെ നിയമനടപടി ഉണ്ടാകുമെന്ന കർശന മുന്നറിയിപ്പ് നൽകി സർവകലാശാല അധികൃതരും രംഗത്തെത്തി.

'അജണ്ട കാവിവത്കരണം'

ആർഎസ്എസ് നേതാക്കൾ മുഖ്യപ്രഭാഷകരായി നടത്തുന്ന ഈ സെമിനാർ യാതൊരുവിധ അക്കാദമിക പ്രാധാന്യമുള്ളതല്ലെന്നും, ഇതിന് പിന്നിൽ കാവിവത്കരണ അജണ്ടയാണെന്നുമാണ് വിദ്യാർഥി സംഘടനകൾ ആരോപിക്കുന്നത്. സെമിനാറിനെതിരെ വരും മണിക്കൂറുകളിലും ശക്തമായ പ്രതിഷേധം ഉയരാനാണ് സാധ്യത. സംഘർഷ സാധ്യത കണക്കിലെടുത്ത് പോലീസ് ജാഗ്രത ശക്തമാക്കിയിട്ടുണ്ട്.

കൂടുതല്‍ വാർത്തകളും വിശേഷങ്ങളും അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് കമൻ്റായി രേഖപ്പെടുത്തുക.

Article Summary: SFI, MSF, and NSUI students protested at the Central University of Kerala against RSS leader J Nandakumar.

#CentralUniversityOfKerala #KasaragodNews #SFI #CampusPolitics #KeralaNews #MalayalamNews #RSS #RenuNews