ഒരു നൂറ്റാണ്ടിന്റെ കാത്തിരിപ്പ്: ബഡാജെ ജിഎൽപി സ്കൂളിനെ യുപിയാക്കാനുള്ള ആവശ്യം ശക്തമാവുന്നു

മഞ്ചേശ്വരം:(KasargodVartha)  ബഡാജെ ജിഎൽപി സ്കൂളിനെ യുപി സ്കൂളായി ഉയർത്തണമെന്ന ആവശ്യം ശക്തമാവുന്നു. ഒരു നൂറ്റാണ്ടിലേറെയായി അറിവിന്റെ വെളിച്ചം പകരുന്ന ഈ വിദ്യാലയം യുപി സ്കൂളായി മാറിയാൽ ആറ് കിലോമീറ്ററോളം ദൂരം സഞ്ചരിച്ച് ഉപരിപഠനത്തിന് പോകേണ്ടി വരുന്ന കുട്ടികളുടെ ബുദ്ധിമുട്ട് ഒഴിവാക്കാം. ഇക്കാര്യത്തിൽ സർക്കാരിൽ സമ്മർദം ചെലുത്തുമെന്ന് മഞ്ചേശ്വരം എംഎൽഎ എകെഎം അഷറഫ് അറിയിച്ചു.

യുപി സ്കൂളായി ഉയർത്തുന്നതിനായി സർക്കാരിനും വിദ്യാഭ്യാസ വകുപ്പിനും പലതവണ നിവേദനം നൽകിയിട്ടുണ്ടെന്ന് എംഎൽഎ പറഞ്ഞു. എന്നാൽ, ഒമ്പത് വർഷമായി സംസ്ഥാനത്ത് പുതിയ സ്കൂളുകൾ അപ്ഗ്രേഡ് ചെയ്യേണ്ടതില്ലെന്ന സർക്കാരിന്റെ നയപരമായ നിലപാട്. സാമ്പത്തിക പ്രതിസന്ധി കാരണം ഇത്തരം അപേക്ഷകളിൽ മന്ത്രിസഭയുടെ തീരുമാനം ആവശ്യമാണെന്നും, നൂറിലധികം അപേക്ഷകൾ സർക്കാരിന്റെ പരിഗണനയിലുണ്ടെന്നും എംഎൽഎ കൂട്ടിച്ചേർത്തു. 

അനുകൂലമായ ഒരു തീരുമാനം ഉണ്ടായാൽ ആദ്യം പരിഗണിക്കുന്ന സ്കൂളുകളിൽ ഒന്നായിരിക്കും ബഡാജെ ജിഎൽപി സ്കൂളെന്നും അദ്ദേഹം പ്രത്യാശ പ്രകടിപ്പിച്ചു. പുതിയ അധ്യാപക തസ്തികകൾ സൃഷ്ടിക്കേണ്ടി വരുന്നതിനാൽ ധനകാര്യ വകുപ്പ് ഈ നീക്കത്തെ എതിർക്കുന്നുണ്ട്. മഞ്ചേശ്വരം പഞ്ചായത്തും ഇതേ ആവശ്യം ഉന്നയിച്ച് സർക്കാരിന് അപേക്ഷ നൽകിയിട്ടുണ്ടെന്ന് പഞ്ചായത്ത് പ്രസിഡന്റ് ജീൻ ലവീന മൊന്തേരോ പറഞ്ഞു.

1925-ൽ ഒരു ചെറിയ ഓലപ്പുരയിൽ മണ്ണെണ്ണ വിളക്കിന്റെ വെളിച്ചത്തിൽ ആരംഭിച്ച ഈ വിദ്യാലയം ഗ്രാമത്തിന്റെ അറിവിന്റെ വിളക്കുമാടമായിരുന്നു. കാലക്രമേണ ഭൗതിക സാഹചര്യങ്ങൾ മെച്ചപ്പെടുകയും പഞ്ചായത്തിന്റെയും പിടിഎയുടെയും പൂർവവിദ്യാർത്ഥികളുടെയും സഹകരണത്തിലൂടെ സ്കൂൾ ഗ്രാമത്തിന്റെ ഹൃദയമിടിപ്പായി മാറുകയും ചെയ്തു. 

എന്നാൽ 2015 മുതൽ 2020 വരെയുള്ള കാലഘട്ടം സ്കൂളിന് വെല്ലുവിളികൾ നിറഞ്ഞതായിരുന്നു. വിദ്യാർത്ഥികളുടെ എണ്ണം കുറഞ്ഞത് സ്കൂളിന്റെ നിലനിൽപ്പിനെത്തന്നെ ചോദ്യം ചെയ്തു. എന്നാൽ അധ്യാപകരുടെയും പൂർവവിദ്യാർത്ഥികളുടെയും കൂട്ടായ പരിശ്രമത്തിലൂടെ സ്കൂളിന് പുതുജീവൻ ലഭിച്ചു.

ഇന്ന്, പുതിയ കാലത്തിനനുസരിച്ചുള്ള പഠന സൗകര്യങ്ങളുമായി മുന്നോട്ട് പോവുന്ന ഈ വിദ്യാലയത്തെ യുപി സ്കൂളായി ഉയർത്തണമെന്നാണ് നാട്ടുകാരുടെ പ്രധാന ആവശ്യം. നാലാം ക്ലാസിന് ശേഷം തുടർപഠനത്തിനായി കുട്ടികൾക്ക് ആറ് കിലോമീറ്റർ ദൂരെയുള്ള യുപി-ഹൈസ്കൂളുകളെ ആശ്രയിക്കേണ്ടി വരുന്നത് വലിയ ബുദ്ധിമുട്ടാണ് സൃഷ്ടിക്കുന്നത്. നിലവിൽ സ്കൂളിൽ അഞ്ചാം ക്ലാസ് മുതൽ ഏഴാം ക്ലാസ് വരെയുള്ള പഠനം സാധ്യമാക്കാൻ ആവശ്യമായ കെട്ടിടവും മറ്റ് ഭൗതിക സാഹചര്യങ്ങളുമുണ്ട്. 

സർക്കാരിന്റെ പുതിയ വിദ്യാഭ്യാസ നയപ്രകാരം ഒന്ന് മുതൽ അഞ്ചാം ക്ലാസ് വരെയാണ് എൽപി തലം അതുകൊണ്ട് തന്നെ അഞ്ചാം ക്ലാസ്സ് പഠനമെങ്കിലും സ്കൂളിൽ സാധ്യമാക്കണമെന്നും രക്ഷിതാക്കൾ ആവശ്യപ്പെടുന്നു.

'ഈ വിദ്യാലയം വെറും പഠനകേന്ദ്രം മാത്രമല്ല, ഗ്രാമത്തിന്റെ ചരിത്രവും സംസ്കാരവും കൂട്ടായ്മയും വളർത്തിയെടുത്ത ആത്മാവാണ്,' ഒരു പൂർവവിദ്യാർത്ഥി പറയുന്നു. ഒരു നൂറ്റാണ്ട് പിന്നിട്ട ഈ സ്കൂൾ പുതിയ തലമുറയുടെ സ്വപ്നങ്ങൾക്ക് പ്രതീക്ഷയുടെ വാതിൽ തുറക്കുകയാണ്.

ബഡാജെ സ്കൂളിന്റെ ഈ ആവശ്യത്തെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കൂ. 

Article Summary: A century-old school in Manjeshwaram seeks UP status.

#BadajeSchool #Manjeshwaram #KeralaEducation #SchoolUpgrade #StudentLife #LocalNews