'വണ്ടിയോടിച്ചത് ബിയർ കഴിച്ച സമയത്ത്; തെറ്റ് മനസ്സിലായി'; വീണ്ടും വിശദീകരണവുമായി യൂട്യൂബർ എസ് ആർ ധന്യ

കാസർകോട്: (KasargodVartha) മദ്യപിച്ച് അമിതവേഗത്തിൽ കാർ ഓടിച്ചതിന് പൊലീസ് കേസെടുത്ത സംഭവത്തിൽ വീണ്ടും വിശദീകരണവുമായി 'ഹെലൻ ഓഫ് സ്പാർട്ട' എന്നറിയപ്പെടുന്ന യൂട്യൂബർ എസ് ആർ ധന്യ.

സമൂഹമാധ്യമത്തിലൂടെ പങ്കുവെച്ച പുതിയ വീഡിയോയിലാണ് സംഭവത്തിൽ തൻ്റെ ഭാഗത്തുണ്ടായ തെറ്റ് അംഗീകരിച്ചുകൊണ്ട് ധന്യ പ്രതികരിച്ചത്. തൻ്റെ വാഹനം പൊലീസ് ഇപ്പോൾ കസ്റ്റഡിയിലല്ലെന്നും താൻ ഒളിവിലല്ലെന്നും ധന്യ വീഡിയോയിൽ വ്യക്തമാക്കുന്നു. സംഭവത്തിന് പിന്നാലെ പ്രചരിച്ച ചില വാർത്തകളിലും സാമൂഹിക മാധ്യമങ്ങളിലെ പ്രചാരണങ്ങളിലും തെറ്റായ വിവരങ്ങൾ ഉൾപ്പെട്ടിട്ടുണ്ടെന്നും അവർ പറയുന്നു.

'താൻ ബിയർ കഴിച്ച സമയത്താണ് വാഹനം ഓടിച്ചത്. അത് തൻ്റെ ഭാഗത്തുണ്ടായ വലിയൊരു മിസ്റ്റേക്കാണ്. ആ സമയത്ത് വാഹനം എടുക്കാൻ പാടില്ലായിരുന്നു. വാഹനം നിർത്തിയാൽ പരിചയമുള്ള ആളുകൾ ശ്രദ്ധിക്കുകയും അത് കൂടുതൽ പ്രശ്നമാകുമെന്നും കരുതിയാണ് വാഹനം നിർത്താതെ പോയത്. ഇപ്പോൾ തൻ്റെ തെറ്റ് പൂർണമായും മനസ്സിലായിട്ടുണ്ട്,' എന്നാണ് ധന്യ വീഡിയോയിൽ പറയുന്നത്.

സംഭവം രണ്ട് ദിവസം മുമ്പാണ് നടന്നതെന്നും ഇപ്പോഴാണ് അത് മാധ്യമങ്ങളിൽ വലിയ വാർത്തയായി പ്രചരിക്കുന്നതെന്നും അവർ ചൂണ്ടിക്കാട്ടി. കേസുമായി ബന്ധപ്പെട്ട് പൊലീസ് ആവശ്യപ്പെട്ട എല്ലാ നടപടികളോടും സഹകരിക്കുമെന്നും നിയമനടപടികളെ മാനിക്കുമെന്നും ധന്യ വീഡിയോയിൽ വ്യക്തമാക്കുന്നു.

മദ്യപിച്ച് അമിതവേഗത്തിൽ വാഹനം ഓടിച്ചതിനെ തുടർന്ന് പൊലീസ് ധന്യക്കെതിരെ കേസെടുത്തിരുന്നു. പരിശോധനയ്ക്കിടെ പൊലീസ് വാഹനം തടയാൻ ശ്രമിച്ചെങ്കിലും നിർത്താതെ പോയെന്ന ആരോപണവും സംഭവത്തിൽ ഉയർന്നിരുന്നു. തുടർന്ന് ധന്യ ഡിവൈഎസ്പി ഓഫീസിലെത്തി പൊലീസ് അന്വേഷണത്തോട് സഹകരിച്ചിരുന്നു. സംഭവം സമൂഹമാധ്യമങ്ങളിൽ വ്യാപകമായി ചർച്ചയായതിന് പിന്നാലെയാണ് ധന്യ തുടർച്ചയായി വിശദീകരണ വീഡിയോകൾ പങ്കുവെക്കുന്നത്.

അതേസമയം, മദ്യപിച്ച് വാഹനം ഓടിക്കുന്നത് ഗുരുതരമായ നിയമലംഘനമാണെന്നും ഇത്തരം പ്രവൃത്തികൾ പൊതുജനങ്ങളുടെ സുരക്ഷയെ അപകടത്തിലാക്കുന്നതാണെന്നും പൊലീസ് ആവർത്തിച്ച് മുന്നറിയിപ്പ് നൽകുന്നുണ്ട്.

അതിനിടെ വാർത്ത നൽകിയ മാധ്യമങ്ങളെയും ധന്യ കുറ്റപ്പെടുത്തുന്നുണ്ട്. താൻ ചെയ്തത് കൊലപാതകത്തെക്കാൾ ഏറ്റവും വലിയ തെറ്റെന്ന നിലയിലാണ് മാധ്യമങ്ങൾ വാർത്ത നൽകുന്നത്. തൻ്റെയും നിരവധി പെൺകുട്ടികളുടെയും വൃത്തികെട്ട രീതിയിലുള്ള അശ്ലീല വീഡിയോകൾ നിർമിച്ച് വെബ്സൈറ്റ് ഉണ്ടാക്കി പ്രസിദ്ധീകരിച്ചവർക്കെതിരെ പരാതി നൽകിയതിനെ കുറിച്ച് മാധ്യമങ്ങൾ വാർത്തയാക്കിയില്ലെന്നും വീഡിയോയിൽ കുറ്റപ്പെടുത്തുന്നു.

യൂട്യൂബറുടെ വിശദീകരണവുമായി ബന്ധപ്പെട്ട ഈ വാർത്ത നിങ്ങളുടെ വാട്സ്ആപ്പ് ഗ്രൂപ്പുകളിൽ ഷെയർ ചെയ്യൂ. കൂടുതല്‍ വാർത്തകള്‍ അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക. 

Article Summary: YouTuber Dhanya SR, known as 'Helen of Sparta', released a video admitting her mistake of driving after consuming beer, clarifying she is not absconding, and criticizing the media for exaggerating the incident.

#HelenOfSparta #DhanyaSR #KasaragodNews #KeralaPolice #DrunkDriving #MalayalamNews #RenuNews