ഉപ്പളയില്‍ ഗുണ്ടാ സംഘങ്ങളുടെ വിളയാട്ടം വീണ്ടും; കാറില്‍ നിന്നും വാളുമായി യുവാവ് അറസ്റ്റില്‍

By Web Desk - MainSep 16, 2019, 13:48 IST

ഉപ്പള: (www.kasargodvartha.com 16.09.2019) ഉപ്പളയില്‍ ഗുണ്ടാ സംഘങ്ങളുടെ വിളയാട്ടം വീണ്ടും. കാറില്‍ നിന്നും വാളുമായി യുവാവിനെ പോലീസ് അറസ്റ്റ് ചെയ്തു. ഉപ്പള ഹിദായത്ത് നഗറിലെ ബദറുദ്ദീനെ (24) യാണ് വാളുമായി മഞ്ചേശ്വരം എസ് ഐ ഇ അനൂപ് കുമാറും സംഘവും അറസ്റ്റ് ചെയ്തത്. ഇയാളുടെ കാറും കസ്റ്റഡിയില്‍ എടുത്തിട്ടുണ്ട്.

ഉപ്പളയില്‍ ഗുണ്ടാ സംഘങ്ങളുടെ വിളയാട്ടം വീണ്ടും; കാറില്‍ നിന്നും വാളുമായി യുവാവ് അറസ്റ്റില്‍

തിങ്കളാഴ്ച രാവിലെ ഉപ്പള റെയില്‍വേ സ്റ്റേഷന്‍ റോഡില്‍ വെച്ചാണ് സംഭവം. ബദറുദ്ദീന്‍ റെയില്‍വെ സ്റ്റേഷനിലേക്ക് പോകുന്നതിനിടിയില്‍ ഒരു സംഘം ഇയാളുടെ കാര്‍ തടഞ്ഞ് മുന്‍ ഭാഗത്തെ ഗ്ലാസ് അടിച്ചു തകര്‍ത്തിരുന്നു. വിവരമറിഞ്ഞ് സ്ഥലത്തെത്തിയ പോലീസ് കാറിനുള്ളില്‍ നിന്ന് വാള്‍ കണ്ടെടുക്കുകയായിരുന്നു. ഞായറാഴ്ച ബദറുദ്ദീന്റെ സുഹൃത്ത് ഒരു സംഘവുമായി വാക്കേറ്റവും സംഘര്‍ഷവും നടത്തിയിരുന്നു. ഇതിന്റെ പ്രതികാരമായാണ് തിങ്കളാഴ്ച രാവിലെ ബദറുദ്ദീന്റെ കാര്‍ അക്രമിക്കപ്പെട്ടതെന്ന് പോലീസ് പറഞ്ഞു. കാര്‍ തകര്‍ത്തതിന് മറ്റൊരു കേസും പോലീസ് രജിസ്റ്റര്‍ ചെയ്തിട്ടുണ്ട്.