മന്ത്രവാദം നടത്തിയെന്ന് സംശയം; ദമ്പതികളെയും അയൽവാസിയെയും വെട്ടിപ്പരിക്കേൽപ്പിച്ച യുവാവ് പിടിയിൽ

കാഞ്ഞങ്ങാട്: (KasargodVartha) മന്ത്രവാദം നടത്തിയെന്ന് സംശയിച്ച് യുവാവ് വീട്ടുവളപ്പിൽ കയറി നടത്തിയ ആക്രമണത്തിൽ ദമ്പതികൾ ഉൾപ്പെടെ മൂന്നുപേർക്ക് വെട്ടേറ്റു. അമ്പലത്തറ പൊലീസ് സ്റ്റേഷൻ പരിധിയിലെ അട്ടേങ്ങാനം നായിക്കയം വെള്ളമുണ്ടയിലാണ് സംഭവം. അമ്പലത്തറ പൊലീസ് സ്റ്റേഷൻ പരിധിയിലെ ശരത്ത് (28) എന്നയാളെയാണ് അമ്പലത്തറ പൊലീസ് കസ്റ്റഡിയിലെടുത്തത്.

2026 സെപ്റ്റംബർ 26 ശനിയാഴ്ച രാവിലെ ഏഴുമണിയോടെയായിരുന്നു ആക്രമണം. തേങ്ങാ പറിക്കുന്ന തൊഴിലാളിയാണ് സജിത്ത്.

തുടരെ വെട്ടിപ്പരിക്കേൽപ്പിച്ചു

വെള്ളമുണ്ടയിലെ രാഘവൻ നായർ (72), ഭാര്യ ഇന്ദിര (65), അയൽവാസിയായ യദു ചന്ദ്രൻ (28) എന്നിവർക്കാണ് ആക്രമണത്തിൽ വെട്ടേറ്റത്. മൂവർക്കും കൈകൾക്കാണ് പരിക്കേറ്റിട്ടുള്ളത്. രാഘവൻ നായരുടെ വീട്ടുവളപ്പിൽ അതിക്രമിച്ചു കയറിയാണ് സജിത്ത് ആക്രമണം നടത്തിയത്.

ആദ്യം രാഘവൻ നായർക്കാണ് വെട്ടേറ്റത്. ബഹളം കേട്ട് വീടിന് പുറത്തേക്ക് ഓടിയെത്തിയ ഭാര്യ ഇന്ദിരയെയും യുവാവ് വെട്ടിപ്പരിക്കേൽപ്പിക്കുകയായിരുന്നു. ദമ്പതികളുടെ നിലവിളി കേട്ട് സ്ഥലത്തെത്തി ആക്രമണം തടയാൻ ശ്രമിക്കുന്നതിനിടെയാണ് അയൽവാസിയായ യദു ചന്ദ്രനും വെട്ടേറ്റത്.

പരിക്കേറ്റ യദു ചന്ദ്രനെ മാവുങ്കാലിലെ ആശുപത്രിയിൽ പ്രവേശിപ്പിച്ചു. രാഘവൻ നായരെയും ഇന്ദിരയെയും പരിയാരത്തെ കണ്ണൂർ ഗവ. മെഡിക്കൽ കോളജ് ആശുപത്രിയിൽ പ്രവേശിപ്പിച്ചിരിക്കുകയാണ്. പ്രായമായ ദമ്പതികൾക്ക് അടിയന്തര വിദഗ്ധ ചികിത്സകൾ വേണ്ടിവരുമെന്നാണ് ആശുപത്രി വൃത്തങ്ങൾ സൂചിപ്പിക്കുന്നത്.

സാഹസികമായി കീഴ്പെടുത്തി പൊലീസ്

ആക്രമണത്തിന് പിന്നാലെ സ്ഥലത്ത് എത്തിയ നാട്ടുകാർക്ക് നേരെ പ്രതി കല്ലെറിഞ്ഞതായും വെട്ടുകത്തി കാണിച്ച് ഭീഷണിപ്പെടുത്തിയതായും പറയുന്നു. വിവരം ലഭിച്ചതിനെ തുടർന്ന് അമ്പലത്തറ പൊലീസ് സ്ഥലത്തെത്തി. എസ്എച്ച്ഒ എം സവ്യസാചിയുടെയും എസ്ഐ ജയകൃഷ്ണൻ്റെയും നേതൃത്വത്തിലുള്ള പൊലീസ് സംഘം ശരത്തിനെ കസ്റ്റഡിയിലെടുത്തു.

തനിക്കെതിരെ ഇവർ മന്ത്രവാദം നടത്തുന്നുവെന്ന് ശരത്ത് സംശയിച്ചിരുന്നുവെന്നും, ഇതാണ് ആക്രമണത്തിന് കാരണമെന്നും പൊലീസ് വ്യക്തമാക്കി. പ്രതി മാനസിക അസ്വസ്ഥത പ്രകടിപ്പിക്കുന്നുണ്ടെന്നും, വൈദ്യപരിശോധന നടത്തി കോടതിയിൽ ഹാജരാക്കുമെന്നും പൊലീസ് അറിയിച്ചു.

ഈ വാർത്ത നിങ്ങളുടെ വാട്സ്ആപ്പ് ഗ്രൂപ്പുകളിൽ ഷെയർ ചെയ്യൂ. കൂടുതല്‍ വിവരങ്ങള്‍ അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റില്‍ കമൻ്റായി രേഖപ്പെടുത്തുക.

Article Summary: Youth arrested for attacking a couple and neighbor in Kanhangad.

#KasargodVartha #KanhangadCrimeNews #AmbalatharaPolice #Attenganam #KeralaPolice #MalayalamNews #RenuNews