Arrested | 'അടക്കമോഷ്ടിച്ചെന്ന് ആരോപിച്ച് 2 കൗമാരക്കാരെ കവുങ്ങില്‍ കെട്ടിയിട്ട് മുളവടി കൊണ്ട് ക്രൂരമായി മര്‍ദിച്ച് പരിക്കേല്‍പിച്ചു'; യുവാവ് അറസ്റ്റില്‍

ആദൂര്‍: (www.kasargodvartha.com) അടക്കമോഷ്ടിച്ചെന്ന് ആരോപിച്ച് സഹോദരങ്ങളായ കൗമാരക്കാരെ കവുങ്ങില്‍ കെട്ടിയിട്ട് മുളവടി കൊണ്ട് ക്രൂരമായി മര്‍ദിച്ച് പരിക്കേല്‍പിച്ചെന്ന കേസില്‍ യുവാവ് അറസ്റ്റില്‍. ആദൂര്‍ പൊലീസ് സ്റ്റേഷന്‍ പരിധിയിലെ അബ്ദുല്ല (42) യെ ആണ് എസ്‌ഐ കെവി മധുസൂദനും സംഘവും അറസ്റ്റ് ചെയ്തത്. ഇക്കഴിഞ്ഞ ഡിസംബര്‍ 27നാണ് കേസിനാസ്പദമായ സംഭവം നടന്നത്. ആദൂര്‍ പൊലീസ് സ്റ്റേഷന്‍ പരിധിയിലെ 15 ഉം 13 ഉം വയസുള്ള കുട്ടികളെ മര്‍ദിച്ചെന്നാണ് പരാതി.
                
ഇരയായ കുട്ടികളുടെ കുടുംബത്തിന്റെ സ്ഥലത്തിനടുത്ത് അബ്ദുല്ല ഒരു തോട്ടം പാട്ടത്തിനെടുത്തിരുന്നു. കുട്ടികള്‍ കുടുംബ സ്ഥലത്ത് നിന്ന് അടക്കയുമായി പോകുമ്പോള്‍ അബ്ദുല്ല തന്റെ സ്ഥലത്ത് നിന്ന് അടക്ക മോഷ്ടിച്ചതായി ആരോപിച്ച് ക്രൂരമര്‍ദനത്തിന് ഇരയാക്കിയെന്നാണ് പരാതിയില്‍ പറയുന്നത്. മക്കള്‍ കരയുന്ന ശബ്ദം കേട്ടെത്തിയ മാതാവാണ് കുട്ടികളെ മോചിപ്പിച്ചത്.

തുടര്‍ന്ന് മാതാവ് ആദൂര്‍ പൊലീസില്‍ പരാതി നല്‍കുകയായിരുന്നു. പരാതിയുടെ അടിസ്ഥാനത്തില്‍ വധശ്രമത്തിന് കേസടുത്താണ് പൊലീസ് അബ്ദുല്ലയെ അറസ്റ്റ് ചെയ്തത്. പരുക്കേറ്റ കുട്ടികള്‍ ആശുപത്രിയില്‍ ചികിത്സ തേടി. < !- START disable copy paste -->