കാറിൽ കടത്തുകയായിരുന്ന എംഡിഎംഎയുമായി യുവതിയും യുവാവും അറസ്റ്റിൽ; ഡിജിറ്റൽ ത്രാസും പൗച്ചും അടക്കമുള്ള സാധനങ്ങളും പിടിച്ചെടുത്തു

കാസർകോട്: (KasargodVartha) കാറിൽ എംഡിഎംഎ കടത്താൻ ശ്രമിച്ച യുവതിയെയും യുവാവിനെയും ചെർക്കളയിൽവെച്ച് വിദ്യാനഗർ പൊലീസ് അറസ്റ്റ് ചെയ്തു.  ചെമ്മനാട് ഗ്രാമപഞ്ചായത്ത് പരിധിയിലെ മുഹമ്മദ് ഫൈസൽ (34), തസ്ലീം ഫർസാന (24) എന്നിവരാണ് അറസ്റ്റിലായത്.

പൊലീസിനെ വെട്ടിച്ച് കടക്കാൻ ശ്രമം

2026 സെപ്റ്റംബർ 10 വ്യാഴാഴ്ച വൈകിട്ട് 4.15 ഓടെയാണ് സംഭവം. ചെർക്കള ദേശീയപാത 66-ൽ നിർമാണം പുരോഗമിക്കുന്ന മേൽപാലത്തിന് സമീപത്തെ സിഗ്നൽ പരിസരത്ത് പട്രോളിങ് നടത്തുകയായിരുന്ന വിദ്യാനഗർ എസ്ഐ വിജയൻ മേലത്തും എസ്പിയുടെ ഡാൻസാഫ് സംഘവും കാറിനെ തടഞ്ഞുനിർത്തുകയായിരുന്നു.

കെ എൽ 60 ഡബ്ല്യു 4441 നമ്പർ കാർ എതിർദിശയിൽനിന്ന് വരുന്നതിനിടെ പൊലീസ് വാഹനം കണ്ടതോടെ പെട്ടെന്ന് യു-ടേൺ എടുത്ത് കാസർകോട് ഭാഗത്തേക്ക് ഓടിച്ചുപോകാൻ ശ്രമിച്ചതാണ് പൊലീസിന് സംശയത്തിനിടയാക്കിയത്. തുടർന്ന് പൊലീസ് വാഹനം പിന്തുടർന്ന് കാറിന് കുറുകെയിട്ട് തടഞ്ഞുനിർത്തി പരിശോധന നടത്തുകയായിരുന്നു.

ത്രാസും ഹുക്കയും പിടികൂടി

പരിശോധനയ്ക്കിടെ കാറിലുണ്ടായിരുന്ന മുഹമ്മദ് ഫൈസലിൻ്റെ പാന്റിന്റെ മുൻകീശയിൽ രണ്ട് ചെറിയ സിപ്പ് ലോക്ക് കവറുകളിലായി സൂക്ഷിച്ചിരുന്ന എംഡിഎംഎ കണ്ടെത്തി. ഇലക്ട്രോണിക് ത്രാസിൽ തൂക്കിയപ്പോൾ കവറുകൾ ഒഴികെ ആകെ ഒരു ഗ്രാം എംഡിഎംഎയാണ് ഉണ്ടായിരുന്നതെന്ന് പൊലീസ് അറിയിച്ചു. വാഹനത്തിൽ നടത്തിയ വിശദമായ പരിശോധനയിൽ ഹുക്ക, നിരവധി സിപ്പ് ലോക്ക് കവറുകൾ അടങ്ങിയ നീല പൗച്ച്, ഡിജിറ്റൽ ത്രാസ് എന്നിവയും കണ്ടെത്തി.

മയക്കുമരുന്ന് ഉപയോഗത്തിനും വിൽപനയ്ക്കുമായി സൂക്ഷിച്ചുവെന്ന കണ്ടെത്തലിൻ്റെ അടിസ്ഥാനത്തിലാണ് പൊലീസ് നടപടി. മംഗ്ളൂരിൽ ഉള്ള എംഡിഎംഎ ഇടനിലക്കാരനിൽ നിന്നും വാങ്ങി കൊണ്ടുവരികയായിരുന്നു മയക്കുമരുന്നെന്ന് പ്രതികള്‍ മൊഴി നൽകിയതായി പൊലീസ് അറിയിച്ചു.

തുടർനടപടികൾ പുരോഗമിക്കുന്നു

സംഭവത്തിൽ വിദ്യാനഗർ പൊലീസ് ക്രൈം നമ്പർ 0412/2026 ആയി കേസ് രജിസ്റ്റർ ചെയ്തു. നാർകോട്ടിക് ഡ്രഗ്സ് ആൻഡ് സൈക്കോട്രോപിക് സബ്സ്റ്റൻസസ് നിയമത്തിലെ 22(ബി), 29 വകുപ്പുകൾ പ്രകാരമാണ് കേസ്. പ്രതികളുടെ കൈവശമുണ്ടായിരുന്ന മൂന്ന് മൊബൈൽ ഫോണുകളും മയക്കുമരുന്ന് കടത്താൻ ഉപയോഗിച്ചതായി കണ്ടെത്തിയ കാറും പൊലീസ് കസ്റ്റഡിയിലെടുത്തു.

എസ്ഐ വിജയൻ മേലത്തിൻ്റെ നേതൃത്വത്തിൽ കേസിൽ അന്വേഷണം തുടരുകയാണ്. പിടിച്ചെടുത്ത തൊണ്ടിമുതലുകൾ ശാസ്ത്രീയ പരിശോധനകൾക്കായി കോടതിയിൽ ഹാജരാക്കാനുള്ള നടപടികൾ പുരോഗമിക്കുകയാണ്.

ഈ വാർത്ത നിങ്ങളുടെ വാട്സ്ആപ്പ് ഗ്രൂപ്പുകളിൽ ഷെയർ ചെയ്യൂ. കൂടുതല്‍ വാർത്തകള്‍ അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക. 

Article Summary: Vidyanagar police arrested a man and a woman for smuggling MDMA in Cherkala.

#KasargodVartha #KasaragodNews #MDMASeized #KeralaPolice #CrimeNews #VidyanagarPolice #RenuNews