ജിഎസ്ടി എൻഫോഴ്സ്മെന്റ് വാഹനത്തിൽ വിജിലൻസിന്റെ മിന്നൽ പരിശോധന; ഉദ്യോഗസ്ഥന്റെ ഫോണിൽ അനധികൃത ഗൂഗിൾ പേ ഇടപാടുകൾ കണ്ടെത്തി
● ഇടപാടുകളുടെ ഉറവിടമോ ലക്ഷ്യമോ വ്യക്തമല്ലാത്തത് സംശയം ബലപ്പെടുത്തി.
● കൈക്കൂലി പണം ഗൂഗിൾ പേ വഴി വാങ്ങി വാഹനങ്ങൾ വിട്ടയക്കുന്നതായി വിജിലൻസ് സംശയിക്കുന്നു.
● ജിഎസ്ടി വിഭാഗത്തിനെതിരെ വ്യാപാര സമൂഹത്തിൽ നിന്നും പൊതുജനങ്ങളിൽ നിന്നും പരാതികൾ ഉയർന്നിരുന്നു.
● വിജിലൻസ് ഡി വൈ എസ് പി വി ഉണ്ണികൃഷ്ണൻ്റെ നിർദ്ദേശപ്രകാരമാണ് റെയ്ഡ് നടന്നത്.
● റിപ്പോർട്ട് വിജിലൻസ് ഡയറക്ടർ വഴി ജിഎസ്ടി വകുപ്പിന് തുടർ നടപടികൾക്കായി കൈമാറും.
ചെറുവത്തൂർ: (KasargodVartha) രാത്രികാല പരിശോധന നടത്തുകയായിരുന്ന ജിഎസ്ടി എൻഫോഴ്സ്മെന്റ് വിഭാഗത്തിന്റെ വാഹനത്തിൽ വിജിലൻസ് നടത്തിയ മിന്നൽ റെയ്ഡിൽ നിർണായക വിവരങ്ങൾ ലഭിച്ചു. ജിഎസ്ടി ഉദ്യോഗസ്ഥരുടെ മൊബൈൽ ഫോണുകൾ പരിശോധിച്ച വിജിലൻസ് സംഘം സംശയകരമായതും അനധികൃതവുമായ നിരവധി ഗൂഗിൾ പേ ഇടപാടുകൾ കണ്ടെത്തി.
കാഞ്ഞങ്ങാട് കേന്ദ്രീകരിച്ച് പ്രവർത്തിക്കുന്ന ജിഎസ്ടി എൻഫോഴ്സ്മെന്റ് ടീമാണ് പരിശോധനയിൽ കുടുങ്ങിയത്. വെള്ളിയാഴ്ച സന്ധ്യയോടെ ദേശീയപാതയിൽ ചെറുവത്തൂരിന് സമീപം പരിശോധന നടത്തുകയായിരുന്ന ഉദ്യോഗസ്ഥരുടെ വാഹനം വിജിലൻസ് ഉദ്യോഗസ്ഥർ തടഞ്ഞു പരിശോധിക്കുകയായിരുന്നു. വാഹനത്തിൽ ഓഫീസർ അടക്കം മൂന്ന് ജിഎസ്ടി ഉദ്യോഗസ്ഥരാണ് ഉണ്ടായിരുന്നത്.
പരിശോധനയ്ക്കിടെ ഉദ്യോഗസ്ഥരിൽ ഒരാളുടെ മൊബൈൽ ഫോണിലെ നിരവധി പണമിടപാടുകൾ സംശയകരമാണെന്ന് വിജിലൻസ് കണ്ടെത്തി. ഇടപാടുകളുടെ ഉറവിടവും ലക്ഷ്യവും വ്യക്തമല്ലാത്ത സാഹചര്യമാണ് സംശയം കൂടുതൽ ബലപ്പെടുത്തിയത്.
ജിഎസ്ടി ഉദ്യോഗസ്ഥർക്കെതിരെ വ്യാപകമായ പരാതികൾ ഉയർന്നിരുന്നു. ജിഎസ്ടി അടയ്ക്കാതെ വാഹനങ്ങളിൽ പാർസലുകളും മറ്റും എത്തുമ്പോൾ കൈക്കൂലി പണം ഗൂഗിൾ പേ വഴി വാങ്ങി വിട്ടയക്കുന്നതായാണ് വിജിലൻസ് സൂചിപ്പിക്കുന്നത്.
വിജിലൻസ് ഡി വൈ എസ് പി വി ഉണ്ണികൃഷ്ണന്റെ നിർദ്ദേശപ്രകാരമായിരുന്നു റെയ്ഡ്. എസ് ഐ രാധാകൃഷ്ണൻ, പോലീസ് ഉദ്യോഗസ്ഥരായ സന്തോഷ്, റിജേഷ്, ശ്രീജിത്ത്, പ്രദീപൻ അരവത്ത്, വിജേഷ്, തഹസിൽദാർ ശശിധരൻ എന്നിവർ ഉൾപ്പെടുന്ന സംഘമായിരുന്നു പരിശോധനയ്ക്ക് നേതൃത്വം കൊടുത്തത്.
പരിശോധനയിൽ ഉണ്ടായ കണ്ടെത്തലുകൾ രേഖപ്പെടുത്തി വിജിലൻസ് ഡയറക്ടർ വഴി ജിഎസ്ടി വകുപ്പിന് നടപടി റിപ്പോർട്ട് കൈമാറുമെന്ന് ഡിവൈഎസ്പി വ്യക്തമാക്കി. വിജിലൻസ് കണ്ടെത്തിയ പണമിടപാടുകളുടെ സ്വഭാവം, അഴിമതി സാധ്യത, അധികാര ദുരുപയോഗം, അനധികൃത പണമിടപാട് എന്നിവയിലേക്കുള്ള അന്വേഷണം ശക്തമാകുമെന്നാണ് സൂചന.
ജിഎസ്ടി വിഭാഗത്തിന്റെ പ്രവർത്തന രീതിയെക്കുറിച്ച് വ്യാപാരികളും പൊതുജനങ്ങളും ഉന്നയിച്ച പരാതികളുടെ പശ്ചാത്തലത്തിലായിരുന്നു റെയ്ഡ്.
ജിഎസ്ടി ഉദ്യോഗസ്ഥർക്കെതിരെ നടന്ന വിജിലൻസ് റെയ്ഡിൻ്റെ വാർത്ത ഷെയർ ചെയ്യൂ. നിങ്ങളുടെ അഭിപ്രായം കമൻ്റ് ചെയ്യുക.
Article Summary: Vigilance conducted a raid on a GST vehicle in Cheruvathur and found suspicious Google Pay transactions on an officer's phone.
#VigilanceRaid #GSTEnforcement #Corruption #GooglePayScam #KeralaVigilance #Cheruvathur
