ആധാരം രജിസ്റ്റർ ചെയ്യാൻ ഒരു ലക്ഷത്തിലധികം രൂപ കൈക്കൂലി; സബ് രജിസ്ട്രാറെ കുരുക്കി വിജിലൻസ്, കേസെടുത്തു

കോഴിക്കോട്: (KasargodVartha) ആധാരം രജിസ്റ്റർ ചെയ്യാൻ കൈക്കൂലി വാങ്ങിയ സബ് രജിസ്ട്രാർക്കെതിരെ ഉത്തര മേഖല വിജിലൻസ് കേസെടുത്തു. കോഴിക്കോട് താമരശ്ശേരി സബ് രജിസ്ട്രാറായ സനിൽ ജോസിനെതിരെയാണ് അഴിമതി നിരോധന നിയമപ്രകാരം കേസെടുത്തിരിക്കുന്നത്.

മിന്നൽ പരിശോധനയിൽ കുടുങ്ങി

ആധാരം എഴുത്തുകാരിൽ നിന്നും വസ്തു വിൽപ്പനക്കാരിൽ നിന്നുമായി ഒരു ലക്ഷത്തിലധികം രൂപ സബ് രജിസ്ട്രാർ കൈക്കൂലിപ്പണമായി സ്വീകരിച്ചതായി വിജിലൻസ് നടത്തിയ മിന്നൽ പരിശോധനയിൽ വ്യക്തമായിരുന്നു. ഇതിൻ്റെ അടിസ്ഥാനത്തിലാണ് ഉദ്യോഗസ്ഥനെതിരെ നടപടി സ്വീകരിച്ചത്.

സബ് രജിസ്ട്രാർ ഓഫീസുകൾ കേന്ദ്രീകരിച്ച് സാമ്പത്തിക ക്രമക്കേടുകൾ നടക്കുന്നതായി വിജിലൻസിന് രഹസ്യവിവരങ്ങൾ ലഭിച്ചിരുന്നു. ഇതിൻ്റെ തുടർച്ചയായി നടത്തിയ അന്വേഷണത്തിലാണ് ലക്ഷങ്ങളുടെ കൈക്കൂലി ഇടപാട് വിജിലൻസ് ഉദ്യോഗസ്ഥർ കണ്ടെത്തിയത്.

ഡയറക്ടറുടെ നിർദേശം; അന്വേഷണം തുടങ്ങി

വിജിലൻസ് മിന്നൽ പരിശോധനയിൽ ക്രമക്കേട് വ്യക്തമായതിൻ്റെ അടിസ്ഥാനത്തിൽ വിജിലൻസ് ഡയറക്ടർ മനോജ് എബ്രഹാം ഐപിഎസ് ഉദ്യോഗസ്ഥനെതിരെ നടപടിക്ക് ഉത്തരവിടുകയായിരുന്നു. ഈ ഉത്തരവിൻ്റെ അടിസ്ഥാനത്തിൽ സനിൽ ജോസിനെതിരെ അഴിമതി നിരോധന നിയമപ്രകാരം ഉത്തര മേഖല വിജിലൻസ് എസ്പി ബാലകൃഷ്ണൻ നായർ എഫ്ഐആർ രജിസ്റ്റർ ചെയ്ത് അന്വേഷണം ആരംഭിച്ചു.

കൂടുതല്‍ വാർത്തകളും വിശേഷങ്ങളും അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് കമൻ്റായി രേഖപ്പെടുത്തുക. 

Article Summary: Vigilance registers case against Thamarassery sub registrar for taking bribe.

#KozhikodeNews #Vigilance #KeralaPolice #Thamarassery #BriberyCase #MalayalamNews #RenuNews