‘സദാചാര പൊലീസ് ചമഞ്ഞ് അതിക്രമം’; ഭർതൃമതിയുടെ വീട്ടിൽ കയറി ഭീഷണിപ്പെടുത്തി പണവും സ്വർണവും കവർന്നതായി പരാതി, 5 അംഗ സംഘം അറസ്റ്റിൽ

വിദ്യാനഗർ: (KasargodVartha) ഭർതൃമതിയായ യുവതിയുടെ വീട്ടിൽ സദാചാര പൊലീസ് ചമഞ്ഞ് അതിക്രമിച്ച് കയറി യുവതിയെയും ആൺ സുഹൃത്തിനെയും ഭീഷണിപ്പെടുത്തി പണവും സ്വർണവും കവർന്നെന്ന കേസിൽ അഞ്ചംഗ സംഘത്തെ വിദ്യാനഗർ പൊലീസ് അറസ്റ്റ് ചെയ്തു. ബി ഷറീഫ് (42), മുഹമ്മദ് സാലിഹ് (22), ഉമർ മുഖ്താർ (18), മുഹമ്മദ് ഷിഹാൻ (20), അബ്ദുൽ റഷീദ് (36) എന്നിവരാണ് അറസ്റ്റിലായത്. 

ജൂലൈ 21-നാണ് കേസിനാസ്പദമായ സംഭവം. യുവതിയുടെ വീട്ടിലെത്തിയ ആൺ സുഹൃത്തിനെയും യുവതിയെയും സംഘം ചേർന്ന് തടഞ്ഞുനിർത്തി ഫോട്ടോ എടുക്കുകയും ഇത് പുറത്തുവിടുമെന്ന് ഭീഷണിപ്പെടുത്തുകയും ചെയ്തെന്നാണ് പൊലീസിന് നൽകിയ പരാതിയിൽ പറയുന്നത്.

സ്വർണവും പണവും കവർന്നു

തുടർന്ന് പ്രതികൾ അഞ്ച് ലക്ഷം രൂപ ആവശ്യപ്പെട്ടതായും പൊലീസ് വ്യക്തമാക്കുന്നു. ഭീഷണിയെ തുടർന്ന് യുവതിയിൽ നിന്ന് രണ്ട് പവൻ തൂക്കം വരുന്ന സ്വർണമാല, മോതിരം, 15,000 രൂപ എന്നിവയും ആൺ സുഹൃത്തിൽ നിന്ന് 40,000 രൂപയും സംഘം കൈക്കലാക്കിയെന്നാണ് കേസ്. പണവും സ്വർണവും കൈപ്പറ്റിയ ശേഷവും സംഘം ഇരുവരെയും ഫോണിലൂടെ നിരന്തരം ബന്ധപ്പെടുകയും കൂടുതൽ പണം ആവശ്യപ്പെട്ട് ഭീഷണിപ്പെടുത്തുകയും ചെയ്തതായി പരാതിയിലുണ്ട്.

പ്രതികൾ റിമാൻഡിൽ

തുടർച്ചയായ ഭീഷണിയെ തുടർന്നാണ് യുവതിയും ആൺ സുഹൃത്തും വിദ്യാനഗർ പൊലീസിൽ പരാതി നൽകിയത്. തുടർന്ന് പൊലീസ് നടത്തിയ വിശദമായ അന്വേഷണത്തിലാണ് പ്രതികളെ തിരിച്ചറിഞ്ഞത്. തന്ത്രപരമായ നീക്കത്തിലൂടെ അഞ്ച് പേരെയും പൊലീസ് സംഘം പിടികൂടുകയായിരുന്നു. അറസ്റ്റിലായ ബി ഷറീഫിനെതിരെ നേരത്തെയും വിവിധ കേസുകളുണ്ടെന്ന് പൊലീസ് അറിയിച്ചു. 

മോഷണം, തട്ടിക്കൊണ്ടുപോകൽ തുടങ്ങിയ കുറ്റങ്ങളുമായി ബന്ധപ്പെട്ട് ആദൂർ, മേൽപറമ്പ് പൊലീസ് സ്റ്റേഷനുകളിലായി നാല് കേസുകളിൽ ഇയാൾ പ്രതിയാണെന്ന് പൊലീസ് പറഞ്ഞു. വീട്ടിൽ അതിക്രമിച്ച് കയറൽ, ഭീഷണിപ്പെടുത്തി പണം തട്ടിയെടുക്കൽ, കവർച്ച ഉൾപ്പെടെയുള്ള വകുപ്പുകൾ ചുമത്തിയാണ് പ്രതികൾക്കെതിരെ കേസെടുത്തിരിക്കുന്നത്. അറസ്റ്റിലായ അഞ്ച് പേരെയും കോടതിയിൽ ഹാജരാക്കി റിമാൻഡ് ചെയ്തു.

അന്വേഷണ സംഘം

വിദ്യാനഗർ ഇൻസ്പെക്ടർ പി പ്രമോദിൻ്റെ നേതൃത്വത്തിലാണ് പ്രതികളെ പിടികൂടിയത്. എസ്ഐ രമേശ് മുരളി, എഎസ്ഐ പ്രദീപൻ, സിവിൽ പൊലീസ് ഓഫീസർമാരായ അജയ് വിൽസൺ, ടി ഹരീഷ് എന്നിവരും അന്വേഷണ സംഘത്തിലുണ്ടായിരുന്നു.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം.

Article Summary: Vidyanagar police arrested a 5-member gang for moral policing, trespassing into a woman's house, and extorting gold and money by blackmailing her and her male friend.

#KasargodVartha #VidyanagarPolice #MoralPolicing #KasaragodNews #CrimeNews #KeralaPolice #ExtortionCase #MalayalamNews #AparnaNews