ആൾത്താമസമില്ലാത്ത വീട്ടിൽ വെച്ച് ഒത്തുചേരൽ; വാടാനപ്പള്ളി കൊലപാതക കേസിൽ പ്രായപൂർത്തിയാകാത്ത 2 കുട്ടികളടക്കം 3 പേർ അറസ്റ്റിൽ; കാപ്പ പ്രതിക്കായി തെരച്ചിൽ
● അറസ്റ്റിലായവരിൽ രണ്ട് പേർ 17 വയസ്സുള്ള പ്രായപൂർത്തിയാകാത്ത കുട്ടികളാണ്
● ബിലാൽ എന്നറിയപ്പെടുന്ന 18-കാരൻ മുഹമ്മദ് റാസിലാണ് പിടിയിലായ മറ്റൊരാൾ
● സംഭവത്തിന് മുൻപ് ആൾത്താമസമില്ലാത്ത വീട്ടിൽ ഇവർ ഒത്തുകൂടിയതായി പൊലീസ് കണ്ടെത്തി
● കേസിലെ മുഖ്യപ്രതിയെന്ന് സംശയിക്കുന്ന 37 ക്രിമിനൽ കേസുകളുള്ള ബിൻസാദ് ഒളിവിലാണ്
തൃശൂർ: (KasargodVartha) വാടാനപ്പള്ളി ബീച്ചിലെ ഫസൽ നഗറിൽ യുവാവ് മർദനമേറ്റ് കൊല്ലപ്പെട്ട സംഭവത്തിൽ പ്രായപൂർത്തിയാകാത്ത രണ്ടുപേർ ഉൾപ്പെടെ മൂന്നുപേർ അറസ്റ്റിലായി. ബിലാൽ എന്നറിയപ്പെടുന്ന മുഹമ്മദ് റാസിൽ (18), 17 വയസ്സുള്ള രണ്ടുപേർ എന്നിവരെയാണ് വാടാനപ്പള്ളി പൊലീസ് അറസ്റ്റ് ചെയ്തത്. ബീച്ച് സ്വദേശി രായംമരക്കാർ വീട്ടിൽ അബ്ദുൽ സലാമാണ് (40) കൊല്ലപ്പെട്ടത്.
2026 ഒക്ടോബർ 7 ബുധനാഴ്ച ഫസൽ നഗറിലെ ഒരു പറമ്പിലാണ് അബ്ദുൽ സലാമിനെ മരിച്ചനിലയിൽ കണ്ടെത്തിയത്.
ആൾത്താമസമില്ലാത്ത വീട്ടിലെ ഒത്തുചേരൽ
റൂറൽ ജില്ലാ പൊലീസ് മേധാവി മുഹമ്മദ് നദീമിൻ്റെ നിർദേശപ്രകാരം നടത്തിയ പ്രാഥമിക അന്വേഷണത്തിലാണ് കേസിൽ നിർണായക വഴിത്തിരിവുണ്ടായത്. സംഭവം നടന്നതിൻ്റെ തലേന്നു രാത്രി ഫസൽ നഗർ ബീച്ചിലെ ആൾത്താമസമില്ലാത്ത ഒരു വീട്ടിൽ അബ്ദുൽ സലാം ഉണ്ടായിരുന്നതായി അന്വേഷണ സംഘത്തിന് രഹസ്യവിവരം ലഭിച്ചു.
ഇയാളോടൊപ്പം സുഹൃത്തും ഒട്ടേറെ ക്രിമിനൽ കേസുകളിൽ പ്രതിയുമായ ബീച്ചിലെ പടിയത്ത് വീട്ടിൽ ബിൻസാദ് (37), മറ്റു രണ്ടുപേർ, പ്രായപൂർത്തിയാകാത്ത രണ്ടുപേർ എന്നിവരും ഈ വീട്ടിൽ ഉണ്ടായിരുന്നതായി പൊലീസിന് വിവരങ്ങൾ ലഭിച്ചിരുന്നു. തുടർന്ന് അന്വേഷണ സംഘം നടത്തിയ തെരച്ചിലിലാണ് പ്രതികൾ പിടിയിലായത്.
കാപ്പ പ്രതി ബിൻഷാദിനായി തെരച്ചിൽ
കേസിലെ മുഖ്യപ്രതിയെന്ന് സംശയിക്കുന്ന ബിൻസാദ് വാടാനപ്പള്ളി സ്റ്റേഷനിലെ റൗഡിപ്പട്ടികയിലുള്ളയാളും ഒട്ടേറെ സ്റ്റേഷനുകളിലായി 37 ക്രിമിനൽ കേസുകളിലെ പ്രതിയുമാണെന്ന് പൊലീസ് പറഞ്ഞു. കാപ്പ നിയമ പ്രകാരം ജില്ലയിൽ നിന്നും നാടുകടത്തിയിട്ടുള്ള ബിൻസാദിനെ കണ്ടെത്താനുള്ള ശ്രമം പൊലീസ് ഊർജിതമാക്കിയിട്ടുണ്ട്.
കൊടുങ്ങല്ലൂർ ഡിവൈഎസ്പി ആർ രതീഷ്കുമാർ, വലപ്പാട് സിഐ പി കെ പത്മരാജൻ എന്നിവർ കൊലപാതകം നടന്ന സ്ഥ‌ലത്തെത്തി പരിശോധനകൾ നടത്തി. വിശദമായ അന്വേഷണത്തിന് പ്രത്യേക സംഘത്തെ നിയോഗിച്ചിട്ടുണ്ട്.
വാടാനപ്പള്ളി എസ്എച്ച്ഒ എസ് ഐ ഉമേഷ്, ജിഎസ്ഐ അസീസ്, ജില്ലാ റൂറൽ ഷാഡോ പൊലീസ് ഉദ്യോഗസ്ഥരായ മിഥുൻ ആർ കൃഷ്ണ, പി എം ശമീർ എന്നിവരായിരുന്നു അന്വേഷണ സംഘത്തിലെ പ്രധാന ഉദ്യോഗസ്ഥർ.
കൂടുതല്‍ വാർത്തകളും വിശേഷങ്ങളും അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് കമൻ്റായി രേഖപ്പെടുത്തുക.
Article Summary: Three suspects, including two minors, were held for Abdul Salam's murder.
#VadanappallyMurder #ThrissurNews #KeralaPolice #KAAPA #MurderInvestigation #MalayalamNews #RenuNews
