സിനിമാ തിരക്കഥയെ വെല്ലുന്ന പക; സുഹൃത്തിന്റെ മുൻഭാര്യയുമായുള്ള ബന്ധം ചോദ്യം ചെയ്തതിന് പ്രതികാരം; യുവാവിനെ വിളിച്ചുവരുത്തി കുത്തിക്കൊലപ്പെടുത്താൻ ശ്രമിച്ചെന്ന കേസിൽ മുഖ്യപ്രതി വിമാനത്താവളത്തിൽ പിടിയിൽ

ഉദുമ: (KasargodVartha) പ്രണയവും ചതിയും പ്രതികാരവും നിറഞ്ഞ സിനിമാ തിരക്കഥയെ വെല്ലുന്ന സംഭവവികാസങ്ങൾ. ഒടുവിൽ യുവാവിനെ കുത്തിക്കൊലപ്പെടുത്താൻ ശ്രമിച്ചെന്ന കേസിൽ മുഖ്യപ്രതി വിമാനത്താവളത്തിൽ പിടിയിൽ. ഉദുമ കണ്ണംകുളം താനത്തിങ്കൽ വീട്ടിൽ ബി. അഭിജിത്തിനെ (21) വധിക്കാൻ ശ്രമിച്ചെന്ന കേസിൽ നിഷാദ്, കൂട്ടുപ്രതി ഫലാഹ് എന്നിവരാണ് ബേക്കൽ പോലീസിന്റെ പിടിയിലായത്. കൃത്യം നടത്തി മംഗളൂരു വിമാനത്താവളം വഴി വിദേശത്തേക്ക് കടക്കാൻ ശ്രമിക്കവേയാണ് നിഷാദ് കുടുങ്ങിയതെന്ന് പൊലീസ് പറഞ്ഞു.

സംഭവം ഇങ്ങനെ /പൊലീസ് പറയുന്നത്

വെള്ളിയാഴ്‌ച (16/01/2026) രാത്രി 8.50-ഓടെയാണ് കേസിനാസ്പദമായ സംഭവം. പാലക്കുന്ന് ക്വാളിറ്റി ഹോട്ടലിന് സമീപത്തെ ആളൊഴിഞ്ഞ പറമ്പിലേക്ക് മൂന്നാം പ്രതിയായ ആരിഫ് അഭിജിത്തിനെ തന്ത്രപൂർവ്വം കൂട്ടിക്കൊണ്ടുപോകുകയായിരുന്നു. അവിടെ കാത്തുനിന്ന നിഷാദും ഫലാഹും ചേർന്ന് അബിജിത്തിനെ വളഞ്ഞു. അഭിജിത്തിനെ നിലത്തിട്ട് ചവിട്ടുകയും ഇരുമ്പ് വടികൊണ്ട് മർദ്ദിക്കുകയും ചെയ്തു.

രക്ഷപ്പെടാൻ എഴുന്നേൽക്കാൻ ശ്രമിച്ച അഭിജിത്തിനെ ആരിഫ് പിന്നിൽ നിന്ന് പിടിച്ചുനിർത്തി. ഈ സമയം ‘നിന്നെ കൊല്ലും’ എന്ന് ആക്രോശിച്ച് നിഷാദ് കത്തികൊണ്ട് അഭിജിത്തിന്റെ കൈക്കും മുതുകിനും കുത്തിപ്പരിക്കേൽപ്പിച്ചു. കഴുത്തിനോ നെഞ്ചിനോ ആണ് കുത്തേറ്റിരുന്നതെങ്കിൽ മരണം വരെ സംഭവിക്കാമായിരുന്നു. ഗുരുതരമായി പരിക്കേറ്റ അഭിജിത്തിനെ കാസർകോട് കെയർ വെൽ ആശുപത്രിയിൽ പ്രവേശിപ്പിച്ചു. ഇദ്ദേഹത്തിന് 27 തുന്നിക്കെട്ടുകളുണ്ട്.

കൃത്യത്തിന് ശേഷം നിഷാദ് മംഗളൂരു വിമാനത്താവളത്തിലേക്ക് തിരിച്ചു. വെള്ളിയാഴ്ച രാത്രി 11.30-നുള്ള വിമാനത്തിൽ രാജ്യം വിടാനായിരുന്നു പദ്ധതി. എന്നാൽ വിവരം ലഭിച്ചയുടൻ ബേക്കൽ പോലീസ് വിമാനത്താവളത്തിലെ സുരക്ഷാ വിഭാഗത്തിന് അടിയന്തര സന്ദേശം കൈമാറി. തുടർന്ന് വിമാനത്തിൽ കയറുന്നതിന് തൊട്ടുമുമ്പ് സുരക്ഷാ ഉദ്യോഗസ്ഥർ നിഷാദിനെ തടഞ്ഞുവെച്ച് പോലീസിന് കൈമാറുകയായിരുന്നു. രണ്ടാം പ്രതി ഫലാഹിനെയും പോലീസ് കസ്റ്റഡിയിലെടുത്തു.

പകയുടെ പഴയ കഥ 

അഭിജിത്തിന്റെ സുഹൃത്തായ ഇത്തിഷാമും പ്രതിയായ നിഷാദും തമ്മിലുള്ള പ്രശ്നങ്ങളാണ് കത്തിക്കുത്തിൽ കലാശിച്ചത്. ഇത്തിഷാം പ്ലസ് ടു കാലഘട്ടം മുതൽ പ്രണയിച്ചിരുന്ന പെൺകുട്ടിയെ മൂന്ന് വർഷം മുമ്പ് നിക്കാഹ് ചെയ്ത് ഗൾഫിലേക്ക് പോയിരുന്നു. ഇത്തിഷാമിന്റെ ഉറ്റ സുഹൃത്തായിരുന്ന നിഷാദ്, പിന്നീട് ഇത്തിഷാമിന്റെ ഭാര്യയുമായി അടുപ്പത്തിലാവുകയും വീഡിയോ കോൾ ഉൾപ്പെടെയുള്ള ബന്ധം തുടരുകയും ചെയ്തു. ഇതറിഞ്ഞ ഇത്തിഷാം വിവാഹബന്ധം വേർപെടുത്തി.

സുഹൃത്തിന്റെ ചതിയിൽ പ്രകോപിതനായ ഇത്തിഷാം 2024 സെപ്റ്റംബറിൽ ഉദുമയിൽ വെച്ച് നിഷാദിനെ ഇരുമ്പ് വടികൊണ്ട് അടിച്ച് കയ്യെല്ല് പൊട്ടിച്ചിരുന്നു. അന്ന് ഇത്തിഷാമിനൊപ്പം അഭിജിത്തും ഉണ്ടായിരുന്നു. ഈ കേസിൽ ഇരുവരും രണ്ട് മാസം റിമാൻഡിൽ കഴിഞ്ഞിരുന്നു. ഇതിന്റെ വൈരാഗ്യം തീർക്കാനാണ് നിഷാദ് അഭിജിത്തിനെ വകവരുത്താൻ പദ്ധതിയിട്ടതെന്നാണ് പറയുന്നത്.

അന്വേഷണം 

ബേക്കൽ എസ്.ഐ (ഗ്രേഡ്) കെ.വി. മനോജ് കുമാറിനാണ് അന്വേഷണ ചുമതല. ഭാരതീയ ന്യായ സംഹിത (BNS) പ്രകാരം വധശ്രമം ഉൾപ്പെടെയുള്ള ഗുരുതര വകുപ്പുകൾ ചുമത്തിയാണ് കേസെടുത്തിരിക്കുന്നത്. ഒളിവിൽ പോയ മൂന്നാം പ്രതി ആരിഫിനായി അന്വേഷണം ഊർജ്ജിതമാക്കി.

ഈ വാർത്തയെകുറിച്ച് നിങ്ങളു ടെ അഭിപ്രായം പങ്കുവെക്കുക.

Article Summary: Police arrest the main suspect, Nishad, at Mangalore airport for the murder attempt.

#UdumaNews #MurderAttempt #BekalPolice #KasaragodCrime #AirportArrest #RevengeAttack