തൃക്കരിപ്പൂർ റെയിൽവേ സ്റ്റേഷനിൽ പൊലീസുകാരന്റെ കാർ തകർത്ത് ബാറ്ററി മോഷണം; രണ്ട് യുവാക്കൾ അറസ്റ്റിൽ

തൃക്കരിപ്പൂർ: (KasargodVartha) റെയിൽവേ സ്റ്റേഷൻ പരിസരത്ത് നിർത്തിയിട്ടിരുന്ന കാറിന്റെ ചില്ല് അടിച്ച് തകർത്ത് ബാറ്ററി മോഷ്ടിച്ച സംഭവത്തിൽ രണ്ട് യുവാക്കൾ അറസ്റ്റിൽ. ചന്തേര പോലീസ് സ്റ്റേഷൻ പരിധിയിൽ താമസിക്കുന്ന കെ റോബിൻ എന്ന സച്ചു(20), എ ഷാനിൽ(28) എന്നിവരെയാണ് കേസുമായി ബന്ധപ്പെട്ട് അറസ്റ്റ് ചെയ്തത്.

കാസർകോട് റെയിൽവേ പോലീസ് സ്റ്റേഷനിലെ സിവിൽ പോലീസ് ഓഫീസർ ഷംസീറിന്റെ കാറിന് നേരെയാണ് ആക്രമണവും മോഷണവും ഉണ്ടായത്. തൃക്കരിപ്പൂർ റെയിൽവേ സ്റ്റേഷൻ പരിസരത്ത് കാർ പാർക്ക് ചെയ്ത ശേഷം അദ്ദേഹം ഡ്യൂട്ടിക്ക് പോയതായിരുന്നു.

ഡ്യൂട്ടി കഴിഞ്ഞ് തിരിച്ചെത്തിയപ്പോഴാണ് കാർ തകർത്ത നിലയിൽ കണ്ടത്. തുടർന്ന് നൽകിയ പരാതിയിൽ അന്വേഷണം ആരംഭിച്ച പോലീസ് വ്യാഴാഴ്ച ഉച്ചയോടെയാണ് പ്രതികളെ പിടികൂടിയത്. സംഭവസ്ഥലത്തെ സിസിടിവി ദൃശ്യങ്ങൾ കേന്ദ്രീകരിച്ചാണ് പ്രതികളെ കണ്ടെത്തിയത്.

ചന്തേര എസ് ഐ പി വി രഘുനാഥന്റെ നേതൃത്വത്തിൽ സീനിയർ സിവിൽ പോലീസ് ഓഫീസർമാരായ സജിത്ത് പടന്ന, ഹരീഷ് കുമാർ, ഷൈജു എന്നിവരടങ്ങിയ സംഘമാണ് പ്രതികളെ കണ്ടെത്തി അറസ്റ്റ് ചെയ്തത്. റെയിൽവേ പോലീസും അന്വേഷണത്തിന് ആവശ്യമായ സഹായങ്ങൾ നൽകി.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക. 

Article Summary: Two young men arrested for vandalizing a police officer's car and stealing its battery at Trikkarippur railway station.

#KeralaNews #Trikkarippur #PoliceCarVandalized #BatteryTheft #Arrest #KasargodPolice